Yaan máaxoʼobeʼ taak u yojéeltikoʼob

¿Baʼaxten tu yaʼalaj Dios ka tsʼoʼokok u beel máak chéen yéetel le máaxoʼob adorartikoʼ?

▪ Le Ley tu tsʼáaj Dios tiʼ le israelitaʼoboʼ ku yaʼalik: «Maʼ xan unaj a láakʼtsiltikabaʼex yéeteloʼobiʼ [le j-táanxel luʼumiloʼoboʼ], mix a tsʼoʼoksikeʼex u beel a xibil paalaleʼex wa a x-chʼupul paalaleʼex yéetel u chʼúupalalil wa u xiʼipaliloʼob le máakoʼoboʼ» (Deuteronomio 7:3, 4). ¿Baʼaxten?

Yáax táanileʼ, tumen Jéeobaeʼ u yojel taak u kʼaskúuntaʼal u tuukul le israelitaʼob tumen Satanás utiaʼal u adorartikoʼob yaanal diosoʼoboʼ. Dios túuneʼ tu yaʼaleʼ wa ku tsʼoʼokol u beeloʼob yéeteloʼobeʼ, jeʼel u beetaʼal u kʼéechloʼob tiʼ u beel Jéeoba utiaʼal u adorartikoʼob uláakʼ diosoʼobeʼ. Wa le israelitaʼob ku káajal u adorartikoʼob uláakʼ diosoʼobeʼ, chéen chʼaʼabil jeʼel u xuʼulsaʼaloʼob tumen le máaxoʼob pʼekmiloʼoboʼ, tumen Dioseʼ maʼ kun seguer u kanáantkoʼob. Tsʼoʼoleʼ, wa ku xuʼulsaʼaloʼobeʼ, ¿tuʼux kun jóokʼol kaʼach le Mesíasoʼ? Le oʼolal bakáan Satanaseʼ u kʼáat kaʼach ka tsʼoʼokok u beel le israelitaʼob yéetel le j-táanxel luʼumiloʼoboʼ.

Uláakʼ baʼax xaneʼ, Dioseʼ u kʼáat ka xiʼik utsil tiʼ cada israelita. U yojleʼ utiaʼal ka yanak kiʼimak óolal tiʼobeʼ kʼaʼabéet maʼ u náachtaloʼob tiʼ letiʼiʼ. ¿Jach wa tu jaajil jeʼel u kʼaskúuntaʼal u tuukuloʼobeʼ? Tukult baʼax úuch tiʼ Salomón. Letiʼeʼ u yojliliʼeʼ wa ku tsʼoʼokol u beel yéetel koʼoleloʼob maʼatech u meyajtikoʼob Dioseʼ «jeʼel u beetkoʼob u kʼéechel u [puksiʼikʼal] tu paach le beetbil [diosoʼob]oʼ». Maʼ xaaneʼ Salomoneʼ tu tukleʼ maʼ tun úuchultiʼ beyoʼ, tumen letiʼeʼ jach yaan u naʼat. Baʼaleʼ ¿baʼax úuchtiʼ? Jujunpʼíitil «beetaʼab u kʼéechel u puksiʼikʼal tumen u yatanoʼob utiaʼal u bin tu paach beetbil [diosoʼob]». ¡Bukaʼaj suʼtsil! Salomoneʼ xuʼul u lúubul utsil tu táan Jéeoba, ka jatspaj le reino tu yoʼolal u x-maʼ uʼuyaj tʼaaniloʼ (1 Reyes 11:2-4, 9-13).

Yaan máax jeʼel u tuklikeʼ chéen tiʼ wa jaytúul úuch beyoʼ. Tumen jeʼex Mahloneʼ, letiʼeʼ tsʼoʼok u beel yéetel Rut le x-moabiloʼ baʼaleʼ Ruteʼ káaj u meyajtik Dios. Baʼaleʼ mix tuʼux ku yaʼalaʼal wa maʼalob le baʼax sajbeʼentsil tu beetaj Mahlonoʼ. Letiʼeʼ táankelem ka kíimi; mix tu yilaj u káajal u meyajtaʼal Jéeoba tumen Rut. Quelión xaneʼ tsʼoʼok u beel yéetel Orfa, juntúul x-moabil maʼ tu pʼataj u diosoʼobiʼ. Baʼaleʼ Booz (Boaz) letiʼeʼ tsʼoʼok u beel yéetel Rut yaʼab jaʼaboʼob káajak u meyajtaʼal Dios tumen le koʼolelaʼ. Ka máan kʼiineʼ tak le judíoʼob aʼaleʼ Ruteʼ juntúul koʼolel jach tu tsʼáaj u yóol u meyajt Dios. Jach bin utsil tiʼ Booz yéetel Rut úuchik u tsʼoʼokol u beeloʼob (Rut 1:4, 5, 15-17; 4:13-17).

¿Yaan wa túun baʼax oʼolal k-aʼalik maʼ kʼaas ka tsʼoʼokok u beel máak yéetel máax maʼatech u meyajtik Diosiʼ? Maʼatech. Wa juntúul a vecino tu jóoʼsaj lotería úuchik u manik junpʼéel boletoeʼ, ¿jeʼel wa a waʼalikeʼ chéen báaxal lotería ken a beet utiaʼal a kaxtik a kuxtaleʼ?

Le Bibliaoʼ ku yaʼalikeʼ le cristianoʼoboʼ chéen unaj u tsʼoʼokol u beeloʼob «ichil le j-oksaj óoloʼoboʼ». Ku yaʼalik xan: «Maʼ a nupkabaʼex yéetel máaxoʼob maʼ tu yoksaj óoloʼoboʼ». Le tekstoaʼ utiaʼal le máaxoʼob taak u tsʼoʼokol u beeloʼoboʼ. Utiaʼal le tsʼokaʼan u beeloʼob yéetel máaxoʼob maʼ tu meyajtikoʼob Dioseʼ, le Bibliaoʼ ku tsʼáaik xan tsolnuʼukoʼob utiaʼal maʼ u sen yaʼabtal u talamiloʼob (1 Corintoiloʼob 7:12-16, 39; 2 Corintoiloʼob 6:14). Lelaʼ ku yeʼesikeʼ Jéeoba le máax beet u yantal le tsʼoʼokol beeloʼ u kʼáat ka yanak kiʼimak óolal tiʼ tuláakloʼon, kex tsʼokaʼan k-beel wa maʼ.