Ilawil a natsʼkaba tiʼ Dios

¿Ku tuʼubsik wa Dios le baʼax ku perdonartikoʼ?

U JAAJILEʼ ku tuʼubsik. Jéeobaeʼ ku yaʼalik tiʼ máaxoʼob meyajtik: «Teneʼ bíin in saʼats u kʼasaʼaniloʼob mix xan bíin kaʼa kʼaʼajak tiʼ teen u kʼebanoʼobiʼ» (Jeremías 31:34). Jeʼex k-ilkoʼ Jéeobaeʼ maʼ tu kaʼa kʼaʼajsik u kʼeban juntúul máak tsʼoʼok u perdonartik. ¿U kʼáat wa túun u yaʼaleʼ Dios, le Máax beet tuláakal baʼaloʼ, maʼ tu páajtal u kʼaʼajsik le baʼax tsʼoʼok u perdonartikoʼ? U libroil Ezequieleʼ ku yáantkoʼon k-naʼat bix u tuʼubsik Dios le kʼeban ku perdonartikoʼ. (Xok Ezequiel 18:19-22.)

Jéeobaeʼ tu túuxtaj profeta Ezequiel utiaʼal u yaʼal tiʼ u kʼasaʼan kaajil Judá yéetel Jerusalén baʼax castigoil ken u kʼamoʼob. Tuláakal le kaajoʼ tu pʼatoʼob u adorartikoʼob Jéeobaeʼ ka joʼopʼ u beetkoʼob baʼaloʼob kʼaastak. Le oʼolal Jéeobaeʼ tu yaʼalaj yaan u xuʼulsaʼal Jerusalén tumen le babilonioʼoboʼ. Baʼaleʼ tu yaʼalaj xaneʼ yaan tiʼ letiʼob jeʼel u salvarkubaʼobeʼ. Cada juntúuleʼ yaan u juzgartaʼal yoʼolal le baʼax tu chʼaʼtuklaj u beetkoʼ (versículo 19, 20).

¿Kux túun wa yaan máax ichiloʼob ku xuʼulul u kʼebantal? Jéeobaeʼ tu yaʼalaj: «Wa le j-loolob wíinik ku náachtal tiʼ u kʼebanoʼob utiaʼal u tsʼoʼokbesik in waʼalmaj tʼaanoʼob tu yoʼolal u beetik baʼax toj yéetel tubeeleʼ, tu jaajileʼ, bíin pʼáatak kuxaʼan, maʼ bíin kíimikiʼ» (versículo 21). Jeʼex k-ilkoʼ Jéeoba le máax ku «saʼatsaj siʼipil[oʼ]», ku perdonartik le máax ku xuʼulul u kʼebantal yéetel ku arrepentir tu jaajil u yóoloʼ (Salmo 86:5).

¿Baʼax túun ku yúuchul yéetel le kʼaas u beetmoʼ? Jéeobaeʼ tu yaʼalaj: «Teneʼ maʼ bíin kaʼa kʼaʼajak tiʼ teen le looboʼob u beetmoʼ, letiʼeʼ bíin pʼáatak kuxaʼan tu yoʼolal le baʼax toj ku beetkoʼ» (versículo 22). Jeʼex u yeʼesik le tekstoaʼ u kʼeban le máax ku arrepentiroʼ «maʼ bíin kaʼa kʼaʼajak» tiʼ Diosiʼ. ¿Baʼax u kʼáat u yaʼal leloʼ?

Le tʼaan hebreo ku suʼutul «kʼaʼajaloʼ», maʼ chéen u kʼáat u yaʼal u kaʼa tuukul máak tiʼ junpʼéel baʼax uchaʼaniʼ. Junpʼéel libroeʼ ku yaʼalik: «Yaʼab u téeneleʼ [le tʼaanaʼ] ku meyaj utiaʼal u yeʼesaʼal yaan baʼax ken u beet máak tu yoʼolal le baʼax ku kʼaʼajsikoʼ». Bey túunoʼ le tʼaan «kʼaʼajaloʼ» u kʼáat xan u yaʼal ‹u beetaʼal wa baʼax›. Le oʼolaleʼ ken u yaʼal Jéeoba «maʼ bíin kaʼa kʼaʼajak tiʼ tee[neʼ]» u kʼáat u yaʼaleʼ maʼ bíin u beet mix baʼal tu contra le máax arrepentirnajoʼ, yéetel maʼ ken u castigart tu yoʼolal u kʼebanoʼ. *

Ezequiel 18:21 yéetel 22, ku yeʼesik bukaʼaj u nojchil u perdón Jéeoba. Ken u perdonartoʼoneʼ mix bikʼin ken u kaʼa kʼaʼajs utiaʼal u chʼinik t-ich. Jeʼel u páajtal u yaʼalaʼaleʼ ku pʼatik le kʼebanoʼob paachil tiʼ letiʼoʼ (Isaías 38:17). Óoliʼ bey ka u tup le kʼebanoʼob anchajoʼ (Beetaʼanoʼob 3:19).

Tumen kʼeban wíinikoʼoneʼ mantatsʼ k-lúubul tiʼ kʼeban, le oʼolal kʼaʼabéet u chʼaʼabaltoʼon óotsilil tumen Dios (Romailoʼob 3:23). Baʼaleʼ Jéeobaeʼ u kʼáat ka k-ojéelteʼ jach jeʼel u perdonartikoʼon wa k-arrepentir tu jaajil k-óoleʼ. Ken u perdonartoʼoneʼ ku tuʼubsik le kʼebanoʼ, maʼ tu kaʼa kʼaʼajsik utiaʼal u chʼinik t-ich mix utiaʼal u castigartikoʼon tu yoʼolal. ¿Máasaʼ jach ku líiʼsik k-óol k-ojéeltik leloʼ? ¿Maʼ wa tu taaktal a natsʼkaba tiʼ Dios ken a wojéelt bukaʼaj nojchil u chʼaʼ óotsilal?

[Tsolajil]