Le judíoʼoboʼ tu séebaʼanil ku mukik kaʼach u kimenoʼob, u suukileʼ láayliʼ teʼ kʼiin ku kíimloʼoboʼ. ¿Baʼaxten? Yáaxeʼ tumen séeb jeʼel u kʼastal le wíinkliloʼob yoʼolal le ooxol ku beetik teʼeloʼ. Tsʼoʼoleʼ suʼtsil u yilaʼal ka máanak wa jaypʼéel kʼiin maʼ muʼukuk le kimenoʼ.

Teʼ Evangelioʼob yéetel tu libroil Beetaʼanoʼobeʼ, ku yúuchul tʼaan kex tiʼ kantúul máakoʼob muʼukoʼob láayliʼ teʼ kʼiin ka kíimoʼoboʼ (Mateo 27:57-60; Beetaʼanoʼob [Hechos] 5:5-10; 7:60–8:2). Tu kʼiiniloʼob Jacob xaneʼ, le ka kíim Raquel u yatan le táan u viajaroʼoboʼ, maʼ suunajoʼob utiaʼal u mukikoʼob tu muknal u láakʼtsiloʼobiʼ, baʼaxeʼ tu mukoʼob ichil junpʼéel muknal «tu bejil [...] Belén» (Génesis 35:19, 20, 27-29).

Le baʼaxoʼob ku yaʼalik le Biblia yoʼolal bix u muʼukul máak úuchjeakiloʼ ku yeʼesikeʼ le judíoʼoboʼ jach kʼaʼanaʼan u yilkoʼob le baʼaloʼobaʼ. U láakʼtsiloʼob le kimenoʼ ku pʼoʼikoʼob le wíinkliloʼ, ku jiʼikoʼob kiʼibok aceite yéetel kiʼibok xíiwoʼob tiʼ, ku tsʼoʼokoleʼ ku toʼikoʼob yéetel nookʼ (Juan 19:39, 40; Beetaʼanoʼob 9:36-41). U yéet kaajaloʼob xaneʼ ku taaloʼob utiaʼal u líiʼskoʼob u yóol u láakʼtsiloʼob (Marcos 5:38, 39).

Tu luʼumil Israeleʼ yaʼab judíoʼob tu mukaj u láakʼtsiloʼob ich áaktunoʼob wa ich sajkaboʼob, tumen u úuchben láakʼtsiloʼobeʼ bey xan tu beetiloʼoboʼ. Abraham, Sara, Isaak, Jacob, yéetel uláakʼ máakoʼobeʼ muʼukoʼob tu áaktunil Macpelá naatsʼ Hebrón (Génesis 23:19; 25:8, 9; 49:29-31; 50:13).

Jesuseʼ tsʼaʼab tiʼ junpʼéel muknal chʼakaʼan tiʼ tuunich (Marcos 15:46). Le muknal beyaʼ u suukileʼ nuʼutʼ u joolil. Ichileʼ ku chʼaʼakal uláakʼ mejen jooloʼob utiaʼal u tsʼaʼabal le kimenoʼ bey xan u láakʼtsiloʼob ken kíimkoʼob. Jeʼex suukil tu kʼiiniloʼob Jesuseʼ, ken tsʼúukuk u bakʼel yéetel ken tijik u baakel le kimenoʼ, ku tsʼaʼabal tiʼ junpʼéel nuʼukul de tuunich ku kʼaabaʼtik osario. Beyoʼ ku yantal tuʼux u tsʼaʼabal uláakʼ kimenoʼob ichil le muknaloʼ.

Wa sábado ken kíimik wa máaxeʼ, le Ley tsʼaʼab tiʼ Moisesoʼ maʼ tu chaʼik u beetaʼal mix baʼal utiaʼal u muʼukul le kimen teʼ kʼiin jeʼeloʼ. Tumen óoxpʼéel hora u bin u káajal u kʼiinil sábado ka kíim Jesuseʼ, José de Arimatea yéetel uláakʼ máakoʼobeʼ maʼ tu tsʼoʼoksaj u preparartikoʼob le wíinklil ka tu mukoʼoboʼ (Lucas 23:50-56). Le oʼolaleʼ jujuntúul tiʼ u amigoʼob Jesuseʼ, binoʼob teʼ muknal tu sáastal domingo utiaʼal u tsʼoʼoksikoʼoboʼ (Marcos 16:1; Lucas 24:1).