¿Kʼaʼabéet wa k-ojéeltik máax Jesús?

«Bíin a kʼaj óolteʼex le jaajoʼ, le jaaj túunoʼ bíin u jáalkʼabteʼex.» (JUAN 8:32)

LE Bibliaoʼ ku yaʼalik u jaajil utiaʼal u yáantkoʼon maʼ k-creertik baʼaloʼob maʼ jaajtak tu yoʼolal Jesús. Baʼaleʼ ¿jach wa kʼaʼanaʼan baʼaxoʼob k-creertik yoʼolal Jesús? Kʼaʼanaʼan. Jéeobaeʼ kʼaʼanaʼan u yilik bey xan Jesús. Le oʼolal toʼoneʼ unaj k-ilik bey junpʼéel baʼal jach kʼaʼanaʼaneʼ.

● ¿Baʼaxten kʼaʼanaʼan u yilik Jéeoba? Tumen «Jajal Dioseʼ yaakunaj» (1 Juan 4:8). Letiʼeʼ u kʼáat ka kuxlakoʼon ich kiʼimak óolal utiaʼal mantatsʼ. Jeʼex u yaʼalik Juan 3:16, «Jajal Dioseʼ tu sen yaabiltaj le yóokʼol kaabaʼ, ka tu tsʼáaj u juntúuliliʼ Paal, utiaʼal tuláakal le máax ku yoksik u yóol tiʼeʼ [...], ka yanak kuxtal minaʼan u xuul tiʼ». Jeʼex k-ilkoʼ Dioseʼ tu túuxtaj u Hijo way Luʼum utiaʼal u savartikoʼonoʼ. Beyoʼ tu tsʼáajtoʼon u páajtalil k-kuxtal minaʼan u xuul tiʼ junpʼéel paraíso way Luʼum, jeʼex u tukultmil Dios desde tu káajbaleʼ (Génesis 1:28). Dioseʼ u kʼáat u tsʼáa kuxtal minaʼan u xuul tiʼ tuláakal le máaxoʼob ku kankoʼob u jaajil yoʼolal u Hijooʼ yéetel ku beetkoʼob xan jeʼex tsʼoʼok u kankoʼoboʼ (Romailoʼob 6:23).

● ¿Baʼaxten kʼaʼanaʼan u yilik Jesús? Tumen letiʼeʼ u yaabiltmaj xan wíinik, jeʼex tu yeʼesil le ka tu kʼubaj u kuxtal t-oʼolaloʼ (Juan 15:13). Letiʼeʼ u yojel kaʼacheʼ chéen bey jeʼel u páajtal u salvartikoʼonoʼ (Juan 14:6). Le oʼolal u kʼáat ka u kʼam yaʼab máakoʼob u yutsil le u kuxtal tu kʼuboʼ. Utiaʼal lelaʼ tu yaʼalaj tiʼ u disipuloʼob ka u kʼaʼaytoʼob tuláakal tuʼux le baʼax u kʼáat Dios utiaʼal le Luʼumaʼ (Mateo 24:14; 28:19, 20).

● ¿Baʼaxten kʼaʼanaʼan k-ilik toʼon? Tuukulnen tiʼ le baʼaxoʼob maas kʼaʼanaʼan ichil a kuxtal jeʼex a toj óolal yéetel a familiaoʼ. ¿Máasaʼ techeʼ a kʼáat ka yanaktech toj óolal yéetel kiʼimak óolal junmúuchʼ yéetel a láakʼtsiloʼob? Úuchik u tsʼáaik u kuxtal Jesusoʼ, Jéeobaeʼ ku yaʼalik u tsʼáaik tiʼ toʼon toj óolal yéetel kuxtal minaʼan u xuul tiʼ junpʼéel túumben Luʼum tuʼux minaʼan muʼyajil (Salmo 37:11, 29; Apocalipsis 21:3, 4). ¿A kʼáat wa ka yanaktech junpʼéel kuxtal beyaʼ? Wa beyoʼ yaan jujunpʼéel baʼaloʼob unaj a beetik.

¿Kʼajaʼan wa tech le teksto chíikpaj tu káajbal le xookaʼ? Teʼeloʼ ku yaʼalik: «Bíin a kʼaj óolteʼex le jaajoʼ, le jaaj túunoʼ bíin u jáalkʼabteʼex». Le jaaj ku yaʼalikoʼ letiʼe u jaajil yoʼolal Jesusoʼ yéetel tiʼ bix u yáantaj utiaʼal u béeychajal le baʼax u tukultmaj Diosoʼ. Lelaʼ kʼaʼabéet k-ojéeltik tumen letiʼe baʼax ken u jáalkʼabtoʼon tiʼ le kuxtal yéetel tiʼ le kíimiloʼ. ¿A kʼáat wa a wojéelt u maasil yoʼolal Jesús? ¿A kʼáat wa a wojéelt bix jeʼel u páajtal a jóoʼsik u yutsil junmúuchʼ yéetel a familia tiʼ a kʼaj óoltik u jaajil yoʼolal Jesusoʼ? U j-jaajkunajoʼob Jéeobaeʼ (testigos de Jehová) jach jeʼel u kiʼimaktal u yóol u yáantkechoʼobeʼ.