Síijen tu kaajil Texcoco. Teʼ kʼiinoʼoboʼ chéen sakbejoʼob yaan teʼ kaajoʼ. Suuk u yilaʼal máakoʼob taaljaʼan yéetel u koonoloʼob yóokʼol u burroʼob. Toʼoneʼ jach óotsiloʼon kaʼachi. Nueve paalaloʼon; teen u sieteil. K-taata kaʼacheʼ ku yutskíintik xanab de kʼéewel utiaʼal u tséentikoʼon. Baʼaleʼ kíim le yaanten siete jaʼaboʼoboʼ. Desde teʼ kʼiinoʼ k-maamaeʼ tu xupuba meyaj t-oʼolal.

In abueloeʼ ku paxik violín yéetel letiʼ nuʼuktik junpʼéel orquesta ku paax teʼ iglesiaʼoboʼ. Óoliʼ tuláakloʼon ichil in familia ku paxik junpʼéel nuʼukul paax. In maamaeʼ ku kʼaay kaʼach ichil u coroil le Iglesiaoʼ, in tíoeʼ ku paxik piano yéetel ku kʼaay ichil junpʼéel orquesta. Láaj catolicoʼon kaʼachi. Teneʼ monaguilloen, kin wáantik kaʼach le sacerdoteoʼ, yéetel in tukultmaj kaʼach in beetkinba misioneroil, baʼaleʼ uts tin tʼaan xan in chaʼantik u peliculail karate. Úuchik in chaʼantikeʼ tu beetaj u kʼastal in modos.

Tu kaajil Pueblaeʼ, ooken xook tiʼ junpʼéel escuela católica ku meyaj bey seminarioeʼ. In kʼáat kaʼach in beetinba sacerdoteil, baʼaleʼ le jach taʼaytak in tsʼoʼoksik in xookeʼ tu lúuʼsaj in wóol le Iglesia Catolicaoʼ. Juntúul x-lóoʼbayan monjaeʼ jach ku chokʼkubaten, baʼaleʼ maʼ tin wóotaj mix baʼal yéeteliʼ. Kex beyoʼ tu beetaj in tsʼíiboltik u tsʼoʼokol in beel. Tin tsʼáaj cuenta xaneʼ yaʼab sacerdoteʼobeʼ chéen kaʼapʼéel ichoʼob. Ka máan kʼiineʼ xuʼul in tsʼíiboltik in beetik in sacerdoteil.

Baʼax tin beeteʼ ooken xook teʼ Conservatorio Nacional de Música tu Noj Kaajil Méxicooʼ. Le ka tin tsʼoʼoksaj in  xookeʼ tsʼoʼok in beel, ka anchaj kantúul in paalal. Utiaʼal in náajaleʼ kin kʼayik misa teʼ iglesiaoʼ.

Desde ka tsʼoʼok k-beeleʼ chéen baʼateʼel k-beetik. Jach kʼaas bix k-bisikba, maases tumen celosoʼon. Tu káajbaleʼ chéen k-baʼateltʼaan, baʼaleʼ ka tsʼoʼokeʼ joʼopʼ k-jatsʼikba hasta ka t-pʼatajkba. Tu tsʼookeʼ t-divorciartajkba trece jaʼaboʼob tsʼoʼokok k-beel.

Le yáax ka tsikbalnajen yéetel juntúul u j-jaajkunaj Jéeobaeʼ láayliʼ kajaʼanen kaʼach yéetel in wataneʼ. Kaʼatúul x-Jaajkunajoʼobeʼ tʼaanajoʼob tin wotoch, ka tu yaʼaloʼob jeʼel u tsʼáaikoʼobten xook yéetel le Bibliaoʼ. Tin tuklaj kaʼacheʼ yaʼab baʼax in wojel yoʼolal religión, le oʼolal káaj in xook utiaʼal in weʼesiktiʼob maʼ jaaj baʼax ku yaʼalikoʼobiʼ. Tin beetaj kʼáatchiʼob tin tuklaj minaʼan u núukiloʼob, baʼaleʼ letiʼobeʼ tu núukoʼobten yéetel le Bibliaoʼ. Jujunpʼíitil tin tsʼáaj cuenta mix baʼal in wojel kaʼachi. Baʼaleʼ in wataneʼ jach kʼasaʼan yéetel le j-Jaajkunajoʼoboʼ yéetel teneʼ jach yaʼab baʼax kin beetik, ka tin pʼataj in xook.

Ka máan cinco jaʼaboʼobeʼ, le kajakbalen kaʼach yéetel Elvira, uláakʼ koʼoleleʼ, kaʼa tsikbalnajen yéetel u j-jaajkunajoʼob Jéeoba. Elviraeʼ maʼ kʼaas u yilik in xook yéetel le j-Jaajkunajoʼoboʼ, le oʼolal maʼ jach talamchajten u seguer in xookiʼ. Kex beyoʼ tu bisajten yaʼab jaʼaboʼob in wutskíintik in kuxtal.

Tin tsʼáaj cuentaeʼ wa tu jaajil in kʼáat in meyajt Jéeobaeʼ kʼaʼabéet in beetik nojoch kʼeexoʼob ichil in kuxtal. Yáaxeʼ anchaj in xulik in kʼaay teʼ iglesiaoʼ yéetel tin kaxtaj uláakʼ meyaj (Apocalipsis 18:4). Tsʼoʼoleʼ anchaj u tsʼoʼokol in beel yéetel Elvira.

Baʼaleʼ jach kʼaas in pʼuʼujul kaʼachi; leloʼ junpʼéel tiʼ le baʼaxoʼob maas talamchaj in pʼatkoʼ. Yaan kaʼapʼéel teksto jach tu yáanten: Salmo 11:5 tuʼux ku yaʼalikeʼ Jéeobaeʼ u pʼekmaj «le meyaj looboʼ», yéetel 1 Pedro 3:7 tuʼux ku yaʼalikeʼ wa in kʼáat ka uʼuyak in oración tumen Jéeobaeʼ kʼaʼabéet in weʼesik tsiikil tiʼ in watan. Jach tuukulnajen tiʼ le tekstoʼoboʼ ka tin kʼáat óoltaj tiʼ Jéeoba ka u yáanten; jujunpʼíitileʼ hasta ka tin kanaj in controlartinba.

Bejlaʼeʼ yaan kiʼimak óolal ichil in wotoch. Jach kin wáantik in familia utiaʼal ka muʼukʼaʼanchajak u fejoʼob, baʼaleʼ táan xan in wilik in biskinba maʼalob yéetel in paalal anchaj yéetel in yáax atanoʼ.

Tin paalileʼ in kʼáat kaʼach in beetinba sacerdoteil yéetel in wáantik le máakoʼoboʼ. Bejlaʼeʼ kin wuʼuyik yaan u biilal in kuxtal. Utiaʼal in náajaleʼ kin kaʼansik paax uláakʼ máakoʼob. Jach kin tsʼáaik u nib óolalil tiʼ Jéeoba úuchik u yeʼesikten paciencia ikil tu yáantilen in wutskíint in kuxtal.