¿Máax uʼuyik le payalchiʼoboʼ?
¿Máax uʼuyik le payalchiʼoboʼ?
JAʼALIʼ chéen le Máax beetmiloʼon jeʼel u yuʼubik k-payalchiʼobeʼ. Tumen ¿máax maas jeʼel u yojéeltik baʼax yaan ichil k-tuukul wa maʼ letiʼe máax beet k-tsʼoʼomeloʼ? ¿Máax maas jeʼel u núukik k-payalchiʼ yéetel u tsʼáaik le áantaj kʼaʼabéettoʼonoʼ? Baʼaleʼ maʼ xaaneʼ jeʼel a waʼalikeʼ: «¿Jach wa tu jaajil yaan máax beetmiloʼon?».
Yaan máax tuklikeʼ wa k-creertik yaan Máax beetmiloʼoneʼ k-bin tu contra le baʼaxoʼob ku yaʼalik le ciencia bejlaʼoʼ. Baʼaleʼ leloʼ maʼ jaajiʼ, tumen le cienciaoʼ maʼ tu bin tu contra Dios.
▪ Maʼ sen úucheʼ kʼáatchiʼitaʼab 1,646 profesoroʼob tiʼ ciencia tiʼ 21 universidadoʼob yaan Estados Unidoseʼ, ka ilaʼabeʼ chéen kex 550 tu yaʼalaj: «Maʼatech in creertik Dios».
Jeʼex túun k-ilkoʼ, yaan cientificoʼob ku creertikoʼob yaan Dios.
Baʼax eʼesik yaan Dios
¿Unaj wa k-creertik yaan Máax uʼuyik le payalchiʼob wa mix baʼal eʼesik wa yanoʼ? Maʼatech. Utiaʼal u tsʼáaik u fe máak tiʼ wa baʼaxeʼ kʼaʼabéet pruebas tiʼ utiaʼal u yoksik tu tuukul jach jaaj le baʼax ku creertikoʼ. Le Bibliaoʼ ku yaʼalikeʼ le fejoʼ u kʼáat u yaʼal «u yokol tiʼ k-tuukuleʼ junpʼéel baʼal maʼ táan k-ilikeʼ [baʼaleʼ] jach u jaajil» (Hebreob 11:1). Óoliʼ jeʼex u ondasil le radiooʼ, kex maʼ tu páajtal k-ilkeʼ k-ojel jach tu jaajil yaan tumen ku páajtal k-uʼuyik le baʼax ku yaʼalaʼaltoʼon tiʼ celularoʼ. Bey túun xanoʼ kex maʼ tu páajtal k-ilik Máax uʼuyik le payalchiʼoboʼ, jeʼel u páajtal k-oksik t-tuukul yaaneʼ tumen yaan baʼax eʼesiktoʼon jach tu jaajil yaan.
¿Baʼax eʼesiktoʼon yaan Dios? Chéen kʼaʼabéet k-ilik baʼaxoʼob yaan t-baʼpach. Le Bibliaoʼ bey u yaʼalikaʼ: «Tuláakal najeʼ unaj u beetaʼal tumen wa máax; baʼaleʼ Jajal Dios máax beet tuláakal baʼax yaan» (Hebreob 3:4). ¿Máasaʼ jaaj le baʼax ku yaʼalik le tekstoaʼ? Ken chʼíikikech a tukult bix beetaʼanik tuláakal baʼal, bix anchajik le kuxtaloʼ, bix jach maʼalob beetaʼanik u tsʼoʼomel máak, maʼ xaaneʼ jeʼel a tsʼáaik cuentaeʼ chéen juntúul máax maas nojoch tiʼ wíinik páajchaj u beetik. *
Le baʼaxoʼob beetaʼanoʼ maʼ tu páajtal u kaʼansiktoʼon tuláakal baʼax kʼaʼabéet k-ojéeltik yoʼolal Dios. U meyajtech le baʼaxoʼob beetaʼan utiaʼal a kaanbal tiʼ Dioseʼ bey jeʼex ka a wuʼuy yaan máax táan u náatsʼal tu jool a wotoch baʼaleʼ maʼ a wojel máaxiʼ. Utiaʼal a wojéeltikeʼ kʼaʼabéet a jeʼekʼabtik le joonajoʼ. Óoliʼ bey xan u yúuchul yéetel le Máax beet tuláakal baʼaloʼ, utiaʼal a wojéeltik máaxeʼ kʼaʼabéet a jeʼekʼabtik le «joonaj» tiʼoʼ.
Le Bibliaoʼ bey junpʼéel joonajeʼ tumen wa ka jeʼekʼabtikeʼ jeʼel a wojéeltik máax Dioseʼ. Ken kanbalnakech tiʼ le profecíaʼob ku yaʼalik le Biblia yéetel tiʼ bix u bin u béeytaloʼoboʼ yaan a wilik jach tu jaajil yaan Dios. * Tsʼoʼoleʼ yaan a kanik bix jatsʼutsil u modos le Máax uʼuyik le payalchiʼob ken a xok bix tu bisiluba yéetel u kaajal úuchjeakiloʼ.
¿Bix u modos le Máax uʼuyik le payalchiʼoboʼ?
Junpʼéel baʼal maʼ kuxaʼaneʼ maʼ tu páajtal u yuʼubik yéetel u naʼatik baʼax ka waʼaliktiʼ. Baʼaleʼ le Bibliaoʼ ku yeʼesikeʼ le Dios uʼuyik le payalchiʼoboʼ juntúul Máax kuxaʼan yéetel jeʼel u páajtal a kʼaj óoltikeʼ. Tiʼ Dioseʼ le Bibliaoʼ ku yaʼalik: «¡Tumen ka wuʼuyik payalchiʼ! Tuláakal yóokʼol kaab ku taal tiʼ teech» (Salmo 65:2). Letiʼeʼ ku yuʼubik le máaxoʼob ku payalchiʼob yéetel fejoʼ. Tsʼoʼoleʼ yaan u kʼaabaʼ. Le Bibliaoʼ ku yaʼalik: «Teen Yuumtsil a [Dios], Yahveh in kaabaʼ u yuumil tuláakal páajtalil» (Isaías 51:15).
Yahveh wa Jéeobaeʼ yaan u sentimientos. Letiʼe «u [Diosil] yaakunaj» yéetel ku yaʼalal xan tiʼ «le Dios kiʼimak u yóoloʼ» (2 Corintoiloʼob 13:11; 1 Timoteo 1:11, NM). Úuchjeakil le ka jach kʼaschaj máakoʼob way yóokʼol kaabeʼ, le Bibliaoʼ ku yaʼalikeʼ Dioseʼ jach «yaachaj tu yóol» (Génesis 6:5, 6). Maʼ jaaj wa Dios beetik u muʼyaj wíinik utiaʼal u túuntik u yóoliʼ. Le Bibliaoʼ letiʼe baʼax ku yaʼalikaʼ: «¡Mix a chéen tuklikeʼex wa jeʼel u beetik [Jajal Dios] le sen j-Páajtalil junpʼéel baʼal kʼaas!» (Job 34:10). Baʼaleʼ maʼ xaaneʼ láayliʼ jeʼel a waʼalikeʼ: «Wa Dios jach nojoch u páajtalileʼ ¿baʼaxten túun ku chaʼik k-muʼyaj?».
Jéeobaeʼ tiʼ cada juntúul u tsʼaamaj u páajtalil u chʼaʼtuklik baʼax ken u beete; lelaʼ ku yeʼesiktoʼon bix u modos. ¿Máasaʼ jach jatsʼuts k-ilik le páajtalil u tsʼaamajtoʼonaʼ? Baʼaleʼ yaan máakoʼobeʼ chéen baʼax kʼaas ku chʼaʼtuklik u beetkoʼob, le oʼolal ku muʼyajoʼob wa ku taaskoʼob muʼyajil tiʼ uláakʼ máakoʼob. Baʼaleʼ beoraaʼ maʼalob ka jach tuukulnakoʼon tiʼ le kʼáatchiʼaʼ: ¿Bix ken u luʼs Dios le muʼyajil wa tiʼ cada juntúul u tsʼaamaj u páajtalil u yéeyik baʼax ken u beete? U núukileʼ le ken k-ilik teʼ tuláakʼ xookoʼ.
[Tsolajiloʼob]
^ xóot’ol 8 Utiaʼal a wojéeltik baʼax uláakʼ eʼesik yaan Dioseʼ ilawil le folleto El origen de la vida. Cinco cuestiones dignas de análisis yéetel le libro ¿Existe un Creador que se interese por nosotros?, beetaʼan tumen u j-jaajkunajoʼob Jéeoba.
^ xóot’ol 10 Le folleto Un libro para todo el mundo yéetel le libro La Biblia... ¿la Palabra de Dios, o palabra del hombre?, beetaʼan tumen u j-jaajkunajoʼob Jéeobaoʼ jeʼel u yáantkech a wil baʼax eʼesik Dios beet u tsʼíibtaʼal le Bibliaoʼ.
[Cuadro yaan teʼ táan juʼun 5]
¿Letiʼ wa le religión beetik maʼ a jach creertikoʼ?
Kex yaj u yaʼalaʼaleʼ, letiʼ le religión beetik maʼ u jach creertaʼal wa yaan Máax taak u yáantik le máaxoʼob ku payalchiʼoboʼ. Le religionoʼ ku yoksikuba tiʼ baʼateloʼob, tiʼ terrorismo, yéetel maʼ tu beetik mix baʼal tiʼ le ku abusaroʼob tiʼ mejen paalaloʼ; tu yoʼolal lelaʼ tak le máaxoʼob ku payalchiʼoboʼ ku yaʼalikoʼob: «Maʼatech in creertik Dios».
¿Baʼaxten yaan kʼasaʼanil ichil le religionoʼ? Tumen yaan máaxoʼob beetik baʼaloʼob kʼaastak tu kʼaabaʼ le religionoʼ. Le Bibliaoʼ u yaʼalmiliʼ yaan kun beetik baʼaloʼob kʼaastak tu kʼaabaʼ Cristoeʼ. Apóstol Pabloeʼ tu yaʼalaj tiʼ le yáax cristiaʼanoʼoboʼ: «Ichileʼex[eʼ] yaan u líikʼil tsʼeʼetsʼek máakoʼob ku bin u kaʼansoʼob tuusoʼob utiaʼal ka tsʼaypachtaʼakoʼob tumen le j-oksaj óoloʼoboʼ» (Beetaʼanoʼob [Hechos] 20:29, 30).
Dioseʼ tsʼoʼok u náakal u yóol tiʼ le religionoʼob minaʼan u jaajil tiʼoboʼ. Le Bibliaoʼ ku yaʼalikeʼ yaan u siʼipiloʼob yoʼolal «u kʼiʼikʼel tuláakal le máaxoʼob kíimsaʼaboʼob yóokʼol kaaboʼ» (Apocalipsis 18:24). U Diosil yaabilajeʼ ku yilik yaan u siʼipiloʼobeʼ tumen maʼ tu kaʼansoʼob le máakoʼob jeʼex unaj u beetkoʼob kaʼachoʼ (1 Juan 4:8).
Le Máax uʼuyik le payalchiʼoboʼ ku chʼaʼik óotsilil tiʼ le máaxoʼob tsʼoʼok u beetaʼal kʼaas tiʼob tumen le religionoʼ. Maʼ tun xáantaleʼ, tu yoʼolal u yaabilajeʼ, Dioseʼ yaan u tsʼáaik Jesucristo u juzgart le religionoʼob tu yoʼolal u kaʼapʼéel ichiloʼoboʼ. Jesuseʼ tu yaʼalaj: «Le ken kʼuchuk le kʼiinoʼ, yaʼab máaxoʼob bíin u yaʼaloʼobten: Yuumtsil, Yuumtsil, toʼoneʼ tʼaanajoʼon ta kʼaabaʼ. [...] Baʼaleʼ teneʼ bíin in waʼaltiʼob: Mix bikʼin in kʼaj óolteʼex; ¡tselabaʼex tin táan, teʼex ta beeteʼex baʼaloʼob kʼaastak!» (Mateo 7:22, 23).
