Profecía 3. Kʼojaʼaniloʼob
Profecía 3. Kʼojaʼaniloʼob
«Yaan u yantal kʼaakʼas kʼojaʼaniloʼob» (LUCAS 21:11).
● Bonzalieʼ ku meyaj yéetel le autoridadoʼob utiaʼal u tsʼaʼakal le kʼojaʼanoʼob tiʼ junpʼéel u luʼumil Áfricaoʼ. Teʼ lugaroʼ ku sen baʼateʼel le máakoʼoboʼ. Letiʼeʼ tu beetaj tuláakal le ku páajtal utiaʼal u tsʼakik le mineroʼob kʼojaʼanchajoʼob yéetel junpʼéel virus ku kʼaabaʼtik Marburgooʼ. * Kex tu sen aʼalaj tiʼ le autoridadoʼob le baʼax ku yúuchloʼ máan maas tiʼ cuatro meses ka beetaʼab u cuentail. Ka binoʼob áantbileʼ, tsʼokaʼaniliʼ u kíimil Bonzalieʼ tumen tsaʼay tiʼ le virus yaan kaʼach tiʼ le máaxoʼob taak u tsʼakikoʼ.
BAʼAX KU YÚUCHUL. Yaʼab tiʼ le kʼojaʼaniloʼob jeʼex le neumoníaoʼ, u wachʼkʼajal máak, sida, tuberculosis yéetel le paludismooʼ táakaʼanoʼob ichil le kʼojaʼaniloʼob maas yaʼab máak ku kíimskoʼoboʼ. Tu añoil 2004, le cinco kʼojaʼaniloʼobaʼ tu kíimsaj óoliʼ once millones máakoʼob, jeʼel u páajtal u yaʼalaʼaleʼ cada tres segundos kíim juntúul máak.
BAʼAX KU YAʼALAʼAL Como táan u maas yaʼabtal máakeʼ, le oʼolal táan xan u maas yaʼabtal le máaxoʼob ku kʼojaʼantaloʼoboʼ.
¿JAAJ WA BAʼAX KU YAʼALAʼAL? Kex jach jaaj tsʼoʼok u maas yaʼabtal máakeʼ, tsʼoʼok xan u maas kaanbal le máaxoʼob ku kaxtikoʼob u tsʼaakil le kʼojaʼaniloʼoboʼ. ¿Maʼ wa túun unaj u menostal le kʼojaʼaniloʼoboʼ? Maʼ xaaneʼ beyoʼ, chéen baʼaleʼ kúulpach baʼax ku yúuchul tumen táan u maas yaʼabtal.
¿BAʼAX KA TUKLIK? ¿Teʼ kʼiinoʼobaʼ yaan wa kʼaakʼas kʼojaʼaniloʼob jeʼex u yaʼalmil le Bibliaoʼ?
U millonesil máakoʼob ku sufriroʼob ikil u tíitkuba le luʼumoʼ bey xan yoʼolal le wiʼijil yéetel le kʼojaʼaniloʼ. Tsʼoʼoleʼ u millonesil máakoʼob ku beetaʼal xan u sufriroʼob tumen u láakʼtsiloʼob. Ilawil baʼax ku yaʼalik le Biblia yoʼolal le baʼaxoʼob ku yúuchlaʼ.
[Nota]
^ xóot’ol 3 Le fiebre hemorrágica de Marburgooʼ junpʼéel virus chíikaʼan tiʼ le ébolaoʼ.
[Uláakʼ baʼax ku tsoʼolol]
«Jeʼel bix u yuʼubikuba juntúul máak le táan u jaantaʼal tumen juntúul leónoʼ bey xan u yuʼubikuba le máax táan u kíimsaʼal tumen junpʼéel kʼaakʼas kʼojaʼaniloʼ» (MICHAEL OSTERHOLM, EPIDEMIÓLOGO).
[U yuumil le oochel]
© William Daniels/Panos Pictures