Le revista táan a xokikaʼ káaj u jóoʼsaʼal ich inglés desde julio tiʼ 1879. Teʼ kʼiinoʼobaʼ yaʼab baʼax tsʼoʼok u kʼexpajal, yéetel bey tsʼoʼok u yúuchul xan tiʼ U Pʼíich Tulumil Kananoʼ (ilawil le fotoʼob yaan kaʼanaloʼ). Desde teʼ mesaʼ yaan a wilik uláakʼ kʼeexoʼob teʼ revistaaʼ. ¿Máakalmáakoʼobiʼ?

Yaʼab tuʼuxeʼ táan u bin u maas yaʼabtal le máaxoʼob uts tu tʼaan u xookoʼob ich Internetoʼ. Ichileʼ séebaʼan u kaxtaʼal yaʼab baʼaloʼob, yéetel yaan tiʼ le baʼaloʼobaʼ chéen Internet ku páajtal u yilaʼaloʼob. Yaʼab libroʼob, revistaʼob yéetel periodicoʼob jeʼel u páajtal u xoʼokloʼob ich Interneteʼ.

Tu yoʼolal túun lelaʼ tsʼoʼok k-beetik xan jujunpʼéel kʼeexoʼob teʼ www.pr418.com utiaʼal u maas jatsʼutstal yéetel u séeb kaxtaʼal le baʼax u kʼáat máakoʼ. Bejlaʼeʼ teʼ kúuchiloʼ jeʼel u páajtal u xoʼokol jóoʼsaʼaniloʼob ich maas tiʼ 430 idiomaʼobeʼ. Tsʼoʼoleʼ desde teʼ mesaʼ, jujunpʼéel tiʼ u xookiloʼob le revista suuk u jóokʼol tiʼ juʼuneʼ yaan u káajal u chíikpajal chéen ich Internet. *

Tumen yaan u tsʼaʼabal uláakʼ xookoʼob chéen ich Interneteʼ, desde teʼ mesaʼ, le revista U Pʼíich Tulumil Kanan utiaʼal kʼaʼaytajoʼ yaan u taasik chéen 16 táan juʼunoʼob. Tak bejlaʼeʼ le revistaaʼ táan u jóoʼsaʼal ich 204 idiomaʼob, baʼaleʼ tumen chéen junpʼíit u táan juʼuniloʼob beoraaʼ yaan u páajtal u suʼutul ichil yaʼab uláakʼ idiomaʼob.

Le kʼeexoʼob beetaʼabaʼ yaan u yáantkoʼon kʼuchul tiʼ maas yaʼab máakoʼob yéetel le maʼalob péektsil jeʼel u salvartikoʼobaʼ. Tsʼoʼok k-chʼaʼtuklikeʼ yaan u seguer k-áantik le máaxoʼob ku yeʼeskoʼob tsiikil tiʼ le Biblia yéetel taak u yojéeltikoʼob baʼax jach tu jaajil ku kaʼansikoʼ. Yéetel le jatsʼuts xookoʼob kun jóokʼol tiʼ juʼun bey xan ich Internetoʼ yaan k-áantkoʼob utiaʼal ka maas sáasilchajak u tuukuloʼob tiʼ le baʼax ku yaʼalik le Bibliaoʼ.

Máaxoʼob jóoʼsik le revistaaʼ