¿Yaan wa máax beetmil a wokʼol?... * Míin tuláakal máak tsʼoʼok u beetaʼal u yokʼol. Baʼaleʼ yaan horaeʼ máakeʼ ku yokʼol yoʼolal baʼax ku yuʼubik ichil u puksiʼikʼal, maʼ xaaneʼ tumen aʼalaʼab baʼaloʼob maʼ jaajtak tu yoʼolaliʼ. ¿Máasaʼ leloʼ jeʼel u beetik u yaatal k-óoleʼ?... Dios xaneʼ ku yaatal u yóol ken aʼalaʼak baʼal maʼ jaaj tu yoʼolaliʼ. Koʼox tsikbal yoʼolal lelaʼ ka k-il bix jeʼel k-kiʼimakkúuntik u yóol Dioseʼ.

Le Bibliaoʼ ku yaʼalikeʼ jujuntúul máakoʼob tu yaʼaloʼob u yaabiltmoʼob Dioseʼ «tu beetoʼob u muʼyaj», tu ‹okʼomkíintoʼob u yóol›. Koʼox ilik baʼaxten ku yaatal u yóol Dios wa maʼ t-beetik baʼax ku yaʼalik.

Le yáax xiib yéetel yáax koʼolel tu beetaj Diosoʼ jach tu beetoʼob u yaatal u yóol. Letiʼobeʼ tsʼaʼaboʼob tiʼ junpʼéel Paraíso, junpʼéel «kúuchil paakʼal ku kʼaabaʼtik Edén». ¿Bix kaʼach u kʼaabaʼob?... Beyoʼ, Adán yéetel Eva. Koʼox ilik bix tu beetiloʼob u muʼyaj Jéeoba.

Le ka tsʼaʼab Adán yéetel Eva teʼ kúuchil paakʼaloʼ aʼalaʼabtiʼob ka u kanáantoʼob. Jéeobaeʼ tu yaʼalaj xan tiʼobeʼ jeʼel u páajtal u yantal u paalaloʼob yéetel u kajtaloʼob teʼeloʼ; mix bikʼin kun kíimloʼob kaʼachi. Baʼaleʼ le maʼ yanak u paalaloʼobeʼ yaan junpʼéel baʼal jach kʼaas úuchi. ¿A wojel wa baʼaxiʼ?... Juntúul angeleʼ tu beetaj u tsʼáaikuba Adán yéetel Eva tu contra Jéeoba. Koʼox ilik bix úuchik.

Le angelaʼ tu beetaj bey táan u tʼaan juntúul kaaneʼ ka tu yaʼalaj tiʼ Eva jeʼel u pʼáatal bey Dioseʼ.  Evaeʼ utschaj tu tʼaan le baʼax tu yaʼalaj le kaanoʼ ka túun tu beetaj. ¿A wojel wa baʼax tu beetaj?...

Evaeʼ tu jaantaj u yich le cheʼ tu yaʼalaj Dios maʼ unaj u jaantkoʼoboʼ. Le maʼ u beet Evaoʼ Jéeobaeʼ tu yaʼalaj tiʼ Adán: «Ku páajtal a jaantik u yich tuláakal u cheʼiloʼob le kúuchilaʼ, chéen maʼ a jaantik u yich u cheʼil u kʼaj óolalil uts yéetel kʼaas. Tumen u kʼiinil bíin a jaanteʼ [yaan] a kíimil».

Evaeʼ u yojel le baʼax aʼalaʼanoʼ. Baʼaleʼ pʼáat u chaʼant u yich le cheʼoʼ ka tu yilaj «kiʼichkelem», «ka taakchaj u jaantik [...]. Bey túunoʼ, tu tʼokaj junpʼéel u yich[eʼ] ka tu jaantaj». Ka tsʼoʼokeʼ tu tsʼáaj tiʼ Adán; «letiʼ xaneʼ tu jaantaj». ¿Baʼaxten a tuklik tu jaantaj?... Tumen Adaneʼ maʼ tu jach yaabiltaj Diosiʼ, baʼaxeʼ maas tu yaabiltaj Eva. Tu kiʼimakkúuntaj u yóol Eva tu lugar u kiʼimakkúuntik u yóol Jéeoba. Baʼaleʼ k-uʼuyik u tʼaan Dioseʼ maas kʼaʼanaʼan ke ka k-uʼuy u tʼaan jeʼel máaxakeʼ.

¿Kʼajaʼan wa tech le kaan tu tʼanaj Evaoʼ? Jeʼex ken báaxtaʼak junpʼéel muñeco ku beetaʼal bey táan u tʼaaneʼ, le kaan xanoʼ yaan máax beet bey táan u tʼaaneʼ. ¿A wojel wa máax tʼaanaj tu jaajil?... Letiʼe «úuchben kaanoʼ, le ku yaʼalaʼal Kʼaasilbaʼal wa Satanás tiʼoʼ».

¿A wojel wa bix jeʼel u páajtal a kiʼimakkúuntik u yóol Jéeobaeʼ?... Mantatsʼ unaj a beetik baʼax uts tu tʼaan. Satanaseʼ ku yaʼalikeʼ jeʼel máaxak jeʼel u beetik baʼax ku yaʼalik letiʼeʼ. Le oʼolal Jéeobaeʼ ku yaʼaliktoʼon: «In xibil paal, yanak a wojéelajil utiaʼal a beetik u kiʼimaktal in wóol; beyoʼ bíin yanak baʼax in waʼal tiʼ máaxoʼob u kʼáatoʼob u pajoʼob in suʼtal». Satanaseʼ ku ‹pajik u suʼtal› Jéeoba, u kʼáat u yaʼaleʼ ku pʼaʼastik wa ku cheʼejtik. Ku yaʼalik xaneʼ jeʼel u páajtal u náachkuntik tiʼ Dios jeʼel máaxakeʼ. Le beetkeʼ uʼuy u tʼaan Dios yéetel meyajte, utiaʼal a jach kiʼimakkúuntik u yóol. ¿Yaan wa a xachkaba a beete?...