¿Baʼax unaj k-beetik utiaʼal k-lúubul utsil tiʼ Dios? ¿K-tsʼoʼokbesik u milesil mandamientoʼob? Jesucristo u Paal Dioseʼ tu tsʼáaj naʼatbileʼ junpʼéeliliʼ baʼax kʼaʼabéet. (Xok Marcos 12:28-31, NM.)

Yáaxeʼ koʼox ilik baʼaxten tu yaʼalaj Jesús leloʼ. Letiʼeʼ táan kaʼach u kaʼansaj tu kʼiinil 11 tiʼ Nisán teʼ templo, le maʼ yaʼab u bin u kíimsaʼaloʼ. Le máaxoʼob pʼekmiloʼ tu yóotaj u táabsoʼob yéetel kʼáatchiʼob talam u núukaʼal. Baʼaleʼ Jesuseʼ tu makaj u chiʼob yéetel le bix tu núukiloʼ. Tu tsʼookeʼ ka kʼáataʼabtiʼ: «¿Máakalmáak tiʼ tuláakal le baʼaxoʼob ku yaʼalik le Ley maas kʼaʼanaʼanoʼ?» (versículo 28).

Jach talam le kʼáatchiʼaʼ. Jujuntúul judíoʼobeʼ u kʼáat u yojéeltoʼob máakalmáak ichil le maas tiʼ 600 mandamientoʼob yaan ichil u Ley Moisés maas kʼaʼanaʼanoʼ. Uláakʼoʼobeʼ ku yaʼalikoʼob láaj kʼaʼanaʼanoʼob, le beetik maʼ maʼalob ka tuklaʼak wa yaan u maas kʼaʼanaʼaniliʼ. ¿Baʼax túun tu núukaj Jesús?

Jesuseʼ tu yaʼaleʼ yaan kaʼapʼéel mandamientoʼob maas kʼaʼanaʼanoʼob. Yáaxeʼ tu yaʼalaj: «Kʼaʼabéet [...] a yaabiltik Jéeoba a Dios yéetel tuláakal a puksiʼikʼal, yéetel tuláakal a kuxtal, yéetel tuláakal a tuukul bey xan yéetel tuláakal a muukʼ» (versículo 30; Deuteronomio 6:5). Le tʼaanoʼob «puksiʼikʼal», «kuxtal», «tuukul» yéetel «muukʼ[eʼ]», óoliʼ junpʼéeliliʼ baʼax u kʼáat u yaʼaloʼob. * U kʼáat u yaʼaleʼ unaj k-yaabiltik Jéeoba yéetel tuláakal baʼax yaantoʼon. Junpʼéel libro ku tsolik u tʼaaniloʼob le Bibliaoʼ ku yaʼalik: «Dioseʼ unaj u chúukaʼan yaabiltaʼal». Wa k-yaabiltmaj Dioseʼ sáamsamal ken k-kuxtal jeʼex uts tu tʼaaneʼ (1 Juan 5:3).

Jesuseʼ tu yaʼalaj máakalmáak le u kaʼapʼéel mandamientooʼ: «Kʼaʼabéet a yaabiltik a wéet máakil jeʼex a yaabiltikabaeʼ» (versículo 31; Levítico 19:18). Maʼ tu páajtal k-yaabiltik Dios wa maʼ t-yaabiltik xan k-éet máakiliʼ. U yaabilaj Dioseʼ ku beetik k-yaabiltik k-éet máakil (1 Juan 4:20, 21). Wa k-yaabiltmaj k-éet máakil jeʼex k-yaabiltmakbaeʼ yaan k-beetiktiʼob le baʼaxoʼob k-kʼáat ka u beetoʼobtoʼonoʼ (Mateo 7:12). Bey túunoʼ yaan k-yaabiltik Dios, le máax beetmil tuláakal máak jeʼel bix letiʼoʼ (Génesis 1:26).

¿Jach wa kʼaʼanaʼan k-yaabiltik Dios yéetel k-éet máakil? «Minaʼan uláakʼ baʼax ku yaʼalik le Ley maas nojoch tiʼ leloʼobaʼ», tu yaʼalaj Jesús (versículo 31). Ichil uláakʼ Evangelioeʼ Jesuseʼ tu yaʼaleʼ tiʼ le kaʼapʼéel baʼal jóokʼ tuláakal le Leyoʼ (Mateo 22:40).

Maʼ talam k-lúubul utsil tiʼ Diosiʼ. Chéen junpʼéel baʼax ku kʼáatiktoʼon: yaabilaj. Úuchjeakil tak bejlaʼeʼ letiʼe baʼax kʼaʼabéet utiaʼal u adorartaʼal Diosoʼ; leloʼ mix bikʼin kun kʼexpajal. Baʼaleʼ yaabilajeʼ maʼ chéen ku yaʼalaʼaliʼ, ku yeʼesaʼal yéetel baʼax ku beetik máak (1 Juan 3:18). ¿A kʼáat wa a kan bix jeʼel a yaabiltik Jéeoba, le u Diosil yaabilajoʼ? (1 Juan 4:8.)