Ken siʼibiktech wa baʼaxeʼ, ¿baʼax jeʼel u beetik u jach kiʼimaktal a wóoleʼ? U jaajileʼ maas jeʼel u kiʼimaktal k-óol wa le máax síiktoʼon wa baʼaxoʼ tu beetaj tumen u yaabiltmoʼon, maʼ tumen obligartaʼab u beetiʼ. Kʼaʼanaʼan k-ojéeltik baʼax oʼolal ku siʼibiltoʼon wa baʼax. Dioseʼ maas kʼaʼanaʼan u yilik. Koʼox ilik baʼax tu yaʼalaj apóstol Pablo jeʼex tsʼíibtaʼan teʼ 2 Corintoiloʼob 9:7.

¿Baʼaxten tu yaʼalaj Pablo lelaʼ? Letiʼeʼ taakchaj u líiʼsik u yóol le cristianoʼob kajaʼanoʼob Corinto utiaʼal ka táakpajkoʼob tiʼ le áantaj táan u tsʼaʼabal tiʼ u yéet cristianoiloʼob kajaʼanoʼob Judeaoʼ. ¿Tu obligartoʼob wa? Maʼ, baʼaxeʼ tu yaʼalajtiʼob: «Cada juntúuleʼ u beet jeʼex tsʼoʼok u chʼaʼtuklik ichil u puksiʼikʼaleʼ, maʼ yéetel kʼuuxiliʼ mix bey táan u obligartaʼaleʼ, tumen Dioseʼ u yaabiltmaj le máax ku síik wa baʼax yéetel kiʼimak óolaloʼ». Koʼox ilik baʼax tu yóotaj u yaʼale.

«Jeʼex tsʼoʼok u chʼaʼtuklik ichil u puksiʼikʼaleʼ.» Apóstol Pabloeʼ tu yaʼaleʼ «ichil u puksiʼikʼal» máak unaj u síijil u tsʼáaik wa baʼax. Tsʼoʼoleʼ maʼ chéen unaj u jáan ilik baʼax kʼaʼabéet tiʼ u yéet cristianoiloʼobiʼ. Le tʼaan griego ku suʼutul «jeʼex tsʼoʼok u chʼaʼtuklik[oʼ]» ku tsʼáaik naʼatbil «u yáax tuklaʼal maʼalob junpʼéel baʼal», ku yaʼalik juntúul biblista. Le beetkeʼ juntúul máax meyajtik Dioseʼ ku yáax tuklik baʼax kʼaʼabéet tiʼ u yéet cristianoiloʼob yéetel ku yilik bix jeʼel u yáantkoʼobeʼ (1 Juan 3:17).

«Maʼ yéetel kʼuuxiliʼ mix bey táan u obligartaʼaleʼ.» Apóstol Pabloeʼ tu yaʼaleʼ juntúul u jaajil cristianoeʼ maʼatech u síik wa baʼax yéetel kʼuuxil mix bey táan u obligartaʼaleʼ. Le tʼaan griego sutaʼan «kʼuuxil[oʼ]» u kʼáat u yaʼal «lubaʼan óolal (wa yaj óolal)». Juntúul máax ku tsʼáaik wa baʼax yéetel kʼuuxileʼ «yaj tu yóol u xupik u taakʼin», ku yaʼalik junpʼéel libro. Yaan máakeʼ ku tsʼáaik wa baʼax chéen tumen ku yuʼubik bey táan u obligartaʼaleʼ. Wa yaan máax ku beetiktech beyoʼ, ¿máasaʼ maʼ kun utstal ta tʼaan?

«Dioseʼ u yaabiltmaj le máax ku síik wa baʼax yéetel kiʼimak óolaloʼ». Apóstol Pabloeʼ tu yaʼaleʼ ken u síi wa baʼax juntúul cristianoeʼ unaj u beetik yéetel kiʼimak óolal, u kʼáat u yaʼaleʼ ka síijik tu puksiʼikʼal (Baʼaxoʼob 20:35). Leloʼ chíikaʼan u yilaʼal tumen tuláakal máak. Le tʼaan «kiʼimak óolaloʼ» ku meyaj utiaʼal u yúuchul tʼaan tiʼ bix u yuʼubikuba yéetel bix u yilaʼal máak. Le máax ku síik wa baʼax yéetel kiʼimak óolaleʼ ku péeksik u puksiʼikʼal le máax kʼamkoʼ bey xan u puksiʼikʼal Dios. Uláakʼ Bibliaeʼ ku yaʼalik beyaʼ: «Dioseʼ u yaabiltmaj le máax ku tsʼáa yéetel kiʼimak óolal[oʼ]» (El Nuevo Testamento de Nuestro Señor Jesucristo ich Maya).

Le baʼax tu yaʼalaj apóstol Pablooʼ ku yáantik le cristianoʼob u yiloʼob bix unaj u tsʼáaik u siibaloʼoboʼ. Kex wa táan k-tsʼáaik k-tiempo, k-muukʼ, k-taakʼin wa uláakʼ baʼaloʼobeʼ, unaj k-beetik jeʼex u síijil t-puksiʼikʼaleʼ bey xan yéetel kiʼimak óolal, maases utiaʼal k-áantik le máaxoʼob kʼaʼabéet áantaj tiʼoboʼ. K-beetik beyoʼ maʼ chéen ku taasiktoʼon kiʼimak óolaliʼ baʼaxeʼ ku beetik k-lúubul utsil tiʼ Dios, tumen letiʼeʼ «u yaabiltmaj le máax ku síik wa baʼax yéetel kiʼimak óolaloʼ».