TIʼ U YÁAX TÁAN JUʼUNIL: LE KʼIIN KEN XUʼULUK LE PʼEKTAJILOʼ
Pʼektajil, tuláakal tuʼux yaan
JONATHAN, juntúul coreano síij Estados Unidoseʼ, chʼaʼpʼektaʼab tu chichnil yoʼolal u raza. Ka nojochchajeʼ joʼopʼ u kaxtik tuʼux u bin utiaʼal maʼ u pʼektaʼal chéen yoʼolal bix u yilaʼal wa chéen yoʼolal tuʼux u taal. Kʼuch u beetuba doctoril tiʼ junpʼéel kaaj yaan tu xamanil Alaska (Estados Unidos). Yaʼab tiʼ le kʼojaʼanoʼob ku taaloʼob yiknaloʼ chíikaʼanoʼob tiʼ letiʼ. Le coreanoaʼ tu tukleʼ teʼ kaaj tuʼux ku muʼyajtik keʼelaʼ náach yanil tiʼ le pʼektajil ku muʼyajtik kaʼachoʼ.
Baʼaleʼ junpʼéel kʼiineʼ jach lúub u yóol le táan u yáantik juntúul koʼolel kʼojaʼan yaan 25 jaʼaboʼob tiʼoʼ. Ka suunaj tu yóol le koʼolelaʼ tu paktaj u yich Jonathaneʼ ka poochʼilnaji; le baʼax tu yaʼaloʼ ku yeʼesik jach kʼaas u lúubul le coreanoʼob tiʼoʼ. Yoʼolal le baʼax úuchoʼ Jonathaneʼ tu tsʼáaj cuenta chéen kunel úuchik u bin kajtal táanxel tuʼux.
Le baʼax úuch tiʼ Jonathanoʼ ku yeʼesik tuláakal tuʼux yaan pʼektajil way yóokʼol kaabeʼ. Jeʼel tuʼuxak ka u sutuba máakeʼ yaan máax ku pʼektaʼal.
Kex yaʼab pʼektajil yaneʼ óoliʼ tuláakal máak u yojel maʼ maʼalobiʼ. ¿Baʼaxten túun ku yúuchul leloʼ? Tumen yaʼabeʼ kex u yojel kʼaas le pʼektajiloʼ maʼ tu éejemtik wa ikil u tsʼáaik juntséelil wa máaxeʼ táan u pʼektik beyoʼ. ¿Jeʼel wa xan u yúuchultech beyoʼ? ¿Bix jeʼel a wojéeltikeʼ?
TECHEʼ ¿KA PʼEKTAJ WA?
Talam u tsʼáaik cuenta máak wa táan u pʼatik juntséelil wa máax. Le Bibliaoʼ ku yaʼalik baʼaxten: «Minaʼan uláakʼ baʼal ku tuus yéetel sen kʼasaʼaneʼ jeʼel bix u puksiʼikʼal wíinikeʼ» (Jeremías 17:9). Le oʼolaleʼ jeʼel k-tusikba wa ka k-tukult jach junpuliʼ mix máak k-pʼekmaj bey xan wa ka k-tukult maʼalob ka k-pʼekt wa máaxeʼ.
Wa tiaʼanech teʼelaʼ ¿bix jeʼel a wuʼuyikaba ken a wil le máakoʼobaʼ?
Utiaʼal a wilik talam u tsʼáaik cuenta máakeʼ, koʼox ketik beyaʼ: Éeʼjochʼeʼen táan a bin ta juunal tiʼ junpʼéel bej. Kaʼatúul máakoʼob maʼ a kʼaj óoloʼobeʼ táan u náatsʼloʼob ta wiknal. Muʼukʼaʼanoʼob; tsʼoʼoleʼ juntúuleʼ bey yaan baʼax u machmeʼ.
Chéen tu yoʼolal leloʼ, ¿jeʼel wa a tuklik yaan u beetkoʼobtech loobeʼ? Maʼ xaaneʼ yoʼolal le baʼaxoʼob a wuʼuymaj ku sen úuchloʼ ka tuklik unaj a kanáantkaba. Baʼaleʼ ¿jach wa tu jaajil yaan u beetaʼaltech loob tumen le kaʼatúul máakoʼobaʼ? Maʼ xaaneʼ jeʼel a tuklikeʼ: «¿Máax le máakoʼobaʼ? ¿Tuʼux u taaloʼob?». Le bix ken a núukikoʼ yaan u yeʼesik wa yaan máaxoʼob jelaʼan a paktik wa a pʼekmaj kex maʼ ta tsʼáaik cuenta.
U jaajileʼ ichil u puksiʼikʼal tuláakal máakeʼ jeʼel u yuʼubik yaan máax maʼ tu lúubul utsil tiʼeʼ. Le oʼolal tak le Bibliaoʼ ku yaʼalik: «Le wíinikoʼ chéen ku paktik le wíinkliloʼ» (1 Samuel 16:7). Tu yoʼolal lelaʼ yaan horaeʼ jeʼel k-beetik u muʼyaj wa máaxeʼ. Bey túunoʼ wa tiʼ tuláakal máak ku yúuchul leloʼ, ¿yaan wa baʼax jeʼel k-beetik utiaʼal maʼ k-pʼektik mix máakeʼ? ¿Yaan wa u kʼuchul u kʼiinil k-ilik u xuʼulul le pʼektajiloʼ?
