Síijen tu kaajil Bilbao, tu xamanil España; junpʼéel kaaj mix óotsiliʼ mix ayikʼaliʼ. Yaan juntúul in kiik yéetel kaʼatúul in wíitsʼin. Tin wotoch kaʼacheʼ jach catolicoʼon, sáamsamal in bin misa. Le ka tu tsʼáajten 23 jaʼabeʼ kʼuch in beetinba x-kaʼansajil. Lelaʼ junpʼéel meyaj tin beetaj yéetel kiʼimak óolal tu yáamil 40 jaʼab. Jach uts tin tʼaan kaʼach in kaʼansik Religión teʼ escuelaʼoboʼ. Tsʼoʼoleʼ tu chíinil kʼiinileʼ kin beetik kaʼach in x-catequistail: kin kaʼansik mejen x-chʼúupalal utiaʼal u beetik u primera comunionoʼob.

Ka máan 12 jaʼab tsʼoʼokok in beeleʼ, le yaanten 33 jaʼaboʼ, kíim in wíichameʼ ka pʼáaten tin juun chéen yéetel in kantúul hijaʼob. Tin tuklaj kaʼacheʼ jeʼel u yáantken le baʼax in kanmaj tin religionoʼ. Baʼaleʼ yaan kʼáatchiʼob maʼ tu páajtal in núukik: Wa tsʼoʼok u kíimil Cristo t-oʼolaleʼ, ¿baʼaxten láayliʼ k-kíimileʼ? ¿Baʼaxten k-kʼáatik ka taalak u Reino Dios wa teʼ kaʼan kun bin le utsul máakoʼoboʼ? U maas kʼaʼanaʼanileʼ, wa ku juzgartikoʼon Dios ken kíimkoʼoneʼ, ¿baʼax tiaʼal ken u jóoʼsoʼon kaʼan, purgatorio wa infierno utiaʼal u tsʼok juzgartikoʼon?

Tin beetaj le kʼáatchiʼob tiʼ jujuntúul sacerdoteʼoboʼ. Juntúuleʼ tu yaʼalajten: «Maʼ in wojliʼ. Kʼáat tiʼ le obispooʼ. Wa ka creertik Dioseʼ, ¿baʼax tiaʼal a kʼáat a wojéelt u maasil? Tuʼubse». Baʼaleʼ teneʼ maʼ xuʼul in kaxtik u núukiloʼobiʼ. Ka máan kʼiineʼ binen yiknal jesuitaʼob, pentecostaloʼob, bey xan gnosticoʼob. Kex beyoʼ mix juntúul páajchaj u núukikten jeʼex unajeʼ.

Le yaanten 60 jaʼaboʼ, juntúul chan x-chʼúupal yaan siete jaʼab tiʼeʼ tu invitarten utiaʼal junpʼéel u muchʼtáambal u j-jaajkunajoʼob Jéeoba. Utschaj tin tʼaan le muchʼtáambaloʼ, baʼaxeʼ tumen jach yaʼab baʼaxoʼob kin beetkeʼ maʼ suunajen in kaʼa il le j-Jaajkunajoʼoboʼ. Ka máan kaʼapʼéel jaʼabeʼ, Juan yéetel Maite, u yataneʼ, tu xíimbaltenoʼob. Ichil óoxpʼéel meseseʼ yaʼab kʼáatchiʼob tin beetajtiʼob; tu tsʼookeʼ káaj u tsʼáaikoʼobten xook yéetel le Bibliaoʼ.

 Jach kin tsʼíiboltik kaʼach u kʼuchul u kʼiinil in xook. Utiaʼal in wilik wa jaaj le baʼax ku kaʼansik le j-Jaajkunajoʼoboʼ kin xakʼaltik tubeel óoxpʼéel Bibliaʼob. Maʼ xáanchaj ka tin tsʼáaj cuentaeʼ jach tusaʼanen kaʼach tumen in religión. Péeknaj in wóol ka tin wilaj jach jelaʼan le baʼax kaʼansaʼabten kaʼachoʼ. Tin wuʼuyaj bey ka joʼokok junkúul nuxiʼ cheʼ jach taamchajaʼan u mootseʼ.

Ka máan kʼiineʼ in wíichameʼ, le u kaʼatúuloʼ, kʼojaʼanchajeʼ ka kíimi. Teʼ kʼiinoʼob xanoʼ tin jubilartinba, lukʼen Bilbaoeʼ ka binen kajtal junpʼéel tiempo táanxel tuʼux. Juan yéetel Maiteeʼ bey xan tu beetiloʼoboʼ. Jach yaj tin wóol in waʼalik, baʼaleʼ xuʼul in xokik le Biblia yéeteloʼoboʼ. Baʼaleʼ in wojel kaʼacheʼ tin kaxtaj junpʼéel nojoch ayikʼalil. Leloʼ maʼ tin tuʼubsajiʼ.

Ka máan 20 jaʼab, le yaanten 82 jaʼaboʼ, Juan yéetel Maiteeʼ suunajoʼob Bilbaoeʼ ka tu xíimbaltenoʼob. ¡Jach kiʼimakchaj in wóol ka tin kaʼa iloʼob! Tin wileʼ Jéeobaeʼ maʼ tu tuʼubseniʼ, ka káaj in xook tu kaʼatéen. Juan yéetel Maiteeʼ jach anchaj paciencia tiʼob tin wéetel, tumen láalaj hora táan in beetik junpʼéeliliʼ kʼáatchiʼ. Kin tuklik kaʼacheʼ kʼaʼabéet in wuʼuyik yaʼab u téenel le baʼax ku kaʼansik le Biblia utiaʼal in tuʼubsik le baʼaxoʼob jach kin creertik kaʼachoʼ. In kʼáat xan in kan bix jeʼel in tsolik baʼax ku yaʼalik le Biblia tiʼ in amigoʼob bey xan tiʼ in láakʼtsiloʼoboʼ.

Jach kiʼimakchaj in wóol le ka okjaʼanajen tiʼ junpʼéel asamblea tiʼ u j-jaajkunajoʼob Jéeobaoʼ; 87 jaʼab yaanten kaʼachi. Le tsoltʼaan máansaʼab utiaʼal le máaxoʼob kun okjaʼoboʼ tu beetaj in wokʼol. Tin wuʼuyaj bey Jéeoba tʼankeneʼ. Ka tsʼoʼok in wokjaʼeʼ yaʼab j-Jaajkunajoʼob náatsʼ u felicitartenoʼob, kex yaʼab tiʼ letiʼobeʼ mix u kʼaj óolenoʼobiʼ.

Úuchiliʼ in wojéelt Jesuseʼ letiʼ «le bejoʼ» (Juan 14:6). Baʼaleʼ le ka tin xokaj le Bibliaoʼ páajchaj in kʼaj óoltik Jéeoba, le máax tiʼ ku biskoʼon Jesusoʼ. Beoraaʼ ku páajtal in orar tiʼ Dios, tumen in wojel in Taata yéetel in Amigo. Jach kʼexpaj in tuukul úuchik in xokik le libro Acerquémonos a Jehová. * Le yáax juntéen ka tin machoʼ tin láaj xokaj ichil junpʼéel áakʼab. Jach kʼuch tin puksiʼikʼal in wojéeltikeʼ Jéeobaeʼ jach tu jaajil nojoch u chʼaʼ óotsilal.

Ken tuukulnaken tiʼ le bukaʼaj jaʼaboʼob tin máansaj táan in kaxtik u jaajiloʼ, ku kʼaʼajalten baʼax tu yaʼalaj Jesús: «Maʼ u xuʼulul a kʼáatkeʼex, tumen yaan u tsʼaʼabalteʼex; maʼ u xuʼulul a kaaxaneʼex, tumen yaan a kaxtikeʼex; maʼ u xuʼulul a kʼoopeʼex, tumen yaan u jeʼebelteʼex joonaj» (Mateo 7:7). Bejlaʼa tsʼoʼok in kanik u jaajileʼ jach kiʼimak in wóol in tsikbaltik tiʼ u maasil máakoʼob.

Yaanten 90 jaʼab, baʼaleʼ yaʼab baʼaloʼob u bin in kanik yoʼolal Jéeoba. Cada ken xiʼiken teʼ Najil Reinooʼ jach uts tin tʼaan in kanik túumben baʼaloʼob yéetel in biskinba yéetel le sukuʼunoʼoboʼ. Kin tsʼíiboltik in beetkinba x-kaʼansajil teʼ Paraíso kun antal way Luʼumaʼ (Apocalipsis 21:3, 4). Baʼaleʼ maas kin tsʼíiboltik in wilik in láakʼtsiloʼob ken kaʼa kuxlakoʼob utiaʼal in kaʼansik u jaajil tiʼob (Baʼaxoʼob 24:15). Jach in kʼáat in tsikbalttiʼob le jatsʼuts siibal tu tsʼáajten Jéeoba tin chʼijaʼaniloʼ.