¿Baʼaxten ku chaʼik k-muʼyaj?

YAAN máakoʼobeʼ kex ku payalchiʼobeʼ maʼ u yojloʼob wa jach tu jaajil yaan Diosiʼ. ¿Baʼaxten? Maʼ xaaneʼ tumen yaʼab muʼyajil ku yilkoʼob. ¿Baʼaxten a tuklik ku chaʼik Dios u yantal muʼyajil?

¿Beetaʼaniliʼ wa wíinik tumen Dios chéen utiaʼal u kʼebantal yéetel u muʼyajeʼ? Wa beyoʼ jach talam jeʼel k-eʼesik tsiikil tiʼeʼ. Baʼaleʼ tuukulnen tiʼ lelaʼ: wa ka wilik junpʼéel túumben coche jach táaj jatsʼuts, baʼaleʼ ken náatsʼkecheʼ ka wilik yaan tuʼux laʼachpajaneʼ, ¿jeʼel wa a waʼalik deporsi bey chʼaʼtuklaʼabik u beetaʼal teʼ fabricaoʼ? ¿Máasaʼ maʼatan? Yaan a tuklikeʼ maʼalob úuchik u jóokʼol teʼ fabricaoʼ, chéen yanchaj máax kʼaskúunte.

Bey túunoʼ, ken k-il bix maʼalobil yéetel jatsʼutsil beetaʼanik tuláakal baʼal, baʼaleʼ k-ilik jach yaʼab baʼax kʼaastak ku muʼyajtik wíinikeʼ, ¿baʼax unaj k-tuklik xan? Le Bibliaoʼ ku yaʼalikeʼ minaʼan u kʼeban wíinik ka beetaʼabi, baʼaleʼ ka tsʼoʼokeʼ tu juunal tu kʼaskúuntuba (Deuteronomio 32:4, 5). Kex beyoʼ, Dioseʼ u yaʼalmaj yaan u yutskíintik le baʼax kʼaskúuntaʼaboʼ. Yaan u luʼsik u kʼeban le máakoʼob uʼuyik u tʼaanoʼ. Baʼaleʼ ¿baʼaxten tsʼoʼok u páaʼtik yaʼab kʼiin?

¿Baʼaxten yaʼab kʼiin?

Jéeobaeʼ táan u tsʼáaik tiempo utiaʼal ka chíikpajak máax jach tu jaajil unaj u gobernartik wíinik. Dioseʼ tu beetaj wíinik utiaʼal u gobernartikoʼob, maʼ utiaʼal u gobernarkubaʼob tu juunaloʼobiʼ. Tak le Biblia aʼalikoʼ: «Xiibeʼ maʼ u yuumil u kuxtaliʼ, minaʼan u páajtalil u yéeyik bix ku bin xuʼulul» (Jeremías 10:23). Wíinikeʼ ichil u x-maʼ naʼatileʼ tu chʼaʼtuklaj u tsʼáaikuba tu contra u gobierno Dios. Bey úuchik u kʼebankúuntkubaoʼ (1 Juan 3:4). Tu yoʼolal leloʼ tu peʼertaj le maʼalob kuxtal yaan kaʼach tiʼoʼ, ka tu taasaj muʼyajil tiʼ tuláakal wíinik.

 Ichil u milesil jaʼaboʼobeʼ, Jéeobaeʼ tsʼoʼok u chaʼik u gobernarkuba wíinik chéen tu juunal, baʼaleʼ tsʼoʼok u yilaʼal maʼ tu páajtal u beetik jeʼex unajoʼ. Tsʼoʼok u yilaʼaleʼ chéen muʼyajil ku taasik u gobiernoiloʼob wíinik. Mix juntúul páajchajak u luʼsik baʼatelil, kʼasaʼanil mix kʼojaʼaniliʼ.

¿Bix ken u yutskíintil Dios le baʼax kʼaskúuntaʼaboʼ?

Le Bibliaoʼ ku yaʼalikeʼ maʼ tun xáantaleʼ Dioseʼ yaan u tsʼáaik junpʼéel túumben yóokʼol kaab (2 Pedro 3:13). Chéen le máaxoʼob ku chʼaʼtuklik u yaabiltikoʼob Dios yéetel u yéet wíinikiloʼob kun kuxtaloʼobiʼ (Deuteronomio 30:15, 16, 19, 20).

Le Biblia xanoʼ ku yaʼalikeʼ u «kʼiinil le pʼis óoloʼ» jach taʼaytak u kʼuchul, Dioseʼ yaan u xuʼulsik le muʼyajiloʼ bey xan máaxoʼob beetik u yantaloʼ (2 Pedro 3:7). Tsʼoʼoleʼ Dioseʼ tsʼoʼok u yéeyik Jesús utiaʼal u gobernartik le máakoʼob beetik baʼax uts tu tʼaan Diosoʼ (Daniel 7:13, 14). ¿Baʼax utsiloʼob ken u taas u gobierno Jesús? Le Bibliaoʼ ku yaʼalik: «Le j-kabal óoloʼoboʼ bíin u tiaʼalintoʼob le luʼumaʼ, bíin kuxlakoʼob ichil nojoch jéetsʼel óolal» (Salmo 37:11).

Rey Jesucristoeʼ yaan u yutskíintik tuláakal le kʼaas anchaj úuchik u sutkuba wíinik tu contra Jéeoba, «u sayabil le kuxtaloʼ» (Salmo 36:9). Ichil le baʼax kun luʼsbiloʼ tiaʼan le kʼojaʼaniloʼ, le chʼíijiloʼ yéetel le kíimiloʼ. Jesuseʼ yaan u tsʼakik le máaxoʼob kʼamik bey gobernanteeʼ. Yáanal u gobernacioneʼ yaan u béeytal le baʼax u yaʼalmaj le Bibliaaʼ:

▪ «Mix juntúul kajnáal bíin u yaʼal: Kʼojaʼanen. [Dios] bíin u saʼats u siʼipiloʼob u kajnáaliloʼob.» (Isaías 33:24.)

 ▪ «Jajal Dios kun choʼik tuláakal u jaʼil u yichoʼob, maʼ túun yantal kíimil, mix okʼol, mix yaj óolal, mix kʼiʼinamil, tumen tuláakal baʼax yaan kaʼacheʼ tsʼoʼok u máan.» (Apocalipsis 21:4.)

¿Máasaʼ jach ku kiʼimaktal k-óol k-ojéeltik Dioseʼ maʼ tun xáantaleʼ yaan u xuʼulsik junpuliʼ tuláakal muʼyajil? Le oʼolaleʼ kex láayliʼ táan k-muʼyajeʼ maʼ u xuʼulul k-confiar tiʼ le Máax uʼuyik le payalchiʼoboʼ.

Dioseʼ jach tu jaajil yaan. Letiʼeʼ ku yuʼubikech yéetel u yojel baʼax táan a muʼyajtik. Jach ku tsʼíiboltik xan ka kʼuchuk u kʼiinil u xuʼulul a muʼyaj yéetel a creertik jach tu jaajil a wóol yaan Máax uʼuyik le payalchiʼoboʼ.