Líikʼen tu kaajil Santiago, u capitalil Chile. Teʼeloʼ yaʼab drogaʼob yéetel kʼasaʼan máakoʼob yaniʼ. In taataeʼ kíimsaʼab le yaanten cinco jaʼaboʼoboʼ. In maama túuneʼ kajlaj yéetel juntúul kʼasaʼan máak jach ku jatsʼkoʼon kaʼachi. Tak bejlaʼa ku yaatal tin wóol le baʼaxoʼob tu beetajtenoʼ.

Yoʼolal le bix úuchik in líiʼsaʼaloʼ, tin táankelmileʼ jach kʼaschaj in modos. Joʼopʼ in wuʼuyik heavy metal, in káaltal, yéetel in drogarkinba. Suukchaj in wokskinba tiʼ baʼateloʼob yéetel le j-kon drogaʼoboʼ yéetel yaʼab u téenel tu yóotaj u kíimsenoʼob. Juntéenjeakeʼ junmúuchʼ máakoʼobeʼ tu boʼotoʼob juntúul máak utiaʼal u kíimsen, baʼaleʼ púutsʼen; chéen tu x-máan lomten. Uláakʼ juntéeneʼ junmúuchʼ máakoʼob konik drogaʼobeʼ tu tsʼáajoʼob junpʼéel pistola tin pool, tsʼoʼoleʼ tu yóotaj u jichʼoʼob in kaal.

Tu jaʼabil 1996, utschaj tin wich juntúul x-chʼúupal ku kʼaabaʼtik Carolina, ka tsʼoʼok k-beel tu jaʼabil 1998. Ka síij k-yáax paaleʼ káaj in tuklikeʼ wa maʼ tin kʼexik in kʼaakʼas modoseʼ jeʼel in maltrartartik in familia jeʼex tu beetil in padrastroeʼ. Le oʼolal káaj in bin tiʼ junpʼéel tuʼux ku tsʼaʼabal áantaj tiʼ máakoʼob jeʼex tenoʼ. Tsʼaʼabten tratamiento yéetel terapia, baʼaleʼ maʼ tu yáantenoʼobiʼ. Láayliʼ kin sen pʼuʼujul kaʼach yoʼolal jeʼel baʼalakeʼ; maʼ tu páajtal in controlarkinba kaʼachi. Juntéenjeakeʼ utiaʼal u xuʼulul in maltrartartik in familiaeʼ tin wóotaj in kíimsinba. Yaske maʼ páajchajiʼ.

Máan yaʼab jaʼaboʼob maʼ tin creertik Dios. Baʼaleʼ taakchaj in creertik, ka joʼopʼ in bin yéetel le evangelicoʼoboʼ. Teʼ kʼiinoʼob jeʼeloʼ in wataneʼ ku xook kaʼach yéetel u j-jaajkunajoʼob Jéeoba. Tin pʼektaj le j-Jaajkunajoʼoboʼ yéetel yaʼab u téenel tin waʼalaj baʼal tiʼob. Baʼaleʼ letiʼobeʼ tu yeʼesoʼobten jatsʼuts modos; leloʼ maʼ letiʼe baʼax kin páaʼtik kaʼachoʼ.

Juntéenjeakeʼ Carolinaeʼ tu yaʼalajten ka in xok Salmo 83:18 teʼ Biblia yaantenoʼ. Le tekstooʼ juntaatsʼ u yaʼalikeʼ u kʼaabaʼ Dioseʼ Jéeoba. Jaʼakʼ in wóol ka tin tsʼáaj cuentaeʼ tin religioneʼ kaʼansaʼabten yoʼolal juntúul dios, baʼaleʼ maʼ aʼalaʼabten  wa Jéeobaiʼ. Tu káajbal u jaʼabil 2000, káaj in xook xan yéetel le j-Jaajkunajoʼoboʼ.

Líikʼ in wóol ka tin kaneʼ Jéeobaeʼ ku chʼaʼik óotsilil yéetel ku perdonartik máak. Jeʼex u yaʼalik Éxodo 34:6, 7, Jéeobaeʼ ‹muun u puksiʼikʼal, ku chʼaʼ óotsilil, chúukaʼan u yóol, nojoch u yaakunaj bey xan u jaajil. Tiʼ mil chʼiʼibaloʼobeʼ maʼ tu kʼexik u yaakunaj, ku saʼasik loobil, kʼoʼox óolal yéetel kʼeban›.

Kex beyoʼ maʼ chéen chʼaʼabil in beetik le baʼax kin kanikoʼ. In tsʼaamileʼ mix bikʼin kun páajtal in kʼexik in kʼaakʼas modos. Láalaj hora kin fallar, baʼaleʼ Carolinaeʼ yéetel yaabilaj ku kʼaʼajsikteneʼ Jéeobaeʼ ku yilik táan in tsʼáaik in wóoliʼ. Carolinaeʼ mantatsʼ tu yáanten in tsʼáa in wóol in beet baʼax uts tu tʼaan Jéeoba, kex yaan kʼiineʼ kin wuʼuyik minaʼan utskíinajil ten.

Juntéenjeakeʼ Alejandro, le máax tsʼáaikten xookoʼ, tu yaʼalajten ka in xok Galaciailoʼob 5:22, 23. Le tekstoaʼ ku yaʼalikeʼ u yich le kiliʼich muukʼoʼ «yaabilaj, kiʼimak óolal, jeetsʼelil, chúukaʼan óolal, maʼalob bisajbail, utsil, fe, maʼ u séeb kʼuuxil máak, u controlarkuba máak». Alejandroeʼ tu tsolajteneʼ tin juunaleʼ maʼ tu páajtal u yantalten le jatsʼuts modosoʼobaʼ, chéen jaʼaliʼ yéetel u yáantaj u kiliʼich muukʼ Dioseʼ. Lelaʼ tu beetaj u jeʼepajal in wich.

Ka tsʼoʼokeʼ binen tiʼ junpʼéel asamblea tiʼ u j-jaajkunajoʼob Jéeoba. Úuchik in wilik tu tsoolol u beetaʼal tuláakal, limpio anik le kúuchiloʼ yéetel maʼalob u biskubaʼobeʼ tin tsʼáaj cuentaeʼ jach tu jaajil letiʼe religión kaʼansik u jaajiloʼ (Juan 13:34, 35). Okjaʼanajen febrero tiʼ 2001.

Yaʼab máakoʼob pʼekmilen kaʼachi, baʼaleʼ teen kaxte. Kex jach kʼaas in pʼuʼujul kaʼacheʼ Jéeobaeʼ tsʼoʼok u beetken juntúul máak uts u modos. Kin wuʼuyik bey tu jóoʼsen tiʼ junpʼéel jool jach taameʼ. Bejlaʼeʼ kiʼimak in wóol in meyajtik Jéeoba ich jeetsʼelil junmúuchʼ yéetel in watan bey xan yéetel in kaʼatúul paalal.

In láakʼtsiloʼob yéetel in amigoʼobeʼ jaʼakʼ u yóoloʼob le ka tu yiloʼob tsʼoʼok in kʼexik in kuxtaloʼ. Yaʼab tiʼ letiʼobeʼ taakchaj u kankoʼob xan baʼax ku kaʼansik le Bibliaoʼ. Yaʼab máakoʼob xan tsʼoʼok in wáantik u kʼaj óoltoʼob Jéeoba. ¡Bukaʼaj kiʼimakil in wóol in wilik bix u kʼeʼexel xan u kuxtaloʼob tumen le Bibliaoʼ!