Adán, le yáax wíinikoʼ, kuxlaj u cientosil jaʼaboʼob. Baʼaleʼ chʼíiji ka kíimi. Desde leloʼ máakeʼ yaʼab baʼax tsʼoʼok u beetik utiaʼal maʼ u chʼíijil. Kex beyoʼ mix máak púutsʼuk tiʼ le kíimiloʼ. ¿Baʼaxten? Adaneʼ chʼíiji yéetel kíimi tumen kʼebanchaj úuchik maʼ u yuʼubik u tʼaan Dios. Toʼon xaneʼ k-chʼíijil yéetel k-kíimil tumen Adán máanstoʼon le kʼebanoʼ. (Xok Génesis 5:5; Romailoʼob 5:12.)

Utiaʼal k-kuxtal minaʼan u xuuleʼ kʼaʼabéet máax tsʼáaik junpʼéel boʼol t-oʼolal (Job 33:24, 25). Jeʼex le boʼol ku tsʼaʼabal yoʼolal juntúul máak secuestradoeʼ bey le boʼol anchaj u tsʼaʼabal utiaʼal k-jáalkʼabtaʼal tiʼ le kíimiloʼ (Éxodo 21:29, 30). Jesuseʼ letiʼ tsʼáa le boʼol le ka kíimoʼ. (Xok Juan 3:16.)

Maʼ tuláakal máak kun salvartbil tiʼ le kʼojaʼanil yéetel tiʼ le chʼíijiloʼ. U jaajileʼ tuláakal máax maʼ tu yuʼubik u tʼaan Dios, jeʼex Adaneʼ, yaan u luʼsaʼal u páajtalil u kuxtal minaʼan u xuul. Chéen le máaxoʼob ku perdonartaʼaloʼob kun tsʼaabil kuxtal minaʼan u xuul tiʼoboʼ. (Xok Isaías 33:24; 35:3-6.)

Utiaʼal k-perdonartaʼaleʼ kʼaʼabéet k-kʼaj óoltik Dios ikil k-xokik le Bibliaoʼ. Teʼeloʼ tiʼ ku yaʼalik bix jeʼel k-kuxtal maas maʼalobeʼ yéetel bix jeʼel k-lúubul utsil tu táan utiaʼal ka u tsʼáatoʼon kuxtal minaʼan u xuuleʼ. (Xok Juan 17:3; Baʼaxoʼob 3:19.)