Kʼeʼex u kuxtaloʼob tumen le Bibliaoʼ

¿BAʼAX áant juntúul máak suut teʼ religión tuʼux líiʼsaʼaboʼ? Juntúul xiʼipaleʼ, ¿bix úuchik u kaxtik le taatatsil jach ku tsʼíiboltik u yantaltiʼ kaʼachoʼ? Koʼox chaʼik u tsolkoʼob.

«Kʼaʼabéet in suut yiknal Jéeoba» (ELIE KHALIL)

SÍIJ TU JAʼABIL: 1976

KAJAʼAN: CHIPRE

KAʼACHEʼ: TU PʼATAJ YOTOCH

LE BIX KUXLIKEN KAʼACHOʼ: Chipre síijen, baʼaleʼ teʼ nojochchajen Australiaeʼ. In taataʼob kaʼacheʼ u j-jaajkunajoʼob Jéeoba (testigos de Jehová). Letiʼobeʼ tu yiloʼob u kaʼanskoʼobten in yaabilt Dios yéetel le baʼaxoʼob ku kaʼansik le Bibliaoʼ. Baʼaleʼ ka joʼopʼ in chʼaʼik in táankelmileʼ pʼáat maʼ tin wuʼuyik tʼaan. De áakʼabeʼ kin púutsʼul kaʼach yéetel in wéet paaliloʼob utiaʼal k-okoltik cocheʼob, yéetel mantatsʼ kin wokskinba tiʼ talamiloʼob.

Ka káajeʼ kin taʼakik baʼaxoʼob kin beetik tumen saajken u tsʼíikil in taataʼob, baʼaleʼ jujunpʼíitil ka lukʼ in saajkil. Tsʼoʼoleʼ joʼopʼ in biskinba yéetel máaxoʼob maas yaan u jaʼabiloʼob yéetel maʼ u yaabiltmoʼob Jéeobaiʼ. Letiʼobeʼ baʼaloʼob kʼaastak tu kaʼansoʼobten. Yoʼolal lelaʼ junpʼéel kʼiineʼ tin waʼalaj tiʼ in taataʼob maʼ taak u seguer in bin tu religionoʼobiʼ. Kex tu sen tsʼáaj u yóol u yáantenoʼobeʼ, maʼ tin beetaj u cuentailoʼobiʼ. ¡Jach lúub u yóoloʼob!

Tin pʼataj in wotoch yéetel joʼopʼ in drogartkinba. Káaj tak in pakʼik yéetel in konik yaʼab marihuana. Jach kʼaas bix in kuxtal, kin máan yéetel koʼoleloʼob yéetel yaʼab tiempo kin máansik teʼ discotecaʼoboʼ. Tsʼoʼoleʼ pʼáat séeb in pʼuʼujul. Ku beetik in pʼuʼujul in wuʼuyik u beetaʼal wa u yaʼalaʼal baʼaxoʼob in pʼeek. Yaan horaeʼ ku joʼopʼol in waʼalik baʼal wa tak in loxik le máax beetik in tsʼíikiloʼ. U jaajileʼ tin beetaj baʼaloʼob kaʼansaʼanten maʼ unaj u beetik juntúul cristianoiʼ.

BIX TU KʼEXIL IN KUXTAL LE BIBLIAOʼ: Yanchaj juntúul in amigo jach ku drogartkuba, chichan ka kíim u taata. Jach suuk k-tsikbal tak tsʼoʼok u yáakʼabtal. Yaʼab u téenel tu yaʼalajten taak u yilik u taata. Tumen desde tin chichnil kaʼansaʼanten yaan u kaʼa kuxtal le kimenoʼoboʼ, tin waʼalajtiʼeʼ Jesuseʼ tu kuxkíintaj le kimenoʼoboʼ yéetel tu yaʼalaj maʼ kun xáantal ken u kaʼa beete (Juan 5:28, 29). Kʼajaʼanten in waʼaliktiʼ: «Chéen tukulte, yaan a kaʼa ilik a taata, yéetel tuláakloʼoneʼ jeʼel u páajtal k-kuxtal tiʼ junpʼéel paraíso way Luʼumeʼ». Lelaʼ tu beetaj u jach péek u yóol.

 Yaan horaeʼ in amigoeʼ ku tʼaan tiʼ le u tsʼook kʼiinoʼoboʼ yéetel tiʼ le Trinidadoʼ. Teneʼ ku meyajten u Biblia utiaʼal in weʼesiktiʼ le tekstoʼob ku kaʼanskoʼob u jaajil yoʼolal Jéeoba, Jesús yéetel u tsʼook kʼiinoʼoboʼ (Juan 14:28; 2 Timoteo 3:1-5). Le ken joʼopʼok in tsikbaltiktiʼ tu yoʼolal Jéeobaeʼ, maas kin tuukul xan tiʼ Jéeoba.

Jujunpʼíitil úuchik u bin u jóokʼol u semillail le jaaj pakʼaʼan tin puksiʼikʼal tumen in taataʼoboʼ. Yaan horaeʼ le tiaʼanen tiʼ junpʼéel fiesta táan in drogartkinba yéetel in amigoʼoboʼ, ku joʼopʼol in tuukul tiʼ Jéeoba. Kex yaʼab tiʼ in amigoʼob ku yaʼalikoʼob u yaabiltmoʼob Diosoʼ, le baʼaxoʼob ku beetkoʼoboʼ ku yeʼesikeʼ maʼ jaajiʼ. Tumen maʼ in kʼáat in beetinba kaʼapʼéel ichil jeʼex letiʼoboʼ, tin wilaj kʼaʼabéet in suut yiknal Jéeoba.

U jaajileʼ chéen chʼaʼabil u yojéeltik máak baʼax unaj u beetik, baʼaleʼ maʼ chéen chʼaʼabil u beetaʼaliʼ. Kex beyoʼ yaan jujunpʼéel baʼaloʼob maʼ talamchajteniʼ. Jeʼex in pʼatik in drogartkinbaoʼ yéetel u xuʼulul in biskinba yéetel in amigoʼoboʼ. Bey túunoʼ káaj in xokik le Biblia yéetel juntúul anciano teʼ múuchʼuliloʼ.

Baʼaleʼ yaan baʼaloʼob jach talamchaj in pʼatik, jeʼex u xuʼulul in séeb pʼuʼujuloʼ. Yaan kʼiineʼ ku chan xuʼulul, baʼaleʼ kin kaʼa lúubuliʼ. Le ken úuchukten beyaʼ jach ku lúubul in wóol yéetel kin wuʼuyik mix baʼal in biilal. Kex jach luubul in wóoleʼ tin chʼaʼtuklaj in tʼaan yéetel le j-Jaajkunaj tsʼáaikten xookoʼ. Tumen sen chúukaʼan u yóol yéetel jach jatsʼuts u modoseʼ, jach tu yáanten. Juntéenjeakeʼ tu yaʼalajten ka in xok le revista La Atalaya ku tʼaan tiʼ u chúukpajal u yóol máak u beet wa baʼaxoʼ. * T-xakʼaltaj baʼaxoʼob jeʼel u páajtal in beetik utiaʼal maʼ sen in pʼuʼujuleʼ. Yéetel le baʼax tu yaʼalaj le revista bey xan in orar tiʼ Jéeobaoʼ, jujunpʼíitil ka tin pʼataj in sen pʼuʼujuloʼ. Tu mesil abril tiʼ u jaʼabil 2000 okjaʼanajen bey juntúul j-jaajkunaj tiʼ Jéeobaeʼ. ¡Jach kiʼimakchaj u yóol in taataʼob!

LE UTSILOʼOB TSʼOʼOK U TAASIKTENOʼ: Bejlaʼeʼ yaanten jeetsʼelil yéetel maʼalob in conciencia, tumen maʼatech in drogartkinba mix tech in wokskinba yéetel koʼoleloʼob. Bejlaʼeʼ jeʼel baʼalak ka in beet, jeʼex in meyaj, in bin muchʼtáambal wa in náaysik in wóoleʼ kin wuʼuyik maas kiʼimak in wóol yéetel yaan u biilal in kuxtal.

Kin tsʼáaik u graciasil tiʼ Jéeoba tu yoʼolal le taatatsiloʼob tu tsʼáajtenoʼ, tumen letiʼobeʼ mix juntéen tu tukloʼob wa tsʼoʼokten beyoʼ. Kin tuukul xan tiʼ le baʼax tu yaʼalaj Jesús tsʼíibtaʼan tiʼ Juan 6:44: «Letiʼe Taata túuxtmilenoʼ, le oʼolaleʼ mix máak jeʼel u páajtal u taal tin wiknal wa maʼ letiʼ natsʼikeʼ». Jach ku kiʼimaktal in wóol tumen tsʼoʼok in suut yiknal Jéeoba; letiʼ kaʼa natsʼen tu yiknal.

«Kin tsʼíiboltik u yantal in taata» (MARCO ANTONIO ALVAREZ SOTO)

SÍIJ TU JAʼABIL: 1977

KAJAʼAN: CHILE

KAʼACHEʼ: KU PAXIK DEATH-METAL

 LE BIX KUXLIKEN KAʼACHOʼ: In maama líiʼsen Punta Arenas, junpʼéel kaaj jach tranquilo yaan tu jáal u jaʼil Magallanes, óoliʼ tu noojolil América. Cinco jaʼaboʼob yaanten ka tu pʼatuba in taata yéetel in maama, lelaʼ tu beetaj in wuʼuyikinba jach tin juunal. Kin tsʼíiboltik kaʼach u yantal in taata.

In maamaeʼ ku xokik le Biblia yéetel u j-jaajkunajoʼob Jéeobaoʼ yéetel ku bisken kaʼach teʼ muchʼtáambaloʼob ku beetaʼal teʼ Najil Reinooʼ. Baʼaleʼ teneʼ in pʼeek in bin. Teʼ bejoʼ ku joʼopʼol in kʼuuxil. Tin xulaj in bin teʼ muchʼtáambaloʼob ka tu tsʼáajten 13 jaʼaboʼoboʼ.

Teʼ kʼiinoʼob jeʼeloʼ táaj jatsʼuts in wuʼuyik paax, yéetel tin tsʼáaj cuentaeʼ jach maʼaloben utiaʼal leloʼ. Ka tu tsʼáajten 15 jaʼaboʼobeʼ teneʼ kin paxik heavy-metal yéetel death-metal tiʼ fiestaʼob, yéetel cantinaʼob. Kin biskinba kaʼach yéetel máakoʼob jach yojloʼob paax, leloʼ tu beetaj u maas utstal tin wich le música clásicaoʼ. Bey túunoʼ káaj in bin tiʼ junpʼéel tuʼux ku kaʼansaʼal paax. Ka tu tsʼáajten 20 jaʼaboʼobeʼ, binen tu noj kaajil Santiago utiaʼal in maas kaʼankuntik in xook. Le táan in xookoʼ láayliʼ kin paxik heavy-metal yéetel death-metal yéetel jejeláas bandaʼob.

Kex beyoʼ láayliʼ kin wuʼuyikinba jach tin juunaleʼ. Utiaʼal in tuʼubsik baʼax ku yúuchulteneʼ, kin káaltal yéetel kin drogartkinba yéetel in wéet paaxoʼoboʼ. Letiʼobeʼ kin wilkoʼob kaʼach bey in láakʼtsiloʼobeʼ. Jach kʼaas in modos, yéetel lelaʼ chíikaʼan u yilaʼal: túul boox in vestirtkinba, nuuk in meʼex yéetel jach chowak u tsoʼotsel in pool.

Mantatsʼ kin wokskinba tiʼ baʼateloʼob yoʼolal bix in modos, yéetel yaanten talamil yéetel le policíaoʼ. Junpʼéel kʼiineʼ, junjaats máakoʼob ku konkoʼob drogaeʼ joʼopʼ u molestartikoʼon. Tumen in wukʼmaj teʼ kʼiin jeʼeloʼ, tin wóotaj in loxoʼob, baʼaleʼ letiʼobeʼ tu loʼoloxenoʼob yéetel tu kiinbesoʼob tak in kamaʼach.

Baʼaleʼ le baʼax maas yaachaj tin wóoloʼ, letiʼe baʼax tu beetaj in amigoʼoboʼ. Junpʼéel kʼiineʼ tin wojéelteʼ in noviaeʼ tsʼoʼok u máan yaʼab jaʼaboʼob joʼopʼok u tusiken yéetel juntúul in amigo, tsʼoʼoleʼ u maasil in amigoʼoboʼ u yojloʼob, baʼaleʼ maʼ tu yaʼaloʼobteniʼ. ¡Jach yaachaj tin wóol!

Suunajen Punta Arenas tu kaʼatéen yéetel káaj in kaʼansik paax yéetel in paxik violonchelo. Tsʼoʼoleʼ seguernaj in grabar yéetel bandaʼob ku paxkoʼob heavy-metal yéetel death-metal. Teʼ kʼiinoʼoboʼ tin kʼaj óoltaj Sussan, juntúul x-kiʼichpan chʼúupal, ka kajlajen tu yéetel. Ka máan kʼiineʼ Sussaneʼ, tu yojéelteʼ u maamaeʼ ku creertik u kaʼansajil le Trinidadoʼ, yéetel tu yileʼ teneʼ maʼatech in creertik. Le oʼolal letiʼeʼ tu yaʼalajten: «¿Máakalmáak túun u jaajil?». Tin waʼalajtiʼeʼ maʼ jaaj le kaʼansaj jeʼeloʼ, yéetel kex in wojel maʼ tu páajtal in weʼesiktiʼ yéetel le Bibliaoʼ, in wojel máax jeʼel u beetkeʼ. Tin waʼalajtiʼeʼ u j-jaajkunajoʼob Jéeobaeʼ jeʼel u yeʼeskoʼob u jaajil tiʼ yéetel le Bibliaoʼ. Bey túunoʼ tin beetaj junpʼéel baʼal tsʼoʼokiliʼ u máan kʼiin in beete: orarnajen tiʼ Dios utiaʼal in kʼáatik u yáantaj.

Jujunpʼéel kʼiinoʼob tsʼoʼokok lelaʼ, tin wilaj juntúul máak bey in wóol in kʼaj óoleʼ, ka tin kʼáatajtiʼ wa u j-jaajkunaj Jéeoba. Kex chan sajakchaj yoʼolal bixeneʼ, tu núukajten le baʼaxoʼob tin kʼáatajtiʼ  tu yoʼolal le muchʼtáambaloʼob ku beetaʼal teʼ Najil Reinooʼ. Tin tsʼáaj cuentaeʼ lelaʼ letiʼe bix núukaʼabik in oracionoʼ. Binen tiʼ junpʼéel muchʼtáambal teʼ Najil Reinooʼ, ka kulajen paachil utiaʼal maʼ in jach ilaʼal. Baʼaleʼ yaʼab máaxoʼob kʼaj óolten, tumen tin chan paalileʼ teʼ kin bin kaʼachoʼ. Jach kiʼimakchaj u yóoloʼob úuchik u yilkenoʼob, tu méekʼenoʼob yéetel yaabilaj, teʼ súutukoʼ tin wuʼuyaj junpʼéel nojoch jeetsʼelil. Tin wuʼuyaj bey suut tin beetaj tin wotocheʼ. Le ka tin wilaj le j-Jaajkunaj tsʼaamilten xook tin chichniloʼ, tin waʼalajtiʼ ka u kaʼa tsʼáaten xook.

BIX TU KʼEXIL IN KUXTAL LE BIBLIAOʼ: Junpʼéel kʼiineʼ tin xokaj Proverbios 27:11, tuʼux ku yaʼalik: «In paal, yanak a naʼat, kiʼimakkúunt u yóol in puksiʼikʼal». Jach tu péeksaj in wóol ka tin naʼateʼ kex kʼeban juntúul máakeʼ jeʼel u páajtal u kiʼimakkúuntik u yóol Dioseʼ. Bey úuchik in tsʼáaik cuenta Jéeoba le taatatsil kin tsʼíiboltik kaʼach u yantaltenoʼ.

In kʼáat in beet kaʼach baʼax u kʼáat Jéeoba, baʼaleʼ joʼopʼ in sen drogartkinba yéetel in káaltal ich yaʼab jaʼaboʼob. Tin naʼataj le baʼax tu kaʼansaj Jesús tiʼ Mateo 6:24, tuʼux ku yaʼalik «mix máak jeʼel u páajtal u meyajtik kaʼatúul tsʼuuloʼobeʼ». Le táan in wilik in kʼexik in kuxtaloʼ, jach tu yáanten le baʼax ku yaʼalik 1 Corintios 15:​33: «U biskuba máak yéetel máaxoʼob kʼasaʼanoʼobeʼ ku kʼaskúuntik u maʼalob modos máak». Tin wileʼ wa ku seguer in bin teʼ kúuchiloʼob yéetel ku seguer in biskinba yéetel in amigoʼoboʼ, maʼ kun páajtal in pʼatik le baʼaloʼob kʼaastak kin beetkoʼ. Le tsolnuʼukoʼob ku tsʼáaik le Bibliaoʼ juntaatsʼ u yeʼesikeʼ: kʼaʼabéet in náachtal tiʼ le baʼaxoʼob kʼaastak utiaʼal in pʼatkoʼ (Mateo 5:30).

Tumen táaj jatsʼuts in wuʼuyik le paaxoʼ, jach talamchaj in pʼatik le heavy-metaloʼ. Baʼaleʼ yéetel u yáantaj in amigoʼob teʼ múuchʼuliloʼ páajchaj in pʼatik. Tin xulaj in káaltal yéetel in drogartkinba, tin kʼosaj in pool, tin tsʼikaj in meʼex yéetel tin xulaj in takik nookʼoʼob túul boox. Le ka tin waʼalaj tiʼ Sussan taak in kʼosik u tsoʼotsel in pooleʼ, jelaʼan tu yuʼubil, yéetel tu yaʼalaj: «Yaan in bin ta wéetel teʼ Najil Reinooʼ. Taak in wilik baʼax ku beetaʼaliʼ». Jatsʼuts tu yilil yéetel maʼ xáanchaj ka káaj u xokik le Bibliaoʼ. Maʼ xáanchajeʼ ka tsʼoʼok k-beel, yéetel tu jaʼabil 2008, okjaʼanajoʼon bey u j-jaajkunajoʼon Jéeobaeʼ. Bejlaʼeʼ kiʼimak k-óol táan k-múul meyajtik Jéeoba yéetel in maama.

LE UTSILOʼOB TSʼOʼOK U TAASIKTENOʼ: Tin pʼataj junpʼéel yóokʼol kaab ku tsʼáaik bin kiʼimak óolal yéetel amigoʼob ku traicionartikoʼob máak. Láayliʼ uts tin wich le paaxoʼ, baʼaleʼ kin yéeyik baʼax paaxil. Le baʼax úuchtenoʼ ku meyajten utiaʼal in wáantik in láakʼtsiloʼob yéetel uláakʼ máakoʼob, maases le táankelmoʼoboʼ. Taak in wáantik u yiloʼobeʼ, jaaj jatsʼuts u yilaʼal le baʼaxoʼob yaan teʼ yóokʼol kaabaʼ, baʼaleʼ ken tsʼoʼokkeʼ ka tsʼáaik cuentaeʼ chéen «basura» (Filipenses 3:8).

Úuchik in natsʼkinba tiʼ Dioseʼ, tin kaxtaj maʼalob amigoʼob teʼ múuchʼulil tuʼux yaan yaabilaj yéetel jeetsʼeliloʼ. Baʼaleʼ u maas maʼalobileʼ tsʼoʼok in kaxtik le taatatsil kin tsʼíiboltik u yantaltenoʼ: Jéeoba.

[Tsolajil]

[U tsolajil le foto yaan te táan juʼun 13]

«Tsʼoʼok in suut yiknal Jéeoba; letiʼ kaʼa natsʼen tu yiknal»