Tsikbal yéetel juntúul j-Jaajkunaj: Jesuseʼ ¿Dios wa?

U J-JAAJKUNAJOʼOB JÉEOBAEʼ (testigos de Jehová), uts tu tʼaan u tsikbaltikoʼob tiʼ u vecinoʼob baʼax ku kaʼansik le Bibliaoʼ. ¿Yaan wa baʼax taak a wojéeltik tiʼ le Bibliaoʼ? ¿Yaan wa baʼax taak a wojéeltik tiʼ jujunpʼéel baʼax ku beetik wa ku creertik le j-Jaajkunajoʼoboʼ? Wa yaaneʼ, jeʼel u páajtal a kʼáatiktiʼob ken a kaʼa iloʼobeʼ. Letiʼobeʼ jach jeʼel u yutstal tu tʼaan u tsolkoʼobtecheʼ.

Utiaʼal k-ilik bix le tsikbal ku beetik le j-Jaajkunajoʼoboʼ, koʼox tuklikeʼ juntúul j-Jaajkunaj ku kʼaabaʼtik Carmeneʼ ku xíimbaltik juntúul koʼolel ku kʼaabaʼtik Susana.

¿Jaaj wa maʼatech a creertikeʼex Jesús?

Susana: U pastoril in iglesiaeʼ ku yaʼalikeʼ teʼexeʼ maʼatech a creertikeʼex Jesús. ¿Jaaj wa?

Carmen: U jaajileʼ k-creertik Jesús. Toʼoneʼ k-creertikeʼ utiaʼal ka k-salvartbaeʼ kʼaʼabéet k-tsʼáaik k-fe tiʼ letiʼ.

Susana: Teneʼ bey xan in creertik.

Carmen: Jeʼeloʼ, leloʼ junpʼéel baʼax tu kaʼatúulaloʼon k-creertik. Áan jaaj, in kʼaabaʼeʼ Carmen, ¿kux teech?

Susana: Teneʼ Susana.

Carmen: Jach kiʼimak in wóol in kʼaj óoltikech, Susana. Maʼ xaaneʼ techeʼ taak a wojéeltik baʼaxten le máakoʼoboʼ ku yaʼalikoʼob maʼatech k-creertik Jesús, kex u jaajileʼ k-creertik.

Susana: Jaaj, jach letiʼe baʼax taak in wojéeltikoʼ.

Carmen: Kex jach yaan k-fe tiʼ Jesuseʼ, maʼatech k-creertik tuláakal baʼax ku yaʼalaʼal tu yoʼolal.

Susana: ¿Bey baʼax túuneʼ?

Carmen: Yaan máax aʼalikeʼ, Jesuseʼ chéen bin juntúul máak uts, baʼaleʼ toʼoneʼ maʼ bey k-tuklikiʼ.

Susana: Bey xan teen.

Carmen: Jeʼeloʼ, leloʼ uláakʼ baʼax tu kaʼatúulaloʼon de acuerdoʼon. Baʼaleʼ yaan uláakʼ ejemplo: toʼoneʼ maʼatech t-kʼamik le kaʼansajoʼob ku bin tu contra le baʼaxoʼob tu kaʼansaj Jesús yoʼolal letiʼ yéetel yoʼolal u Taataoʼ.

Susana: ¿Tiʼ baʼax ka tʼaan?

Carmen: Tiʼ le baʼax ku kaʼansik yaʼab religionoʼoboʼ, ku yaʼalikoʼobeʼ Jesuseʼ Dios bin. Maʼ xaaneʼ letiʼe baʼax xan kaʼansaʼantechoʼ.

Susana: Jaaj, letiʼ. In pastoreʼ ku yaʼalikeʼ Dios yéetel Jesuseʼ juntúuliliʼob.

Carmen: Utiaʼal k-kanik u jaajileʼ, ¿maʼ wa maas maʼalob ka k-xakʼalt le baʼax tu yaʼalaj Jesusoʼ?

Susana: In tuklikeʼ, letiʼe baʼax unaj k-beetkoʼ.

¿Baʼax tu kaʼansaj Jesús?

Carmen: Koʼox xokik junpʼéel teksto jeʼel u yáantkoʼon k-naʼateʼ. Ilawil baʼax ku yaʼalik Juan 6:38. Jesuseʼ tu yaʼalaj: «Tumen teneʼ maʼ lukʼen kaʼan ka taalaken in beet baʼax in kʼáatiʼ, baʼaleʼ utiaʼal in beet baʼax u kʼáat le máax túuxtenoʼ». ¿Máasaʼ lelaʼ óoliʼ jelaʼan wa Jesuseʼ letiʼe Diosoʼ?

 Susana: ¿Baʼax a kʼáat a waʼale?

Carmen: Ile, Jesuseʼ tu yaʼaleʼ maʼ éem way Luʼum utiaʼal ka u beet baʼax u kʼáat letiʼiʼ.

Susana: Jaaj a tʼaan, letiʼeʼ tu yaʼaleʼ éem u beet baʼax u kʼáat le máax túuxtoʼ.

Carmen: Baʼaleʼ wa Dios Jesuseʼ, ¿máax túun túuxte? Yéetel ¿baʼaxten unaj u yuʼubik u tʼaan yéetel u beetik baʼax u kʼáat?

Susana: Tsʼoʼok in naʼatik baʼax a kʼáat a waʼale. Baʼaleʼ maʼ in creertik wa le versiculoaʼ táan u yeʼesik maʼ Dios Jesusiʼ.

Carmen: Maʼalob ka k-chʼaʼ en cuenta uláakʼ baʼax tu yaʼalaj Jesús. Lelaʼ tiaʼan teʼ capítulo 7 tiʼ Juanoʼ. ¿Jeʼel a xokik le versículo 16?

Susana: Jeʼeleʼ. «Jesuseʼ tu núukajtiʼob: In kaʼansajeʼ maʼ in tiaʼaliʼ baʼaleʼ u tiaʼal le máax túuxtenoʼ.»

Carmen: Diosboʼotik. Jeʼex ta xokiloʼ, ¿tu kaʼansaj wa Jesús chéen baʼaxoʼob ku tuklik?

Susana: Maʼatech, letiʼeʼ tu yaʼaleʼ le baʼax ku kaʼansikoʼ u tiaʼal le máax túuxtoʼ.

Carmen: Jach beyoʼ. Jeʼeloʼ, ¿máax túun túuxt Jesús? Yéetel ¿máax aʼaltiʼ le baʼaxoʼob tu kaʼansoʼ? ¿Máasaʼ ku páaʼtaʼal juntúul máax maas nojoch tiʼ letiʼ? Jeʼex k-ojliloʼ le máax ku tusbeloʼ maas nojoch tiʼ le máax ku tusbeltaʼaloʼ.

Susana: ¡Mix juntéen in xokmaj kaʼach le versiculoaʼ!

Carmen: Tuukulnen xan tiʼ baʼax ku yaʼalik Jesús teʼ Juan 14:28: «Tsʼoʼok a wuʼuyikeʼex in waʼalik táan in bin yéetel yaan in suut utiaʼal ka yanaken ta wéeteleʼex tu kaʼatéen. Wa tu jaajil a yaabiltmaeneʼexeʼ tsʼoʼok kaʼach u kiʼimaktal a wóoleʼex le ka ta wojéeltajeʼex táan in bin tiʼ le Taataoʼ, tumen letiʼeʼ maas nojoch tiʼ teen». Jeʼex u yeʼesik le versiculoaʼ, ¿bix u yilik Jesús le Taataoʼ?

Susana: Letiʼeʼ tu yaʼaleʼ le Taataoʼ maas nojoch tiʼ letiʼ. In tuklikeʼ, ku yilik bey u nojchileʼ.

Carmen: Jach beyoʼ. Beoraaʼ koʼox xokik Mateo 28:18. Teʼelaʼ Jesuseʼ ku yaʼalik tiʼ u disipuloʼob: «Tiʼ teen tsʼaʼan tuláakal páajtalil kaʼan yéetel Luʼum». ¿Tiaʼalaj wa deporsi tiʼ letiʼ yaan tuláakal páajtalil?

Susana: Maʼatech, baʼaxeʼ tiaʼalaj tsʼaabil beetaʼabiktiʼ.

Carmen: Baʼaleʼ wa Jesús Dioseʼ, ¿bix jeʼel u páajtal u tsʼaʼabal páajtalil tiʼeʼ? Yéetel ¿máax tsʼáatiʼ?

Susana: Mmm. Leloʼ míin unaj in maas tuklik.

¿Tiʼ máax kaʼach ku orar?

Carmen: Yaan uláakʼ baʼax chan jelaʼan wa Jesuseʼ Dios.

Susana: ¿Baʼax túuniʼ?

Carmen: Letiʼe baʼax ku yaʼalik le Biblia le ka okjaʼanaj Jesusoʼ. Koʼox kaxtik Lucas 3:21, 22. ¿Jeʼel wa a xokikeʼ?

Susana: «Maʼiliʼ úuchuk le jeʼelaʼ, [le] táan u tsʼáaik okjaʼ Juan tiʼ tuláakal le máakoʼoboʼ, taal xan Jesús ka tsʼaʼab okjaʼ tiʼ, [mientras] túun táan u [orareʼ], le kaʼanoʼ jeʼekʼabchaji. Le túun le [espíritu santooʼ] éem tu yóokʼol bey juntúul palomaeʼ, ilaʼabi yéetel uʼuyaʼab u juum tʼaan teʼ kaʼanoʼ, táan u yaʼalik: Teech in yaabilaj Paal, jach kiʼimak in wóol ta woʼolal».

Carmen: ¿Ta wuʼuyaj wa baʼax ku beetik Jesús le táan u yokjaʼoʼ?

Susana: Jaaj, táan kaʼach u orar.

Carmen: Beyoʼ. Jeʼeloʼ, wa Dios Jesuseʼ, ¿tiʼ máax táan kaʼach u orar?

Susana: Jaaj a tʼaan. Yaan in kʼáatik tiʼ in pastor.

Carmen: Uláakʼ baʼax unaj u chʼaʼabal en cuentaeʼ, le ka tsʼoʼok u jóokʼol Jesús ichil le jaʼoʼ yaan máax tʼaanaj desde teʼ kaʼanoʼ. ¿Ta wuʼuyaj wa baʼax tu yaʼalaj?

Susana: Tu yaʼaleʼ Jesuseʼ u Paal, jach u yaabiltmaj yéetel jach kiʼimak u yóol tu yoʼolal.

Carmen: Jach maʼalob ta núukil. Baʼaleʼ wa Dios Jesuseʼ, ¿máax túun le tʼaanaj desde teʼ kaʼanoʼ?

Susana: Mix juntéen in tukult kaʼach leloʼ.

 ¿Baʼaxten ku yaʼalaʼaltiʼob «Taata» yéetel «Hijo»?

Carmen: Yaan uláakʼ baʼax kʼaʼabéet k-ojéeltik. Tsʼoʼok xokikeʼ le ken tʼaanak Jesús tiʼ Dioseʼ ku yaʼalikeʼ u Taata yaan teʼ kaʼanoʼ. Le ka okjaʼanaj Jesuseʼ, jóokʼ junpʼéel tʼaan teʼ kaʼanoʼ ka tu yaʼaleʼ u Hijo. Tak Jesuseʼ tu yaʼaleʼ letiʼeʼ u Hijo Dios. Jeʼex techeʼ wa a kʼáat a tsolten yaan kaʼatúul máakoʼob jach igualoʼob tiʼ junpʼéel familiaeʼ, ¿tiʼ máaxoʼob jeʼel a tʼaaneʼ?

Susana: Yaan in tʼaan tiʼ kaʼatúul sukuʼuntsiloʼob.

Carmen: Jach beyoʼ, maʼ xaaneʼ yaan a tʼaan tiʼ kaʼatúul gemeloʼob. Baʼaleʼ Jesuseʼ le ka tʼaanaj tiʼ Dioseʼ tu yaʼaleʼ u Taata, yéetel le ka tʼaanaj tiʼ letiʼeʼ tu yaʼaleʼ Hijo. ¿Baʼax a tuklik tu yóotaj u yaʼal Jesús?

Susana: Tsʼoʼok in naʼatik. Jesuseʼ táan kaʼach u tʼaan tiʼ juntúul máak maas yaan u jaʼabil yéetel u páajtalil tiʼ uláakʼ juntúuloʼ.

Carmen: Jach beyoʼ. Techeʼ ta waʼaleʼ wa ka tʼaanakech tiʼ kaʼatúul máakoʼob jach igualoʼobeʼ jeʼel u meyajtech u ejemploil kaʼatúul sukuʼuntsiloʼobeʼ. Jeʼeloʼ, Jesús le maas nojoch maestrooʼ, wa u kʼáat kaʼach u yaʼal igual yéetel Dioseʼ, ¿maʼ wa jeʼel kaʼach u meyaj le ejemplo tiʼoʼ, wa u kaxtik uláakʼ bix maas maʼalob jeʼel u yaʼalikeʼ?

Susana: In tuklikeʼ jeʼeleʼ.

Carmen: Baʼaleʼ tiʼ letiʼeʼ meyajnaj le tʼaan Taata yéetel Hijo utiaʼal u tʼaan tiʼ Dios yéetel tiʼ letiʼoʼ.

Susana: Jaaj, maʼ in tukultmaj kaʼach lelaʼ.

¿Baʼax tu kaʼansaj u yáax disipuloʼob Jesús?

Carmen: Wa yaantech u súutukileʼ, táanil tiʼ in bineʼ yaan uláakʼ baʼax in kʼáat in tsoltech yoʼolal Jesús.

Susana: Maʼalob, jeʼel in wuʼuyikech junsúutuk maaseʼ.

Carmen: Wa Dios Jesuseʼ, ¿maʼ wa jeʼel kaʼach u yaʼalaʼal tumen u disipuloʼobeʼ?

Susana: In tuklikeʼ jeʼeleʼ.

Carmen: Baʼaleʼ le Bibliaoʼ maʼatech u yaʼalik wa le disipuloʼoboʼ tu kaʼansoʼob leloʼ. Koʼox ilik baʼax tu tsʼíibtaj Pablo, juntúul tiʼ le máaxoʼob yáax tsaypacht Jesusoʼ. Teʼ Filiposiloʼob 2:9 ku tsolik baʼax tu beetaj Dios le tsʼoʼok u kíimil yéetel u kaʼa kuxtal Jesusoʼ: «Le oʼolaleʼ Jajal Dioseʼ tu tsʼáaj le maas kaʼanal nojbeʼenil tiʼoʼ, yéetel junpʼéel kʼaabaʼ yaan tu yóokʼol tuláakal kʼaabaʼ». Jeʼex u yaʼalik le tekstoaʼ, ¿baʼax tu tsʼáaj Dios tiʼ Jesús?

Susana: Ku yaʼalikeʼ tu tsʼáaj le maas kaʼanal nojbeʼenil tiʼoʼ.

Carmen: Beyoʼ. Baʼaleʼ wa táanil tiʼ u kíimil Jesús igual yéetel Dios yéetel ku tsʼoʼokol ku tsʼaʼabal junpʼéel puesto maas nojoch tiʼ tumen Dioseʼ, ¿maʼ wa táan u pʼáatal maas kaʼanal yanil tiʼ Diosiʼ? Tsʼoʼoleʼ ¿yaan wa máax maas kaʼanal yanil tiʼ Dios?

Susana: Leloʼ maʼ.

Carmen: Yéetel tuláakal le baʼaxoʼob tsʼoʼok k-tsikbaltikaʼ, ¿jeʼel wa waʼalik de ke le Bibliaoʼ ku kaʼansikeʼ Jesuseʼ Dios?

Susana: Maʼ, in waʼalikeʼ maʼ. Baʼaxeʼ ku yaʼalikeʼ letiʼeʼ u Hijo Dios.

Carmen: Jach beyoʼ. Baʼaleʼ leloʼ maʼ u kʼáat u yaʼal wa k-taasik mix baʼalil Jesusiʼ. Baʼaxeʼ k-creertikeʼ le úuchik u kíimil bey Mesíaseʼ tu jeʼekʼabtaj u bejil utiaʼal u salvarkuba máak.

Susana: Teneʼ kin creertik xan leloʼ.

Carmen: Beoraaʼ, maʼ xaaneʼ ka tuklik baʼax jeʼel u páajtal k-beetik utiaʼal k-agradecertik tiʼ Jesús le baʼax tu beetaj t-oʼolaloʼ. *

Susana: Jaaj, yaan kʼiineʼ kin tuukul tiʼ leloʼ.

Carmen: Wa uts ta tʼaaneʼ jeʼel in suut tuláakʼ kʼiin utiaʼal k-ilik baʼax ku yaʼalik le Biblia yoʼolal leloʼ. ¿Kulaʼanech wa tuláakʼ semana kex walkilaʼ?

Susana: Jaaj, kulaʼanen.

Carmen: Jach maʼalob. Jeʼel k-ilikba túun tuláakʼ semanaoʼ.

[Tsolajil]