Yaʼab máakeʼ talam u biskuba yéetel u láakʼtsil u entenadoʼob. * Yanoʼobeʼ ku kʼaʼabéettal u tsikbaloʼob yéetel u taata wa u maama u entenadoʼob yoʼolal u xíimbaltaʼal le paalaloʼoboʼ, u kaʼansaʼaloʼob yéetel u tsʼaʼabal baʼax kʼaʼabéettiʼob. U láakʼtsiloʼob wa u amigoʼob le padrastro wa madrastraoʼ yaan horaeʼ ku talamtal u biskubaʼob yéetel le túumben láakʼtsiloʼoboʼ. Wa bey u yúuchultechoʼ ilawil bix jeʼel u yáantkech le tsolnuʼukoʼob ku tsʼáaik le Bibliaoʼ.

Judit, juntúul madrastra kajaʼan Namibiaeʼ, ku yaʼalik: «Juntéenjeakeʼ aʼalaʼab tiʼ in entenadoʼob tumen u maamaʼobeʼ wa ku yantal in paalaleʼ maʼ u yíitsʼnoʼobiʼ tumen teen bineʼ chéen uláakʼ koʼolel anchaj tiʼ u taataʼob. Leloʼ jach tu beetaj u yaatal in wóol, tumen teneʼ in yaabiltmaj in entenadoʼob bey jach in paalaloʼobeʼ».

Tsʼoʼok u yilaʼaleʼ maases letiʼe madrastra yéetel maamatsil ku talamtal u biskubaʼoboʼ. ¿Baʼax jeʼel u yáantkoʼobeʼ?

 Baʼax jeʼel a beetkeʼ: kanáant a familia. Wa maʼ ta chaʼik u yilaʼal le paal tumen u taata wa u maamaoʼ jeʼel a beetik kʼaas tiʼeʼ. * Kʼaʼajaktecheʼ wa maʼ tu yoʼolal le taatatsil wa maamatsiloʼ bejlaʼa minaʼan kaʼach le paaloʼ, tsʼoʼoleʼ jeʼel bixakeʼ láayliʼ u láakʼtsileʼ (Proverbios 23:22, 25). Baʼaleʼ kʼaʼabéet xan a kanáantik maʼ u jach okskuba le taatatsil wa maamatsil ichil a kuxtaleʼexoʼ, wa maʼeʼ jeʼel a beetik u tsʼíikil a núupeʼ. Kex yaan a wáantik tak tuʼux ku páajtaleʼ unaj a kanáantik xan le familia yaantech beoraoʼ.

BAʼAX JEʼEL U BEETIK LE TAATATSILOʼOBOʼ

• Ken tʼaanakech yéetel le a núup kaʼachoʼ, tsikbalnen chéen yoʼolal a paalaleʼex, maʼ a sen tsikbal tiʼ yaanal baʼaloʼob. Maʼ xaaneʼ maʼalob ka a tsikbalteʼex baʼax kʼiin yéetel baʼax hora jeʼel u páajtal u tʼaʼanal le paalal tiʼ telefonooʼ. Leloʼ maas maʼalob ke ka tʼaʼankoʼob chéen jeʼel baʼaxak hora wa le tsʼoʼok u jach áakʼabtaloʼ.

• Wa maʼ ta wéetel pʼáat le paalaloʼ, maʼ xaaneʼ jeʼel u páajtal a tʼankoʼob tiʼ teléfono, a túuxtik mensaje, correo wa carta tiʼobeʼ, beyoʼ maʼ kun xuʼulul a biskaba tu yéeteloʼob (Deuteronomio 6:6, 7). Yanoʼobeʼ ku meyaj videoconferencia tiʼob. Kex jeʼel bixak ka tʼaanakech yéetel le paalaloʼ, ilawil a wojéeltik baʼax ku yúuchultiʼob wa bey baʼax kʼaʼabéettiʼobeʼ, yéetel tsol u nuʼuk tiʼob. Beyoʼ jeʼel a wáantik a paalal maas tiʼ le ka tuklikoʼ.

BAʼAX JEʼEL U BEETIK LE MADRASTRAOʼ

• Eʼes tiʼ le maamatsiloʼ maʼ táan a tokik u yaabilaj u paalaliʼ, beyoʼ yaan a weʼesik ka naʼatik bix u yuʼubikuba (1 Pedro 3:8). Tsʼáa u yojéelt bix u beel u paalal, tʼaanen tiʼ le baʼaloʼob maʼalobtakoʼ (Proverbios 16:24). Wa kʼaʼabéet a wojéeltik wa baʼax yoʼolal le paalaloʼ, kʼáat tiʼ le maamatsiloʼ; ken u yáantecheʼ tsʼáa u diosboʼotikil tiʼ.

• Maʼ a jach méekʼik mix a tsʼuʼutsʼik le paalal tu táan u maamaoʼ. Beverly, juntúul madrastra kajaʼan Estados Unidoseʼ, ku yaʼalik: «In entenadoʼob maas mejentakoʼ u kʼáat kaʼach u yaʼaloʼobten ‹mami›. T-aʼalajtiʼobeʼ maʼalob, baʼaleʼ maʼ tu táan Jane u maamaʼobiʼ, mix tu táan u láakʼtsiloʼob Jane. Desde teʼ kʼiinoʼ chan maʼalobchaj bix in biskinba yéetel u maama in entenadoʼob. Yaan kʼiineʼ hasta k-múul meyaj utiaʼal k-áantik le paalal ken tsʼaʼabak u beetoʼob obra de teatro teʼ escuelaoʼ wa ken bisaʼakoʼob xíimbal yéetel u yéet xookoʼob».

BIX JEʼEL U BISKUBA MAʼALOB LE MAAMATSIL YÉETEL LE MADRASTRAOʼ

• Maʼ a waʼalik baʼal tiʼ le maamatsil wa madrastraoʼ, tumen jeʼel a beetik u chiʼichnaktal u paalaloʼ. Tsʼoʼoleʼ jeʼel tak u kʼuchul u kʼiinil u yaʼalikoʼob tiʼ u maamaʼob wa tiʼ u madrastraʼobeʼ (Eclesiastés 10:20). Wa juntúul paal ku yaʼaliktech tsʼoʼok u tʼaan kʼaas u maama wa u madrastra ta woʼolaloʼ maʼ a tuukul chéen ta woʼolal, kʼáat tiʼ le paal bix u yuʼubikuba tu yoʼolal le baʼax aʼalaʼaboʼ. Maʼ xaaneʼ jeʼel u páajtal a waʼalik beyaʼ: «Maʼ a chéen tuklik. Míin chéen jach kʼuuxilnajaʼan le ka tu yaʼaloʼ. Ken  kʼuuxilnak máakeʼ yaan horaeʼ ku yaʼalik baʼaloʼob maʼ unajiʼ».

• Kaʼanstiʼob ka u beetoʼob baʼaloʼob maʼalobtak ta wotoch bey xan tu yotoch u maamaʼob wa madrastraʼob. Mix juntéen unaj a taasik mix baʼalil le maamatsil wa madrastra yoʼolal le tsolnuʼukoʼob ku tsʼáaik tiʼ le paaloʼ. Ilawil baʼax jeʼel u yúuchleʼ:

  Madrastra: Rober, much leʼe a toalla tsʼoʼok u meyajtechoʼ.

  Rober: Si tu yotoch in maamaeʼ letiʼ láaj leʼik le toallaʼoboʼ.

  Madrastra (tsʼíikilnajaʼan): Aan, ¿beyoʼ? Le oʼolal túun maʼakʼóolech.

  Maas maʼalob ka u núuk máak beyaʼ:

  Madrastra (maʼ tsʼíikilnajaʼaniʼ): Aan, maʼalob. Baʼaleʼ wayeʼ cada juntúul ku leʼik u toalla.

• Maʼ a tsʼáaiktiʼ u beet wa baʼax teʼ súutuk jóoʼsaʼan utiaʼal u tsikbal yéetel u maamaoʼ (Mateo 7:12). Wa yaan baʼax jach kʼaʼabéeteʼ, kʼáat permiso tiʼ u maama táanil tiʼ a waʼalik tiʼ le paal baʼax a kʼáat ka u beetoʼ.

Le libro Step Warsoʼ ku tsikbaltik baʼax tu yaʼalaj juntúul koʼolel yaan u entenadoʼob tsʼoʼok u nuuktaloʼob. Le íichamtsiloʼ jach ku defendertik u paalal yéetel maʼ tu creertik wa kʼasaʼanoʼob yéetel u madrastraʼob. «¡Jach ku beetik in pʼuʼujul!», ku yaʼalik le koʼoleloʼ. Wa bey u yúuchultechoʼ, ¿baʼax jeʼel a beetik utiaʼal maʼ a pʼuʼujul yéetel a núupeʼ?

Baʼax jeʼel a beetkeʼ: Yanaktech paciencia. Le Bibliaoʼ ku yaʼalik: «Cada juntúul máakeʼ maʼ u seguer u kaxtik chéen u yutsil, baʼaxeʼ u yutsil u yéet máakil» (1 Corintoiloʼob 10:24). Ilawil a naʼatik bix u yuʼubikuba u maasil. Le entenado tsʼoʼok u nojochtaloʼ sajak u xuʼulul u yaabiltaʼal tumen u taata. Jeʼel tak u tuklikeʼ wa ka u yaabiltecheʼ bey ka u tsʼáa juntséelil u jach láakʼtsiloʼobeʼ. Le taatatsiloʼob xanoʼ maʼ xaaneʼ sajak u tsoloʼob u nuʼuk tiʼ u paalaloʼob tumen ku tuklikoʼobeʼ jeʼel u náachkuntikoʼob tiʼ letiʼobeʼ.

Maʼ a obligartikoʼob u bisubaʼob ta wéetel; jujunpʼíitil ken u beetoʼob. Mix máak ku páajtal u obligartaʼal u yaabilt uláakʼ máak (El Cantar de los Cantares 8:4). Le oʼolaleʼ yanaktech paciencia yéetel a entenadoʼob. Maʼ a páaʼtik u jáan káajal u biskubaʼob ta wéetel.

Kex ka u beetoʼobtech u kʼasaʼaniloʼobeʼ maʼ mantatsʼ unaj a waʼalik bix a wuʼuyikabaiʼ (Proverbios 29:11). Ken talamchajaktech a controlartik a tʼaaneʼ, payalchiʼinen jeʼex tu beetil rey Davideʼ: «Yuumtsil, tsʼáa juntúul máax kanáantik in chiʼ ka u kanáant maʼ u jeʼepajal in chiʼ» (Salmo 141:3).

Wa ka chʼaʼtuklik a pʼáatal kajtal teʼ naj tuʼux líikʼ le paalaloʼoboʼ, yaan a wilkeʼ jach u yaabiltmaj u yotochoʼob. Le oʼolaleʼ tak tuʼux ku páajtaleʼ maʼ a  beetik yaʼab kʼeexoʼob teʼ najoʼ, maases teʼ tuʼux ku weenloʼoboʼ. Maʼ xaaneʼ jeʼel u páajtal xan a bineʼex kajtal táanxel najileʼ.

Marion, juntúul madrastra kajaʼan Canadaeʼ, ku yaʼalik: «U suukileʼ in taataʼobeʼ ku síikoʼob wa baʼax tiʼ in hijo, baʼaleʼ maʼ bey u beetik yéetel u paalal in wíichamiʼ le oʼolal ku kʼaʼabéettal k-maniktiʼob, baʼaleʼ yaan kʼiineʼ minaʼantoʼon u tojol».

Baʼax jeʼel a beetkeʼ: Tsʼáatáant le familia yaantech beoraaʼ. Tsʼáa u yojéelt a láakʼtsiloʼob yéetel a amigoʼobeʼ le familia yaantech beoraaʼ jach kʼaʼanaʼan a tiaʼal (1 Timoteo 5:8). Maʼ tu páajtal u jáan yaabiltaʼal a túumben familia tumen a láakʼtsiloʼob yéetel a amigoʼob, baʼaleʼ jeʼel u páajtal a waʼaliktiʼob maʼ u beetik u kʼasaʼaniloʼobeʼ. Aʼaltiʼobeʼ jeʼel u yaatal u yóol le paalal wa maʼ tu beetaʼal u cuentailoʼoboʼ.

Chaʼa tiʼ le abuelotsiloʼob ka u bisubaʼob yéetel u yáabiloʼoboʼ. Susan, juntúul maamatsil kajaʼan Inglaterraeʼ ku yaʼalik: «Dieciocho meses kíimik in yáax íichameʼ, tsʼoʼok in beel tu kaʼatéen. U láakʼtsiloʼob in wíicham kaʼachoʼ talamchaj u biskubaʼob yéetel in túumben íichamoʼ. Baʼaleʼ káaj k-bisikba maʼalob tu yéeteloʼob le ka joʼopʼ u tʼaʼanloʼob tiʼ teléfono tumen le paalaloʼoboʼ, bey xan le ka joʼopʼ k-tsʼáaik u diosboʼotikil tiʼob yoʼolal u yáantajoʼoboʼ».

Jach talam u biskuba máak yéetel u maasil ken yanak uláakʼ familia tiʼ. Baʼaleʼ wa ka beetik baʼax ku yaʼalik le Bibliaoʼ yaan u bintech utsil, tumen jeʼex u yaʼalikoʼ: «Yéetel ojéelaj ku beetaʼal naj, yéetel kʼaj óolaleʼ ku tsʼaʼabal u chuunpakʼil» (Proverbios 24:3).