Kʼeʼex u kuxtaloʼob tumen le Bibliaoʼ

¿BAʼAX beet u suut juntúul x-chʼúupal tiʼ le religión kaʼansaʼabtiʼ tumen u taataʼoboʼ? Koʼox chaʼik u tsolik letiʼ.

«Bejlaʼeʼ yaan u biilal in kuxtal» (LISA ANDRÉ)

SÍIJ TU JAʼABIL: 1986

KAJAʼAN: LUXEMBURGO

KAʼACHEʼ: MAʼATECH U YUʼUBIK TʼAAN

LE BIX KUXLIKEN KAʼACHOʼ: Líikʼen tu kaajil Bertrange, junpʼéel kaaj jach limpio, tuʼux óoliʼ minaʼan kʼasaʼanil yéetel maʼ jach yaan óotsililiʼ, le kaajaʼ naatsʼ yanik tiʼ Luxemburgo. Teen u maas chichnil tiʼ le cinco paalal yanchaj tiʼ in taataʼoboʼ. In taataʼobeʼ u j-jaajkunajoʼob Jéeoba (testigos de Jehová) yéetel desde t-chichnil tu yiloʼob u kaʼanskoʼobtoʼon le baʼaxoʼob ku yaʼalik le Bibliaoʼ.

Baʼaleʼ ka kʼuchen tin x-lóoʼbaynileʼ, joʼopʼ u pʼáatal maʼatech in jach creertik baʼax ku kaʼansik u j-Jaajkunajoʼob. Tumen maʼ tin beetaj mix baʼal utiaʼal in wilik wa jaaj bey xan wa maʼ le baʼaxoʼob xuʼul in creertikaʼ, pʼáat minaʼan in fe. In taataʼobeʼ tu beetoʼob tuláakal le ku páajtal utiaʼal in beetik tu kaʼatéen baʼax maʼalob, baʼaleʼ teneʼ maʼ tin wóotaj in kʼam le áantajaʼ. Letiʼobeʼ maʼ u yojloʼob kaʼachiʼ baʼaleʼ teneʼ joʼopʼ in jóokʼol yéetel táankelem paalaloʼob maʼatech u yuʼubikoʼob tʼaan. Teneʼ in kʼáat kaʼach in beet chéen baʼax in kʼáat jeʼex letiʼobeʼ. K-bin kaʼach tiʼ yaʼab fiestaʼob, ku yantal baʼax k-il kaʼach yéetel jeʼel máaxak k-kʼáateʼ, k-káaltal yéetel k-drogartikba. Jach uts tin tʼaan in biskinba kaʼach tu yéeteloʼob tumen kin tuklik kaʼacheʼ letiʼobeʼ jach yaantiʼob kiʼimak óolal ichil u kuxtaloʼob.

Baʼaleʼ u jaajileʼ maʼ kiʼimak in wóol kaʼachiʼ. Le kuxtal ku biskoʼob kaʼachoʼ minaʼan kaʼach u biilal: mix juntúul ku tuukul kaʼach tu yoʼolal le talamiloʼob ku aktáantik u maasil máakoʼoboʼ. Teen kaʼacheʼ kin chiʼichnaktal yoʼolal le baʼaloʼob kʼaastak ku yúuchul teʼ yóokʼol kaabaʼ. Le oʼolaleʼ ka máan kʼiineʼ jach deprimirnajen.

BIX TU KʼEXIL IN KUXTAL LE BIBLIAOʼ: Junpʼéel kʼiin, le yaanten 17 jaʼaboʼoboʼ, in maamaeʼ tu tsʼáaj cuenta jach luubul in wóol ka túun tu yaʼalajten ka in kaʼa kʼam u yáantaj le Bibliaoʼ. Tu yaʼalajten ka in wil in naʼatik le baʼax ku yaʼalik le Bibliaoʼ yéetel ka in wil wa in kʼáat kuxtal jeʼex u yaʼalikoʼ. Le baʼax tu yaʼalajtenaʼ tu beetaj in tuklik maʼalob baʼax ken in beete. Tin kʼamaj ka tsʼaʼabakten xook tumen in kiik Caroline yéetel in cuñado Akif. Letiʼeʼ tsʼokaʼaniliʼ u nojochtal ka tu beetuba j-Jaajkunajeʼ, le oʼolaleʼ jeʼel u  páajtal kaʼach in waʼaliktiʼ jach baʼax ku yúuchul teneʼ, lelaʼ junpʼéel baʼal jach kʼaʼanaʼan in wilik.

In wojel kaʼacheʼ le bix in kuxtaloʼ maʼ junpʼéel kuxtal ku páaʼtaʼal tiʼ juntúul j-Jaajkunajiʼ, baʼaleʼ kin tuklik kaʼacheʼ le baʼax kin beetkoʼ chéen tiʼ teen ku beetik kʼaas. Jeʼex úuchik u bin in xokik le Bibliaoʼ, kʼuchen in naʼateʼ le baʼaxoʼob kin beetkoʼ ku beetik u lúubul u yóol Jéeoba (Salmo 78:40, 41; Proverbios 27:11). Tin tsʼáaj cuenta xaneʼ yaan uláakʼ máaxoʼob kin beetik u lúubul u yóoloʼob.

Jeʼex úuchik u bin in xokik le Bibliaoʼ maas tin tsʼáaj cuenta de ke u Tʼaan Dios. Ichil le baʼaloʼob beet in tuukul beyaʼ, tiaʼan le profecíaʼob láaj béeychajoʼob jeʼex u yaʼalmil Dioseʼ. Tuláakal lelaʼ tu yáanten utiaʼal in kaʼa creertik le baʼaxoʼob xuʼul in creertik kaʼachoʼ.

Ka tu tsʼáaj junpʼéel jaʼab joʼopʼok in xokik le Bibliaoʼ, tin láakʼintaj in taataʼob u xíimbaltoʼob in sukuʼun, letiʼeʼ táan kaʼach u meyaj Alemania, tiʼ junpʼéel najil tuʼux ku nuʼuktik jejeláas meyajoʼob u j-jaajkunajoʼob Jéeoba. Tin wilaj jach kiʼimak u yóol. Le kiʼimak óolal yaan kaʼach tiʼaʼ letiʼe táan kaʼach in kaxtik tenoʼ. Jaʼakʼ xan in wóol ka tin kʼaj óoltaj le uláakʼ máaxoʼob ku meyajoʼob x-maʼ boʼolil teʼeloʼ. Maʼ beyoʼob kaʼach jeʼex le máaxoʼob kʼasaʼantakoʼob yéetel ku binoʼob tu paach u tsʼíibolaloʼob kin amigotkoʼob kaʼachoʼ. Maʼ yaʼab kʼiinoʼob máanak tiʼ leloʼ orarnajen tiʼ Dios ka tin waʼalajtiʼ tsʼoʼok in chʼaʼtuklik in meyajtik tuláakal u kʼiiniloʼob in kuxtal. 19 jaʼaboʼob yaanten ka okjaʼanajen utiaʼal in weʼesik tsʼoʼok in kʼubik in kuxtal tiʼ Jéeoba.

LE UTSILOʼOB TSʼOʼOK U TAASIKTENOʼ: Bejlaʼeʼ yaan u biilal in kuxtal. Jach ku kiʼimakkúuntik in wóol in kaʼansik tiʼ u maasil baʼax ku yaʼalik le Bibliaoʼ yéetel in wáantkoʼob utiaʼal ka u kʼaj óoltoʼob Jéeoba yéetel le baʼaxoʼob ken u beet maʼ kun xáantaloʼ. Tsʼoʼok xan u taasik utsiloʼob tiʼ in láakʼtsiloʼob tumen bejlaʼeʼ maʼatech in chiʼichnakkúuntikoʼob.

Yaʼab baʼaloʼob kʼaastak in beetmaj, baʼaleʼ kin wilik maʼ in jach tuukul tiʼ leloʼ. Maas kin wilik in tuklikeʼ Jéeobaeʼ juntúul Dios ku perdonar yéetel jach u yaabiltmen. Jach jaaj le baʼax ku yaʼalik Proverbios 10:22: «U kiʼ tʼaan Yuumtsileʼ ayikʼalil maʼ tu taasik kʼiʼinamil tu yéetel».

[Uláakʼ baʼax ku tsoʼolol teʼ táan juʼun 14]

«K-bin kaʼach tiʼ yaʼab fiestaʼob, ku yantal baʼax k-il kaʼach yéetel jeʼel máaxak k-kʼáateʼ, k-káaltal yéetel k-drogartikba»

[Uláakʼ baʼax ku tsoʼolol teʼ táan juʼun 15]

«Yaʼab baʼaloʼob kʼaastak in beetmaj, baʼaleʼ kin wilik maʼ in jach tuukul tiʼ leloʼ»