Estelleʼ * suuk kaʼach u bin iglesia yéetel tuláakal u paalal. Letiʼeʼ ku yaʼalik: «Tin waʼalaj tiʼ u nojchil le iglesiaoʼ in kʼáat kaanbal tiʼ le Bibliaoʼ». Baʼaleʼ maʼ beetaʼab u cuentailiʼ. Tu tsʼookeʼ xuʼul u biniʼ. «U nojchiloʼob le iglesiaoʼ —ku yaʼalik— tu yaʼaloʼobten tiʼ junpʼéel cartaeʼ wa maʼ tu páajtal in bineʼ kex chéen ka in túuxt taakʼin tiʼob. Tin tsʼáaj cuentaeʼ baʼaliʼ u kʼáattiʼob wa maʼ tin bineʼ, chéen taakʼin u kʼáatoʼob.»

Angelina, juntúul koʼolel jach religiosaeʼ, ku yaʼalik: «Teʼ iglesia tuʼux kin bin kaʼachoʼ óoxtéen ku máansaʼal le chan xaakoʼ. U kʼáatoʼobeʼ cada ken máansaʼakeʼ ka k-tsʼáa taakʼiniʼ. Mantatsʼ táan u kʼáatkoʼob taakʼin. Yaan kʼiineʼ kin tuklik: ‹Le máakoʼobaʼ maʼ táan u nuʼuktaʼaloʼob tumen Diosiʼ›».

Le religionoʼob teʼ tuʼux kajaʼanechoʼ ¿ku sen kʼáatkoʼob wa taakʼin tiʼ máak? ¿Ku kaxtikoʼob wa u modoil u jóoʼskoʼob taakʼin tiʼ máak? ¿Bey wa u kaʼansik le Biblia ka beetaʼakoʼ?

Jesús, le máax káajs le cristianismooʼ, tu yaʼalaj: «Siibil ta kʼamileʼex; siibil xan ka a tsʼáaʼex» (Mateo 10:8). Le baʼax ku yaʼalik le Bibliaoʼ maʼ utiaʼal konbiliʼ; tiʼ tuláakal máak unaj u yantal u páajtalil u kʼaj óoltik.

Le yáax cristianoʼoboʼ ¿tuʼux tu chʼaʼajoʼob le taakʼin kʼaʼabéetchaj tiʼ le múuchʼuliloʼ?

Le Bibliaoʼ ku yaʼalikeʼ cada juntúuleʼ áantajnaj «jeʼex tsʼoʼok u chʼaʼtuklik [kaʼach] ichil u puksiʼikʼaleʼ, maʼ yéetel kʼuuxiliʼ mix bey táan u obligartaʼaleʼ, tumen Dioseʼ u yaabiltmaj le máax ku síik wa baʼax yéetel kiʼimak óolaloʼ» (2 Corintoiloʼob 9:7). Apóstol Pabloeʼ tu yaʼalaj xan: «Le ka t-kʼaʼaytajteʼex u maʼalob péektsilil Diosoʼ, toʼoneʼ mantatsʼ meyajnajoʼon bul kʼiin yéetel bul áakʼab, utiaʼal beyoʼ mix juntúul tiʼ teʼex ka u xup yaʼab taakʼin t-oʼolal» (1 Tesalonicailoʼob 2:9). Pablo kaʼacheʼ ku chuyik najoʼob de nookʼ utiaʼal u yáantkuba ikil u meyajtik Dios (Baʼaxoʼob 18:2, 3).

U suukileʼ u Najiloʼob Reino, le tuʼux ku muchʼkuba u j-jaajkunajoʼob Jéeobaoʼ, maʼ jach nuuktakoʼobiʼ mix jach koʼojtakoʼobiʼ. ¿Tuʼux ku chʼaʼikoʼob taakʼin utiaʼal le xuup ku beetkoʼoboʼ? Maʼatech u máan u kʼáatoʼob taakʼin, mix tech u túuxtikoʼob sobreʼob utiaʼal u kʼáatkoʼob. Baʼaxeʼ teʼ Najil Reinooʼ tsʼaʼan junpʼéel chan caja. Jeʼel máaxak u kʼáateʼ jeʼel u páajtal u síik le bajux ku síijil tu puksiʼikʼaloʼ.

U jaajileʼ tak utiaʼal u imprimirtaʼal yéetel u tʼoʼoxol le revistaaʼ kʼaʼabéet taakʼin. Kex beyoʼ mix juntéen ken a wil ichil u táan juʼuniloʼob wa táan u kʼáataʼal taakʼiniʼ. U maas kʼaʼanaʼanileʼ letiʼe u tsʼaʼabal ojéeltbil le u jaajil yaan teʼ Bibliaoʼ.

Techeʼ ¿bix a wilik? Le baʼax ku beetik u j-jaajkunajoʼob Jéeobaoʼ, ¿bey wa jeʼex tu kaʼansil Jesús yéetel jeʼex tu beetil le yáax cristianoʼoboʼ?