UTIAʼAL k-núukik le kʼáatchiʼaʼ koʼox tʼaan tiʼ kaʼapʼéel castigoʼob ku yaʼalik le Biblia tu taasaj Diosoʼ: le Búulkabal tu kʼiinil Noeoʼ yéetel u xuʼulsajil le cananeoʼoboʼ.

YAAN MÁAX AʼALIK: «Dioseʼ kʼasaʼan tumen tu kíimsaj yaʼabkach máakoʼob teʼ Búulkabaloʼ. Chéen tu salvartaj Noé yéetel u láakʼtsiloʼob».

LE BIBLIAOʼ KU YAʼALIK: Dioseʼ tu yaʼalaj: «Kin jalaʼachtʼantik tu yoʼolal in kuxtal maʼ in kʼáat ka kíimik le j-loolob wíinikoʼ, baʼaleʼ in kʼáat ka u kʼex u kuxtal tu yoʼolal u jechik le kíimiloʼ» (Ezequiel 33:11). Jeʼex k-ilkoʼ junpuliʼ maʼ kiʼimakchaj u yóol Dios úuchik u xuʼulsik le kʼasaʼan máakoʼob tu kʼiinil Noeoʼ. ¿Baʼaxten túun tu xuʼulsoʼob?

Le Bibliaoʼ ku yaʼalikeʼ le castigoʼob tu taasaj Dios úuchjeakiloʼ «tu yeʼesaj baʼax kun úuchul tiʼ le máaxoʼob ku tsʼáaikubaʼob tu contraoʼ» (2 Pedro 2:5, 6). ¿Baʼax túun kun úuchultiʼob?

Kex ku yaatal u yóol u xuʼulsik wa máaxeʼ, Dioseʼ yaan u kʼáatik cuenta tiʼ le máaxoʼob beetik baʼaloʼob kʼaastakoʼ. Maʼ tun xáantaleʼ yaan u xuʼulsik le muʼyajil yéetel le kʼasaʼaniloʼ.

Baʼaleʼ Dioseʼ táanil tiʼ u taasik junpʼéel castigoeʼ mantatsʼ ku tsʼáaik u yojéelt wíinik. Noeeʼ tu yaʼalaj tiʼ le kʼasaʼan máakoʼob ka u kʼex u kuxtaloʼoboʼ. Baʼaleʼ jeʼex u yaʼalik le Bibliaoʼ: «Maʼ tu beetoʼob u cuentail baʼax aʼalaʼabtiʼobiʼ, tak le kʼiin ka taal le Búulkabaloʼ ka túun láaj xuʼulsaʼaboʼob» (Mateo 24:39).

Juntéenjeak xaneʼ Dioseʼ tu yaʼalaj tiʼ le israelitaʼoboʼ wa ku káajal u beetkoʼob jeʼex le kʼasaʼan kaajoʼob yaan tu baʼpachoʼoboʼ yaan u chaʼik u chʼaʼabal u luʼumoʼob, u xuʼulsaʼal u noj kaajil Jerusalén yéetel u bisaʼaloʼob palitsiltbil. Kex beyoʼ le israelitaʼoboʼ kʼaschajoʼob; kʼuch tak u kíims u paalaloʼob utiaʼal u kʼuboʼob tiʼ beetbil diosoʼob. ¿Chéen wa tu yilaj Dios baʼax ku beetkoʼob? Maʼ. Yaʼab u téenel tu túuxtaj u profetaʼob utiaʼal u kʼaʼajsik u yiikʼoʼob. Letiʼeʼ tu yaʼalaj: «Mix juntéen ku beetik wa baʼax Yuumtsil [Jéeoba] wa maʼ tu tsʼáaik ojéeltbil tumen u palitsiloʼob le [profetaʼoboʼ]» (Amós 3:7).

BAʼAXTEN KʼAʼABÉET A WOJÉELTIK U NÚUKIL: Le baʼaxoʼob u beetmaj Dios úuchjeakiloʼ ku tsʼáaiktoʼon esperanza, tumen k-ojleʼ Dioseʼ yaan u xuʼulsik le kʼasaʼan máakoʼob beetik k-muʼyajoʼ. Le Bibliaoʼ ku yaʼalik: «Tu jaajileʼ le loolob  máakoʼoboʼ bíin tojolchʼintaʼakoʼob [...]. Baʼaleʼ le kabal óoloʼoboʼ bíin u tiaʼalintoʼob le luʼumaʼ, bíin kuxlakoʼob ichil nojoch jeetsʼel óolal» (Salmo 37:9-11). ¿Baʼax ka tuklik yoʼolal le xuʼulsaʼajil ken u taas Dios utiaʼal u luʼsik le muʼyajiloʼ? ¿Kʼasaʼan wa Dios beyoʼ, wa ku chʼaʼik óotsilil?

YAAN MÁAX AʼALIK: «Jach kʼasaʼan Dios tumen tu xuʼulsaj le cananeoʼoboʼ; leloʼ bey jeʼex le báankíimsaj ku beetik le kʼasaʼan máakoʼob bejlaʼoʼ».

LE BIBLIAOʼ KU YAʼALIK: «U meyajoʼobeʼ sen maʼalobtak, baʼaxoʼob ku beetikeʼ tojtak. Letiʼ u [Diosil] jaaj; tiʼ letiʼeʼ minaʼan baʼax maʼ tu beeliʼ» (Deuteronomio 32:4). Dioseʼ ken u beet justiciaeʼ maʼ tu beetik jeʼex u beetik wíinikeʼ. ¿Baʼaxten? Tumen Dioseʼ u yojel baʼax yaan tu puksiʼikʼal cada juntúul máak.

Jeʼex le ka tu chʼaʼtuklaj Dios u xuʼulsik Sodoma yéetel Gomorraeʼ, Abrahaneʼ taakchaj u yojéeltik wa maʼalob le baʼax ken u beet Diosoʼ. U yojleʼ Dioseʼ maʼ ken u xuʼuls utsul máakoʼob paʼteʼ yéetel le j-kʼebanoʼoboʼ. Dioseʼ yéetel paciencia tu yuʼubaj Abrahán, ka tu yaʼalajtiʼ jeʼel u perdonartik u kaajil Sodoma wa ka yanak kex diez máakoʼob toj u kuxtaloʼobiʼ (Génesis 18:20-33). Dioseʼ tu yilaj chéen kʼaas yaan tu puksiʼikʼal le máakoʼoboʼ ka tu tsʼáaj cuentaeʼ jach minaʼan utskíinajil tiʼob (1 Crónicas 28:9).

Bey úuchik u beetik xan yéetel le cananeoʼoboʼ; tu yilaj chéen kʼaas yaan tu puksiʼikʼaloʼob, le oʼolal tu yaʼalaj ka xuʼulsaʼakoʼob. Le cananeoʼoboʼ jach kʼaj óoltaʼaboʼob yoʼolal u kʼasaʼaniloʼob, hasta ku tóokik u paalaloʼob kuxaʼanoʼob utiaʼal u kʼuboʼob tiʼ u diosoʼob (2 Reyes 16:3). * Le cananeoʼoboʼ u yojloʼob kaʼacheʼ Jéeobaeʼ u yaʼalmaj tiʼ le israelitaʼob ka u chʼaʼob tuláakal u luʼumil Canaanoʼ. Le máaxoʼob pʼáatoʼob yéetel baʼateʼelnajoʼob yoʼolal u luʼumoʼoboʼ tu contra Jéeoba tu tsʼáajubaʼob, tumen kex táan u yilkoʼob letiʼ kanáantik le israelitaʼoboʼ, baʼatelnajoʼob tu contraʼob.

Tsʼoʼoleʼ Jéeobaeʼ tu chʼaʼaj óotsilil tiʼ le cananeoʼob tu kʼexaj u kuxtaloʼoboʼ. Jeʼex Rahab le x-kʼeban koʼoleleʼ salvartaʼab yéetel u láakʼtsiloʼob. U kajnáaliloʼob Gabaón xaneʼ tu kʼáat óoltoʼob ka chʼaʼabak óotsilil tiʼob, le oʼolal salvartaʼaboʼob yéetel u mejen paalaloʼob (Josué 6:25; 9:3, 24-26).

BAʼAXTEN KʼAʼABÉET A WOJÉELTIK U NÚUKIL: Yaan baʼax jach kʼaʼanaʼan k-kanik tiʼ le castigo tsʼaʼab tiʼ le cananeoʼoboʼ. K-kanikeʼ jach séebaʼan u bin u taal u «kʼiinil u xuʼulsaʼal tiʼ le kʼasaʼan máakoʼoboʼ» (2 Pedro 3:7). Wa k-yaabiltmaj Jéeobaeʼ yaʼab utsiloʼob ken k-kʼame. Tumen ken xuʼulsaʼak le máaxoʼob maʼ u kʼáat u kʼamoʼob u gobernación Jéeobaoʼ, yaan u xuʼulul xan le muʼyajiloʼ.

Jéeobaeʼ ku yaʼalikeʼ le baʼax ku chʼaʼtuklik le taatatsiloʼoboʼ jeʼel u taasik utsil wa kʼaasil tiʼ u paalaloʼobeʼ. Dioseʼ ku yaʼalik: «Yéeyeʼex túun le kuxtal utiaʼal ka kuxlakeʼex yéetel a chʼiʼibaleʼexoʼ; yaabilteʼex Yuumtsil a [Dioseʼex], uʼuyajtʼanteʼex, maʼ a kʼexkeʼex tumen chéen bey bíin páatak a kuxtaleʼe[xoʼ]» (Deuteronomio 30:19, 20). ¿Máasaʼ le tʼaanoʼobaʼ maʼ tu yeʼesik wa kʼasaʼan Diosiʼ? Maʼ. Baʼax ku yeʼesikeʼ Dioseʼ u yaabiltmaj wíinikoʼob yéetel u kʼáat ka xiʼik utsil tiʼob.