Kʼeʼex u kuxtaloʼob tumen le Bibliaoʼ

¿BAʼAX áant juntúul máak yaan kaʼach yaʼab u yatanoʼob yéetel u pʼekmaj u j-jaajkunajoʼob Jéeoba (testigos de Jehová) u kʼex u tuukul yéetel u beetkuba j-Jaajkunaj? ¿Baʼax áant juntúul pastor tiʼe Iglesia Pentecostal u kʼex baʼax ku creertikoʼ? ¿Baʼax áant náatsʼal tiʼ Dios juntúul koʼolel sajakkúuntaʼan desde tu chichnil yéetel maʼ u yaabiltmuba kaʼachiʼ? ¿Baʼax beet u káajal u meyajtik Dios juntúul máak jach uts tu tʼaan kaʼach u yuʼubik u paaxil heavy metal? Koʼox ilik.

«Juntúul maʼalob íichamtsilen bejlaʼeʼ» (RIGOBERT HOUETO)

SÍIJ TU JAʼABIL: 1941

KAJAʼAN: BENÍN

KAʼACHEʼ: YAʼAB U YATANOʼOB YÉETEL JACH U PʼEKMAJ U J-JAAJKUNAJOʼOB JÉEOBA

LE BIX KUXLIKEN KAʼACHOʼ: Síijen Cotonou, junpʼéel nojoch kaaj yaan tu luʼumil Benín. Líikʼen ichil le religión catolicaoʼ baʼaleʼ óoliʼ maʼatech in bin kaʼach misa. Yaʼab catolicoʼobeʼ yaan kaʼach yaʼab u yatanoʼob, tumen yaan junpʼéel ley tuʼux ku yaʼalik maʼ kʼaas u beetaʼal lelaʼ. Teneʼ anchaj kantúul in watan.

Tu jaʼabil 1970, anchaj junpʼéel baʼateʼel tu kaajil Benín. Teneʼ tin tukleʼ utiaʼal u yutsil le luʼumoʼ, le oʼolal jach tin woksinba teʼ baʼatelaʼ bey xan tiʼ política. Le máakoʼob baʼatelnajoʼoboʼ jach u pʼekmoʼob kaʼach u j-jaajkunajoʼob Jéeoba tumen letiʼobeʼ maʼatech u yoksikubaʼob tiʼ baʼaloʼob beyaʼ, le oʼolal teen xaneʼ tin sen chʼaʼpachtoʼob. Le kʼiin ka jóoʼsaʼab u misioneroʼob le j-Jaajkunajoʼob teʼ luʼum tu jaʼabil 1976, tin tuklaj mix bikʼin kun suutoʼobeʼ.

BIX TU KʼEXIL IN KUXTAL LE BIBLIAOʼ: Le baʼatelaʼ tsʼoʼok tu jaʼabil 1990 yéetel jach jaʼakʼ in wóol le ka tin wilaj u suut le j-Jaajkunajoʼoboʼ. Lelaʼ tu beetaj u káajal in tuklik táan u yáantaʼaloʼob tumen Dios. Teʼ kʼiinoʼob jeʼeloʼ káaj in beetik yaanal meyaj. Juntúul tiʼ in wéet meyajoʼobeʼ j-Jaajkunaj, letiʼeʼ tu séebaʼanil tu tsikbaltajten baʼax ku creertik. Tu xokajten tekstoʼob tiʼ le Biblia tuʼux ku yaʼalik toj yéetel nojoch u yaabilaj Jéeobaoʼ (Deuteronomio 32:4; 1 Juan 4:8). Jach jatsʼuts tin wilil le bix u modosoʼob Diosoʼ yéetel tumen taak kaʼach in kanik u maasileʼ, tin kʼamaj junpʼéel xook yéetel le Bibliaoʼ.

Séeb úuchik u káajal in bin teʼ muchʼtáambaloʼoboʼ yéetel jach jatsʼuts tin wilil le yaabilaj yaan ichiloʼoboʼ maases tumen maʼatech u pʼektikoʼob máaxoʼob yaanal u razaʼob yéetel le máaxoʼob óotsiloʼoboʼ. Jeʼex u bin in maas biskinba tu yéeteloʼobeʼ maas tin tsʼáaj cuenta jach tu jaajil táan u tsaypachtikoʼob Jesús (Juan 13:35).

Tin naʼateʼ wa in kʼáat in meyajt Jéeobaeʼ kʼaʼabéet in pʼatik le Iglesia Catolicaoʼ. Lelaʼ jach talamchaj ten tumen saajken tiʼ baʼax ken u yaʼal u maasil. Kex máan yaʼab tiempoeʼ yéetel u yáantaj Jéeobaeʼ xuʼul in sajaktal yéetel béeychaj in pʼatik le Iglesiaoʼ.

 Baʼaleʼ yaan uláakʼ baʼax unaj in kʼexik kaʼach ichil in kuxtal. Teʼ Bibliaoʼ tin kanaj maʼ maʼalob u yilik Dios u yantal yaʼab u núup máakiʼ (poligamia) (Génesis 2:18-24; Mateo 19:4-6). Dioseʼ chéen ku kʼamik le in yáax watanoʼ, le oʼolal tsʼoʼok in beel tu yéetel. Tsʼoʼoleʼ xuʼul in múul kajtal tu yéetel le uláakʼ in watanoʼoboʼ, baʼaleʼ táanileʼ tin wilaj in tsʼáaik tuláakal baʼax kʼaʼabéet tiʼob. Ka máan kʼiineʼ kaʼatúul tiʼ letiʼob tu beetubaʼob u j-jaajkunajoʼob Jéeoba.

LE UTSILOʼOB TSʼOʼOK U TAASIKTENOʼ: Kex in watan láayliʼ catolicaeʼ, maʼatech u yaʼalikten mix baʼal ikil in meyajtik Jéeoba yéetel tak letiʼ aʼalik juntúul maas maʼalob íichamtsilen.

Teneʼ kin tuklik kaʼacheʼ le politicaoʼ letiʼe baʼax ken u maas maʼalobkíint u kuxtal le máaxoʼob teʼ tuʼux kajaʼanenoʼ, baʼaleʼ maʼ bey úuchikoʼ. Bejlaʼeʼ in wojel chéen u Reino Dios jeʼel u xuʼulsik le talamiloʼob yaan teʼ yóokʼol kaabaʼ (Mateo 6:9, 10). Jach kin tsʼáaik u graciasil tiʼ Jéeoba úuchik u yáantken in kʼex in kuxtal, tumen chéen letiʼe baʼax taasikten kiʼimak óolal bejlaʼoʼ.

«Talamchaj ten in kʼexik in kuxtal» (ALEX LEMOS SILVA)

SÍIJ TU JAʼABIL: 1977

KAJAʼAN: BRASIL

KAʼACHEʼ: PASTOR PENTECOSTAL

LE BIX KUXLIKEN KAʼACHOʼ: Líikʼen tiʼ junpʼéel chan colonia yaan tu kaajil Itu, tiʼ u noj kaajil São Paulo, teʼelaʼ jach táaj yaʼab u beetaʼal loob tiʼ máakiʼ.

Kaʼacheʼ kin bisik junpʼéel kʼaakʼas kuxtal, jach séeb in loobiltik wa máax yéetel kin konik droga. Baʼaleʼ tin tsʼáaj cuentaeʼ lelaʼ jeʼel u beetik kaʼach in kʼaʼalal carceleʼ wa tak in kíimsaʼaleʼ, le oʼolal tin chʼaʼtuklaj in láaj pʼatik. Ka tsʼoʼok lelaʼ káaj in bin teʼ Iglesia Pentecostaloʼ, yéetel teʼ káaj in beetik in pastoriliʼ.

Kin tuklik kaʼacheʼ jeʼel u páajtal in wáantik u maasil desde teʼ Iglesiaoʼ, le oʼolal káaj in máansik junpʼéel programa teʼ radio yaan yil yéetel le religionoʼ, lelaʼ tu beetaj in jach kʼaj óoltaʼal. Baʼaleʼ ka máan kʼiineʼ tin tsʼáa cuentaeʼ le Iglesiaʼoboʼ maʼ tu kaxtikoʼob u yutsil le máaxoʼob yanoʼob ichiloʼ, mix tu nojbeʼenkúuntkoʼob Diosiʼ. Chéen baʼax tin wilaj ku kaxtikoʼobeʼ letiʼe u maas yaʼabtal u taakʼinoʼoboʼ. Le oʼolal tin xúumpʼattaj.

BIX TU KʼEXIL IN KUXTAL LE BIBLIAOʼ: Le ka káaj in xook yéetel u j-jaajkunajoʼob Jéeobaeʼ tin tsʼáa cuentaeʼ letiʼobeʼ maʼ beyoʼob jeʼex u maasil religionoʼoboʼ. Jach jatsʼuts tin wilil kaʼapʼéel baʼaloʼob. Yáaxeʼ, letiʼobeʼ maʼ chéen ku yaʼalikoʼob unaj u yaabiltaʼal Dios yéetel k-éet máakiliʼ, baʼaxeʼ ku yeʼeskoʼob ichil u kuxtaloʼob, yéetel u kaʼapʼéeleʼ letiʼobeʼ maʼatech u yoksikubaʼob tiʼ política mix tiʼ guerraʼob (Isaías 2:4). Le kaʼapʼéel baʼaloʼobaʼ letiʼe baʼax áanten in wil letiʼe jaajil religionoʼ: le nuʼutʼ bej ku bisik máak tiʼ kuxtal minaʼan u xuuloʼ (Mateo 7:13, 14).

Tin naʼataj xaneʼ unaj in láaj kʼexik bix in kuxtal wa in kʼáat luubul utsil tiʼ Dios. Kʼaʼabéet kaʼach in maas eʼesik kabal óolal yéetel in maas máansik tiempo yéetel in familia. Kex talamchaj ten in beetik le kʼeexoʼobaʼ, béeychaj in beetik yéetel u yáantaj Jéeoba. In wataneʼ tsʼokaʼaniliʼ u káajal u xokik le Bibliaoʼ, yéetel tumen jach  jatsʼuts tu yilil le kʼeexoʼob tin beetoʼ, maas taakchaj u séeb meyajtik Dios. Jach maʼ sen úuch tiʼ lelaʼ t-chʼaʼtuklaj k-beetikba u j-jaajkunajoʼon Jéeoba. Tu kaʼatúulaloʼon okjaʼanajoʼon tiʼ junpʼéeliliʼ kʼiineʼ.

LE UTSILOʼOB TSʼOʼOK U TAASIKTENOʼ: Teen yéetel in wataneʼ yéetel kiʼimak óolal k-áantik tu yóoxtúulal k-paalal utiaʼal u maas biskubaʼob yéetel Jéeoba. Bejlaʼeʼ yaan kiʼimak óolal ichil in familia. Jach kin tsʼáaik u graciasil tiʼ Dios úuchik u natsʼiken tu yiknal utiaʼal in kanik u jaajil teʼ Bibliaoʼ. Le baʼaxoʼob úuch ichil in kuxtaloʼ ku yeʼesik jach tu jaajil ku kʼexik u kuxtal máak le Bibliaoʼ.

«Bejlaʼeʼ maʼalob in wuʼuyikinba, kiʼimak in wóol yéetel maʼ saajkeniʼ» (VICTORIA TONG)

SÍIJ TU JAʼABIL: 1957

KAJAʼAN: AUSTRALIA

KAʼACHEʼ: JACH KU MUʼYAJ

LE BIX KUXLIKEN KAʼACHOʼ: Teen u maas nojchil tiʼ le siete paalal anchaj tiʼ in maamaoʼ yéetel líikʼen tu kaajil Newcastle (Nueva Gales del Sur). In taataeʼ jach kʼasaʼan yéetel jach ku káaltal kaʼachi. In maamaeʼ láayliʼ xan jach kʼasaʼaneʼ, yéetel jach ku maltratartiken. Sáamsamal ku yaʼalikten jach kʼasaʼanen yéetel yaan in bin infierno. Le baʼax ku yaʼaliktenoʼ ku beetik kaʼach in jach sajaktal.

Yaʼab u téenel tu jach loobilten in maama, yoʼolal lelaʼ ku pʼáatal maʼ tu páajtal mix in bin escuela. Le ka tu tsʼáajten 11 jaʼaboʼobeʼ le autoridadoʼ tu luʼsaj tiʼ in taataʼob u derechoil u kanáantikenoʼob. Ka tsʼoʼokeʼ bisaʼaben tiʼ junpʼéel convento, chéen baʼaleʼ le ka tu tsʼáajten 14 jaʼaboʼobeʼ púutsʼen. Tumen maʼ in kʼáat suut kaʼach tin wotocheʼ, joʼopʼ in máan chéen bey tu callesil Kings Crosseʼ (junpʼéel barrio yaan Sydney).

Teʼ kʼiinoʼobaʼ kaaj in drogarkinba, in káaltal, in chaʼantik pornografía yéetel in konik in wíinklil. Juntéenjeakeʼ úuch junpʼéel baʼal tu beetaj in jach sajaktal. Káaj in pʼáatal tu yotoch u yuumil junpʼéel centro nocturno, baʼaleʼ junpʼéel kʼiineʼ taal kaʼatúul máakoʼob ilik. Letiʼeʼ tu yaʼalajten ka xiʼiken teʼ cuartooʼ baʼaleʼ kex beyoʼ béeychaj in wuʼuyik le baʼax tu tsikbaltoʼoboʼ. U yuumil le centro nocturnooʼ taak kaʼach u koniken tiʼ le máakoʼoboʼ, utiaʼal leloʼ yaan kaʼach u yokskenoʼob ichil junpʼéel barco utiaʼal maʼ u yilaʼal u biskenoʼob tak tu luʼumil Japón, utiaʼal u beetkoʼob in meyaj tiʼ junpʼéel cantina. Tumen jach sajakchajeneʼ, síitʼnajen desde teʼ balconoʼ ka jóokʼ in wáalkab utiaʼal ka áantaʼaken.

Le táan in kaxtik áantajoʼ tin wilaj juntúul máak táan u xíimbaltik le noj kaajoʼ, ka tin waʼalajtiʼ baʼax ku yúuchulten utiaʼal ka u tsʼáaten taakʼin. Baʼaleʼ tu lugar leloʼ tu yaʼalajten ka xiʼiken teʼ tuʼux ku pʼáatal utiaʼal ka ichkíinaken yéetel ka jaanken. Teneʼ pʼáaten tu yiknal, tsʼoʼoleʼ ka máan junpʼéel jaʼabeʼ tsʼoʼok in beel tu yéetel.

BIX TU KʼEXIL IN KUXTAL LE BIBLIAOʼ: Jejeláas bix tin wuʼuyilinba le ka joʼopʼ in xokik le Biblia yéetel u j-jaajkunajoʼob Jéeobaoʼ. Jeʼex le ka tin wojéeltaj Satanás beetik u yantal kʼasaʼanileʼ, tsʼíikilnajen tumen aʼalaʼanten kaʼacheʼ Dios beetik k-muʼyaj. Ka xan tin kanaj maʼatech  u beetik Dios u muʼyaj máak tiʼ junpʼéel infiernoeʼ jach kiʼimakchaj in wóol tumen lelaʼ desde tin chichnil ku sajakkúunsiken.

Jach jatsʼuts tin wilil bix u nuʼuktik u kuxtal le j-Jaajkunajoʼob yéetel le baʼaxoʼob ku yaʼalik le Bibliaoʼ. Kex jeʼel baʼalak ka in waʼaltiʼob wa ka in beet tiʼobeʼ, mantatsʼ tu yeʼesoʼobten yaabilaj yéetel tsiikil.

Baʼax maas talamchaj teneʼ letiʼe in xulik in tuklik mix baʼal in biilaloʼ yéetel in pʼektikinbaoʼ. Le tuukul beyaʼ jach ku beetik in muʼyaj kex tsʼoʼok kaʼach in wokjaʼ yéetel in beetkinba j-Jaajkunajeʼ. Teneʼ in yaabiltmaj kaʼach Dios baʼaleʼ kin tuklik kaʼacheʼ letiʼeʼ mix bikʼin jeʼel u yaabiltik juntúul máax jeʼex tenaʼ.

Quince jaʼaboʼob okjaʼanaken ka kʼexpaj in tuukul. Tiʼ junpʼéel tsoltʼaan máansaʼab tu Najil Reino tiʼ u j-jaajkunajoʼob Jéeobaeʼ (Salón del Reino de los testigos de Jehová), le sukuʼunoʼ tu chʼaʼchiʼitaj Santiago 1:23 yéetel 24. Le versiculoʼoboʼ ku ketkoʼob u Tʼaan Dios yéetel junpʼéel néen tuʼux jeʼel u páajtal k-ilikba jeʼex u yilkoʼon Dioseʼ. Kin tuklik kaʼach wa le bix in wilkinbaoʼ letiʼe bix u yiliken xan Diosoʼ. Ka káajeʼ maʼ tin creertik wa u yaabiltmen Diosiʼ tumen yaʼab baʼaloʼob maʼ maʼalobtak in beetmiʼ.

Ka máan jujunpʼéel kʼiinoʼobeʼ tin xokaj junpʼéel teksto tu kʼexaj in kuxtal. Le tekstoaʼ Isaías 1:18, tuʼux ku yaʼalik: «Koʼoteneʼex utiaʼal k-utskíintik le baʼax uchaʼan ichiloʼonoʼ, kex jach chak a kʼebaneʼexeʼ yaan u saktal bey jeʼex le nieveoʼ». Lelaʼ bey ka u yaʼalten Jéeoba: «Koʼoten Vicky, utiaʼal k-utskíintik le baʼax uchaʼan ichiloʼonoʼ. In kʼaj óolech, in wojel le baʼaxoʼob maʼ maʼalobtak a beetmoʼ, in wojel baʼax yaan ta puksiʼikʼal, baʼaleʼ kex beyoʼ in yaabiltmech».

Le áakʼab jeʼeloʼ maʼ béeychaj in weenliʼ. Láayliʼ maʼ tin creertik wa u yaabiltmen Dioseʼ, baʼaleʼ káaj in tuukul tiʼ u kuxtal Jesús tu kʼuboʼ. Ka tin tsʼáaj cuentaeʼ Jéeobaeʼ jach chúukpaj u yóol u yáanten yéetel jejeláas bix tu yeʼesajten u yaabilaj. Le baʼax kin tuklik kaʼachoʼ bey ka in waʼal tiʼ Dioseʼ: «Mix yéetel tuláakal a yaabilaj jeʼel u páajtal a tupik in kʼebanoʼobeʼ. U kuxtal a Hijoeʼ maʼ tu páajtal u beetik u perdonartaʼal in kʼebanoʼob». Jach u jaajileʼ táan in mixbaʼalkúuntik kaʼach u kuxtal Jesús tu kʼuboʼ. Baʼaleʼ úuchik u káajal in tuukul tiʼ le nojoch siibal tu tsʼáajtoʼon Jéeobaoʼ, káaj in wuʼuyik u yaabiltmen.

LE UTSILOʼOB TSʼOʼOK U TAASIKTENOʼ: Bejlaʼeʼ maʼalob in wuʼuyikinba, kiʼimak in wóol yéetel maʼ saajkeniʼ. Maas maʼalob u binten yéetel in wíicham yéetel kiʼimak in wóol tumen le baʼax úuchtenaʼ jeʼel u yáantik uláakʼ máakoʼobeʼ. Cada kʼiin ku máaneʼ kin wuʼuyik maas naatsʼ yanen tiʼ Jéeoba.

«Núukaʼab in oración» (SERGEY BOTANKIN)

SÍIJ TU JAʼABIL: 1974

KAJAʼAN: RUSIA

KAʼACHEʼ: JACH UTS TU TʼAAN U PAAXIL HEAVY METAL

LE BIX KUXLIKEN KAʼACHOʼ: Líikʼen ichil junpʼéel familia jach óotsil tu kaajil Vótkinsk, láayliʼ letiʼe kaaj tuʼux síij xan le compositor jach kʼaj óolaʼan Piotr Ilič Chaikovski. In taataeʼ uts u modos kaʼachi baʼaleʼ jach ku káaltal le oʼolal mantatsʼ jach chiʼichnakoʼon ichil in wotoch.

Maʼ jach uts tin wich kaʼach in bin escuelaiʼ, yéetel ka máan jujunpʼéel jaʼaboʼobeʼ káaj in wuʼuyik bey minaʼan in biilaleʼ. Pʼáat maʼatech in tsikbal yéetel  mix máak tsʼoʼoleʼ jeʼel baʼalakeʼ ku beetik in tsʼíikil, jach ku talamtal ten kaʼach tak in bin xook. Jeʼex le ken kʼaʼabéetchajak in tsolik wa baʼax tu táan in wéet xookoʼobeʼ ku pʼaatal maʼ tu páajtal in tsolik mix le baʼaloʼob maas chéen chʼaʼabil u tsoʼololoʼ yéetel in yáax tsolmaj jach maʼalob tiʼ uláakʼ súutukiloʼoboʼ. Tu tsʼoʼokbal junpʼéel jaʼab le táan in xokik secundariaoʼ tsʼíibtaʼab tin boleta lelaʼ: «Yaʼab tʼaanoʼob maʼ u yojliʼ, maʼ tu páajtal u tsolik baʼax ku tuklik». Le baʼax tsʼíibtaʼabaʼ tu beetaj in wuʼuyik jach mix baʼalen. Ka tu beetaj in tuklik mix baʼal u biilal u seguer in kuxtal.

Tin táankelmileʼ káaj in wukʼik alcohol. Leloʼ ku beetik in wuʼuyikinba maʼalob, baʼaleʼ wa kin jach káaltaleʼ ku chiʼichnaktal in conciencia. Jach táaj lúub in wóol, yaan horaeʼ hasta ku pʼáatal maʼ tin jóokʼol tin wotoch yaʼab kʼiinoʼob yéetel káaj tak in tuklik in kíimskinba.

Le ka tu tsʼáajten 20 jaʼaboʼobeʼ tin kaxtaj junpʼéel baʼal utschaj tin wich: le heavy metaloʼ. Kin wuʼuyik kaʼacheʼ le paaxaʼ ku beetik in jach uʼuyikinba maʼalob, le oʼolal káaj in biskinba yéetel uláakʼ roqueroʼob, tin chaʼaj u chowaktal u tsoʼotsel in pool, káaj in usartik tuupoʼob yéetel káaj in vestirkinba jeʼex le máaxoʼob uts tin wich u paaxoʼoboʼ. Jujunpʼíitil ka káaj in beetik baʼaloʼob chéen minaʼan u cuentail, yéetel pʼáat séeb in pʼuʼujul, lelaʼ tu taasajten yaʼab talamiloʼob bey xan tiʼ in familia.

Táan kaʼach u kʼexpajal bix in modos. Tin tuklaj jeʼel u beetik u kiʼimaktal in wóol in wuʼuyik le paaxoʼobaʼ baʼaleʼ maʼ bey úuchikoʼ. Yéetel le ka tin wojéeltaj jujunpʼéel baʼaloʼob maʼ maʼalobtak ku beetik kaʼach le máaxoʼob jatsʼuts in wuʼuyik u paaxoʼoboʼ, lúub in wóol.

Tin kaʼa tuklaj in kíimsikinba, baʼaleʼ teʼ vezaʼ jach tu jaajil yaan in beetik kaʼachi. Baʼaleʼ in tuukul tiʼ bukaʼaj u yaabiltmen in maama yéetel tiʼ le baʼaloʼob u beetmaj tin woʼolaloʼ letiʼe baʼax beet maʼ in kíimsikinbaoʼ. Lelaʼ jach tu beetaj in muʼyaj tumen taak kaʼach in kíimil baʼaleʼ maʼ tu páajtal kaʼach in kíimsikinba.

Utiaʼal maʼ u seguer in tuklik leloʼ káaj in xokik libroʼob ich ruso. Junpʼéel tiʼ le librooʼ ku tʼaan tiʼ juntúul máax yaan u religión. Lelaʼ tu beetaj u taaktal in meyajtik Dios yéetel in wáantik in wéet máakil. Tin waʼalaj tiʼ Dios tuláakal baʼax kin wuʼuyik, junpʼéel baʼal mix juntéen in beet kaʼachi yéetel tin waʼalaj tiʼ ka u yáanten utiaʼal ka yanak u biilal in kuxtal. Ka tsʼoʼokeʼ jach maʼalob tin wuʼuyilinba. Baʼaleʼ jaʼakʼ in wóol tu yoʼolal le baʼax úuch ka tsʼoʼokoʼ: juntúul u j-jaajkunaj Jéeobaeʼ kʼoopnaj tin wotoch yéetel tu yaʼalajten wa jeʼel in xokik le Biblia tu yéeteloʼ. In waʼalikeʼ bey núukaʼab le payalchiʼ tin beetoʼ. Desde teʼ kʼiinaʼ káaj in wuʼuyik kiʼimak óolal ichil in kuxtal.

BIX TU KʼEXIL IN KUXTAL LE BIBLIAOʼ: Kex talamchaj teneʼ tin pulaj tuláakal baʼax yaan yil yéetel heavy metal. Baʼaleʼ kex beyoʼ láayliʼ jach kʼajaʼanten u paaxiloʼobeʼ. Cada ken máanaken teʼ tuʼuxoʼob ku paʼaxaloʼ ku taal tin tuukul baʼaloʼob kʼaastak. Chéen in kʼáat kaʼach tuukul tiʼe baʼaloʼob maʼalobtak táan in kanikoʼ, le oʼolal xuʼul in máan teʼ kúuchiloʼobaʼ. Tsʼoʼoleʼ le ken taakak in kʼaʼajsik le baʼaloʼobaʼ kin payalchiʼ yéetel kin kʼáat óoltik tiʼ Dios maʼ in beetik. Beyoʼ béeychaj u yantalten «le jeetsʼelil» ku taal tiʼ Diosoʼ, lelaʼ «maʼ tu páajtal u naʼataʼal tumen wíinik» (Filipenses 4:7).

Teʼ Bibliaoʼ tin kaneʼ tuláakal le cristianoʼoboʼ kʼaʼabéet u kaʼanskoʼob tiʼ uláakʼ máakoʼob baʼax ku creerkoʼob (Mateo 28:19, 20). Teneʼ tin tuklaj jach junpuliʼ maʼ kun béeytal in beetik lelaʼ, baʼaleʼ le baʼax kin kanik kaʼachoʼ ku taasikten jeetsʼelil yéetel kiʼimak óolal. In wojel kaʼach yaan máakoʼob kʼaʼabéet u kankoʼob u jaajil. Le oʼolaleʼ kex saajkeneʼ tin chʼaʼtuklaj in tsikbaltik tiʼ u maasil le baʼaxoʼob kin kanikoʼ. Leloʼ tu beetaj in wuʼuykinba maas maʼalob yéetel tu beetaj u pʼáatal tin tuukul le baʼax ku kaʼansik le Bibliaoʼ.

LE UTSILOʼOB TSʼOʼOK U TAASIKTENOʼ: Bejlaʼeʼ tsʼokaʼan in beel yéetel jach kiʼimak in wóol, tsʼoʼok xan u yantalten u páajtalil in wáantik uláakʼ máakoʼob jeʼex in kiik yéetel in maama utiaʼal u kankoʼob le baʼaxoʼob ku yaʼalik le Bibliaoʼ. In meyajtik Dios yéetel in wáantik uláakʼ máakoʼobeʼ tsʼoʼok u beetik u yantal u biilal in kuxtal.