TIʼ U YÁAX TÁAN JUʼUNIL: ¿BAʼAX K-KANIK TIʼ MOISÉS?
¿Máax kaʼach Moisés?
¿Baʼax ku taal ta tuukul ken a wuʼuy u kʼaabaʼ Moisés?
-
Le chaambal taʼakaʼab tumen u maama ichil junpʼéel xaak teʼ Río Nilooʼ.
-
Le chan xiʼipal tséentaʼab ich ayikʼalil tumen u hija Faraón baʼaleʼ maʼ tuʼubtiʼ wa israelitaoʼ.
-
Le j-kanan taman kuxlaj tu luʼumil Madián tu yáamil 40 jaʼaboʼoboʼ.
-
Le máax tsikbalnaj yéetel Jéeoba * tu táan junkúul cheʼ ku tóochʼbal u kʼáakʼiloʼ.
-
Le máax maʼ tu chʼaʼaj saajkil waʼatal tu táan Faraón utiaʼal u kʼáatik ka jáalkʼabtaʼak le israelitaʼoboʼ.
-
Le máax kʼaʼayt le Diez Noj Yajiloʼob ken u taas Dios yóokʼol Egipto le ka tu tsʼáajuba Faraón tu contra Diosoʼ.
-
Le máax nuʼukt le israelitaʼob le ka jóokʼoʼob tu luʼumil Egiptooʼ.
-
Le máax tiʼ tsʼaʼab u páajtalil u jatsik u jaʼil le Chak Kʼáaʼnáaboʼ.
-
Le máax kʼub tiʼ le israelitaʼob le Diez Mandamientos tu tsʼáaj Diosoʼ.
LE MÁAX tsʼoʼok k-aʼalikoʼ Moisés. Letiʼeʼ yaʼab uláakʼ baʼaxoʼob tu beetaj. ¡Le oʼolal jach kʼaj óolaʼan tumen cristianoʼob, judíoʼob, yéetel musulmanoʼob!
Moiseseʼ juntúul profeta tu beetaj u jaʼakʼal u yóol máak yéetel «le nukuch baʼaloʼob» tu beetoʼ (Deuteronomio 34:10-12). Kex chéen luʼumkabil wíinikeʼ tu chaʼaj u nuʼuktaʼal tumen Dios utiaʼal u beetik nukuch baʼaloʼob. Letiʼeʼ «juntúul máak jeʼel bixoʼoneʼ», bey jeʼex le profeta Elías chíikpaj tu tséel teʼ kʼiinoʼob kuxaʼan Jesús way Luʼumeʼ (Santiago 5:17; Mateo 17:1-9). Moiseseʼ tu aktáantaj yaʼab talamiloʼob jeʼex le k-ilik bejlaʼoʼ, baʼaleʼ béeychaj tu yéeteloʼob.
¿A kʼáat wa a wojéelt bix tu beetil? Koʼox ilik óoxpʼéel jatsʼuts modos tu yeʼesaj Moisés yéetel baʼax jeʼel k-kanik tiʼ letiʼeʼ.
^ xóot’ol 7 Jeʼex u chíikpajal teʼ Bibliaoʼ, u kʼaabaʼ Dioseʼ Jéeoba.
