Profecía 4. Minaʼan yaabilaj ichil le familiaoʼ
Profecía 4. Minaʼan yaabilaj ichil le familiaoʼ
«Le máakoʼoboʼ [...] yaan u pʼáatal minaʼan u yaabilajoʼob» (2 TIMOTEO 3:1-3).
● Chriseʼ ku meyaj yéetel junpʼéel grupo máakoʼob ku yáantkoʼob le koʼoleloʼob ku maltratartaʼalob tumen u yíichamoʼob tu noojolil Galesoʼ. Letiʼeʼ tu yaʼalaj: «Juntéenjeakeʼ taal juntúul koʼolel loʼoloxaʼan u yich, hasta maʼ páajchaj in kʼaj óoltikiʼ. Yaan uláakʼ koʼoleloʼobeʼ jach ku mixbaʼalkúuntaʼaloʼob tumen u yíichamoʼob le beetik chinikbal tu máanoʼob, suʼlak u líiʼs u paakatoʼob».
BAʼAX KU YÚUCHUL. Tiʼ junpʼéel u luʼumil Áfricaeʼ óoliʼ u treinta por cientoil le koʼoleloʼob violartaʼab tu paaliloʼoboʼ. Tiʼ junpʼéel encuesta beetaʼab teʼ luʼumiloʼ ilaʼabeʼ kex u treintitrés por cientoil le xiiboʼoboʼ normal u yilik u lajik u yatanoʼob. Pero maʼ chéen le koʼoleloʼob ku maltratartaʼaloʼoboʼ. Por ejemploeʼ tu luʼumil Canadáeʼ óoliʼ u treinta por cientoil le xiiboʼob ku maltratartaʼaloʼob yéetel ku jaʼatsʼloʼob tumen u yatanoʼoboʼ.
BAʼAX KU YAʼALAʼAL. Desde úuch ku maltratartaʼal máak tumen u núup chéen baʼaleʼ bejlaʼeʼ maas ku beetaʼal u cuentail.
¿JAAJ WA BAʼAX KU YAʼALAʼAL? Bejlaʼeʼ maas ku beetaʼal u cuentail le máaxoʼob ku maltratartaʼaloʼoboʼ. Pero ¿tsʼoʼok wa u yáantaj utiaʼal u menostal le problemaaʼ? U jaajileʼ maʼ. Tsʼoʼok tak u maas yaʼabtal le máaxoʼob ku maltratartaʼal ichil u familiaʼoboʼ.
¿BAʼAX KA TUKLIK? ¿Táan wa u béeytal 2 Timoteo 3:1-3? ¿Yaan wa máak maʼ tu yeʼesik yaabilaj ichil u familia?
Le uláakʼ profecía táan u béeytal teʼ kʼiinoʼobaʼ yaan yil yéetel u kʼaskúuntaʼal le Luʼumaʼ. Koʼox ilik baʼax ku yaʼalik le Biblia tu yoʼolaloʼ.
[Uláakʼ baʼax ku tsoʼolol]
«Le máaxoʼob ku maltratartaʼaloʼoboʼ maʼ suuk u yaʼalikoʼob tiʼ le autoridadoʼoboʼ. Juntúul koʼoleleʼ ku aguantartik u maltratartaʼal tak treinticinco u téenel antes tiʼ u demandartik u yíicham» (PORTAVOZ DEL SERVICIO DE AYUDA CONTRA EL MALTRATO DOMÉSTICO DE GALES).