Yaan u yutstal tuláakal baʼal

«Ichil junpʼíit kʼiineʼ maʼ kun antal kʼasaʼan máakoʼob. [...] Pero le utsul máakoʼoboʼ yaan u pʼáatloʼob way luʼumeʼ, jach yaan u kiʼimaktal u yóoloʼob tumen mix baʼal kun beetik u chiʼichnaktaloʼob» (SALMO 37:10, 11).

¿A KʼÁAT wa a wil u béeytal le profecíaaʼ? U jaajileʼ tuláakloʼon k-kʼáat ile. Yaʼab baʼaxoʼob eʼesik yaan u béeytal.

Le xookoʼob máanoʼoboʼ tu yeʼesoʼob jujunpʼéel tiʼ le profecíaʼob eʼesik kuxaʼanoʼon tu tsʼook kʼiinoʼoboʼ (2 Timoteo 3:1-5). Dioseʼ tu nuʼuktaj le máaxoʼob tsʼíibt le Biblia utiaʼal ka u yaʼaloʼob baʼax ku taal u kʼiin u yúuchloʼ (Romanos 15:4). Le profecíaʼoboʼ táan u béeytaloʼob, leloʼ ku yeʼesikeʼ maʼ tun xáantal kéen xuʼulsaʼak le baʼaxoʼob beetik k-sufriroʼ.

¿Baʼax kun úuchul le kéen tsʼoʼokok le u tsʼook kʼiinoʼoboʼ? U Reino Dioseʼ yaan u gobernartik tuláakal máak (Mateo 6:9). Ilawil bix u yeʼesik le Biblia le kuxtal kun antaloʼ:

● Mix máak ken u muʼyajt wiʼijil. «Yaan u sen tsʼáaik u yich le luʼumoʼ, tak tu maas kaʼanlil le montañaʼoboʼ» (Salmo 72:16).

● Mix máak kun kʼojaʼantal. «Mix juntúul u kajnáalil le luʼum ken u yaʼal: ‹Kʼojaʼanen›» (Isaías 33:24).

● Yaan u kaʼa maʼalobtal le Luʼumaʼ. «Le desierto yéetel le luʼum jach tikinoʼ yaan u jach kiʼimaktal u yóoloʼob, le táax luʼum tuʼux mix baʼal yanoʼ yaan xan u kiʼimaktal u yóol yéetel yaan u loolankil jeʼex u loolankil le azafránoʼ» (Isaías 35:1).

Lelaʼ chéen jujunpʼéel tiʼ le profecíaʼob kun béeytal maʼ kun xáantaloʼ. Wa taak a wojéeltik u maasileʼ kʼáat tiʼ juntúul u testigo Jéeoba ka u tsoltech baʼaxten ku creertik tu jaajil yaan u béeytal le profecíaʼobaʼ.