YAAN MÁAX AʼALIK: «Míin kʼasaʼan Dios, tumen kex táan u gobernartik yóokʼol kaabeʼ maʼ tu beetik mix baʼal utiaʼal maʼ u yúuchul nukuch loobiloʼob».

LE BIBLIAOʼ KU YAʼALIK: «U túulisil yóokʼol kaabeʼ tiʼ yaan yáanal u páajtalil le j-Kʼasaʼanoʼ» (1 Juan 5:19). ¿Máax túun le «j-Kʼasaʼanoʼ»? Le Bibliaoʼ ku yaʼalikeʼ Satanás le Kʼaasilbaʼaloʼ (Mateo 13:19; Marcos 4:15). ¿Jach wa tu jaajil Satanás gobernartik le Luʼumaʼ? Letiʼ. Le oʼolal ku beetik u tsʼuʼuttal le máakoʼoboʼ, u nojbaʼalkúuntkubaʼob yéetel u kaxtikoʼob chéen u yutsiloʼob, jach jeʼex u beetik letiʼoʼ. ¿Máasaʼ lelaʼ ku yáantkoʼon k-naʼat baʼaxten maʼatech u kanáantaʼal le Luʼum tumen le máakoʼoboʼ? Le oʼolal yaʼab cientificoʼobeʼ ku yaʼalikoʼobeʼ táan u maas yaʼabtal le nukuch loobiloʼob yéetel u maas yantal u muukʼoʼob; ku yaʼalikoʼob xaneʼ táan u pʼáatal maas maʼ tu páajtal u kanáantkuba máak tiʼ le nukuch loobiloʼoboʼ.

¿Baʼaxten túun ku chaʼik Dios u gobernar le Kʼaasilbaʼaloʼ? Lelaʼ yaan baʼax u yil yéetel le yáax wíinikoʼob tu tsʼáajubaʼob tu contra Diosoʼ: Adán yéetel Eva. Desde leloʼ yaʼab máakoʼob tsʼoʼok u beetkoʼob jeʼex letiʼobeʼ. Úuchik u tsʼaʼabal juntséelil u gobernación Dioseʼ le yóokʼol kaabaʼ pʼáat tu kʼab Satanás, le máax pʼekmil Diosoʼ. Jeʼex tu yaʼalil Jesusoʼ, u «gobernanteil le yóokʼol kaaboʼ» letiʼe Kʼaasilbaʼaloʼ (Juan 14:30). ¿Mantatsʼ wa kun gobernar le Kʼaasilbaʼaloʼ? ¡Maʼatech!

Jéeobaeʼ * maʼ chéen ku yilik u muʼyaj máak tu kʼab le Kʼaasilbaʼaloʼ. U jaajileʼ jach ku chʼaʼiktoʼon óotsilil. Le Bibliaoʼ ku yaʼalikeʼ le ka muʼyajnaj u kaajil Israeleʼ tu «jáalkʼabtoʼob tu yoʼolal u yaabilaj yéetel u chʼaʼ óotsilil» (Isaías 63:9). Maʼ kun xáantal xaneʼ Dioseʼ yaan u xuʼulsik u gobernación le Kʼaasilbaʼaloʼ. Jéeobaeʼ tsʼoʼok u yéeyik Jesucristo utiaʼal u beetik u reyil utiaʼal mantatsʼ.

BAʼAXTEN KʼAʼABÉET A WOJÉELTIK U NÚUKIL: Satanaseʼ maʼ tu páajtal u kanáantik máak tiʼ le nukuch loobiloʼoboʼ, baʼaleʼ Jesuseʼ jeʼel u páajtal u beetkeʼ. Juntéenjeak le táan junpʼéel sen kʼaʼamkach iikʼeʼ Jesuseʼ tu kanáantaj u disipuloʼob. Le Bibliaoʼ ku yaʼalik: «Jesuseʼ [...] tu yaʼalaj tiʼ le kʼáaʼnáaboʼ: ‹¡Mak a chiʼ! ¡Jetsʼkúuntaba!›. Le iikʼ túunoʼ chʼéeni, ka jetsʼlaj tuláakal». Le disipuloʼoboʼ tu yaʼaloʼob: «¿Máax jach tu jaajil le máakaʼ? Tumen tak iikʼ yéetel kʼáaʼnáab uʼuyik u tʼaan» (Marcos 4:37-41). Lelaʼ ku yeʼesik baʼax ken u beet Jesús tu yoʼolal le utsul máakoʼob ken káajak u gobernar yóokʼol le Luʼumaʼ (Daniel 7:13, 14).