¿Ka creertik wa ken u yaʼal le Biblia yaan u kaʼa kuxtal le kimenoʼoboʼ? * ¿Máasaʼ jatsʼuts ka k-il tu kaʼatéen le máaxoʼob k-yaabiltmaj tsʼoʼok u kíimloʼoboʼ? Baʼaleʼ ¿jach wa tu jaajil jeʼel u yúuchleʼ? Utiaʼal k-ojéeltikeʼ maʼalob ka k-il baʼax tu beetaj u apostoloʼob Jesucristo.

Le apostoloʼoboʼ jach tu creertoʼob yaan u kaʼa kuxkíintaʼal le kimenoʼoboʼ. ¿Baʼaxten? Yáaxeʼ tumen u yojloʼobeʼ tak Jesús kaʼa kuxkíintaʼabi. Letiʼob yéetel le «maas tiʼ quinientos sukuʼunoʼob muchʼukbaloʼob[oʼ]» tu yiloʼob Jesús le tsʼokaʼan u kaʼa kuxkíintaʼaloʼ (1 Corintoiloʼob 15:6). Jeʼex u yeʼesik le kanpʼéel Evangelioʼoboʼ, yaʼab máax ojéelt yéetel creert kaʼa kuxkíintaʼab Jesús (Mateo 27:62–28:20; Marcos 16:1-8; Lucas 24:1-53; Juan 20:1–21:25).

U kaʼapʼéeleʼ, tumen le apostoloʼoboʼ tu yiloʼob u kaʼa kuxkíintaʼal óoxtúul máak tumen Jesús: juntúuleʼ tu kaajil Naín, uláakʼeʼ Capernaum, yéetel u tsʼookeʼ Betania (Lucas 7:11-17; 8:49-56; Juan 11:1-44). Jeʼex tsoʼolik tu yóox xookil le revistaaʼ, u láakʼtsiloʼob le máax kaʼa kuxkíintaʼab Betaniaoʼ, jach u amigoʼob kaʼach Jesús. Koʼox ilik jach baʼax úuchiʼ.

Kanpʼéel kʼiin kíimik Lázaroeʼ, Jesuseʼ tu yaʼalaj tiʼ Marta: «A wíitsʼineʼ yaan u líikʼil». Martaeʼ maʼ tu séeb naʼataj le baʼax tu yóotaj u yaʼal Jesusoʼ. Tu tukleʼ táan u tʼaan tiʼ le baʼax kun úuchul ken máanak kʼiinoʼ, le oʼolal tu núukaj: «Teneʼ in wojel yaan u líikʼil». Baʼaleʼ Jesuseʼ tu yaʼalajtiʼ: «Teen le kuxtaloʼ, bey xan le kaʼa kuxtaloʼ». Ka túun tu kaʼa kuxkíintaj Lázaro. ¡Chéen tukult bukaʼaj kiʼimakchajik u yóol Marta! (Juan 11:23-25.)

¿Tuʼux yaan kaʼach Lázaro tu yáamil le kanpʼéel kʼiin kimenoʼ? Lázaroeʼ maʼ tu yaʼalaj wa bin kuxtal táanxel tuʼuxiʼ. Minaʼan u pixan ka jóokʼok utiaʼal u bin teʼ kaʼanoʼ. Le oʼolaleʼ le ka kaʼa kuxkíintaʼab Lázaro tumen Jesusoʼ, maʼ jóoʼsbil beetaʼabik teʼ kaʼan, wa tiʼ junpʼéel jatsʼuts kúuchil naatsʼ yanil tiʼ Dios utiaʼal u taasaʼal way Luʼumeʼ. ¿Tuʼux túun yaan kaʼachi? Táan kaʼach u wenel teʼ muknaloʼ (Eclesiastés 9:5, 10).

Kʼaʼajaktoʼon baʼax tu yaʼalaj Jesús: le kíimiloʼ bey jeʼex le weenloʼ, yéetel jeʼel u yajsaʼal máak wa ku kaʼa kuxkíintaʼaleʼ. Jesuseʼ tu yaʼalaj: «‹K-amigo Lázaroeʼ táan u wenel, baʼaleʼ teneʼ táan in bin teʼeloʼ utiaʼal ka in wajse›. Le disipuloʼob túunoʼ tu yaʼaloʼobtiʼ: ‹Yuumtsil, wa táan u weenleʼ jeʼel u yutstaleʼ›.  Baʼaleʼ, Jesuseʼ táan kaʼach u yaʼalik tsʼoʼok u kíimil Lázaro. Chéen baʼaleʼ letiʼobeʼ ku tuklikoʼob kaʼacheʼ táan u tʼaan tiʼ u wenel máak utiaʼal u jeʼelskuba. Jesús túuneʼ juntaatsʼ úuchik u yaʼaliktiʼob: ‹Lázaroeʼ tsʼoʼok u kíimil›» (Juan 11:11-14). Le ka tu kaʼa kuxkíintaj Lázarooʼ, Jesuseʼ tu kaʼa muchʼaj yéetel u láakʼtsiloʼob. ¡Jach túun jatsʼuts le baʼax tu beetoʼ!

Úuchik u kaʼa kuxkíintik le máakoʼobaʼ tu yeʼesaj baʼax ken u beet ken gobernarnak bey reyil tiʼ u Reino Dioseʼ. * Ken u gobernart le Luʼumaʼ, Jesuseʼ yaan u kaʼa kuxkíintik le máaxoʼob táan u weenloʼob teʼ muknaloʼoboʼ. Le oʼolal tu yaʼalaj: «Teen [...] le kaʼa kuxtaloʼ». ¡Chéen tukult bukaʼaj kun kiʼimaktal a wóol ken a wil u kaʼa kuxtal le máaxoʼob a yaabiltmoʼ! ¡Bukaʼaj wal kun kiʼimaktal xan u yóol le máaxoʼob kun kaʼa kuxkíintbiloʼoboʼ! (Lucas 8:56.)

Jesuseʼ tu yaʼalaj tiʼ Marta: «Le máax ku tsʼáaik u fe tiʼ teneʼ, kex ka kíimkeʼ yaan u kaʼa kuxtal. Tuláakal xan máax kuxaʼan yéetel ku tsʼáaik u fe tiʼ teneʼ, mix bikʼin kun kíimil» (Juan 11:25, 26). Le máaxoʼob kun kaʼa kuxkíintbiloʼob tu yáamil le Mil Jaʼaboʼob kun gobernar Jesusoʼ yaan u páajtal u kuxtaloʼob utiaʼal mantatsʼ wa ku tsʼáaik u fejoʼob tiʼ letiʼ.

Ka tsʼoʼok u yaʼalik Jesús le baʼaloʼobaʼ, tu kʼáataj tiʼ Marta: «‹Techeʼ ¿ka creertik wa lelaʼ›. Martaeʼ tu núukajtiʼ: ‹Kin creertik, Yuumtsil; teneʼ tsʼoʼok in creertik teech le Cristo u Paal Dios[oʼ]›» (Juan 11:26, 27). ¿Kux túun teech? ¿Maʼ wa uts ta tʼaan ka a creert yaan u kaʼa kuxkíintaʼal le kimenoʼob jeʼex tu creertil Martaoʼ? Wa beyoʼ, yáaxeʼ kan baʼax u tukultmaj u beetik Dios utiaʼal wíinikoʼob (Juan 17:3; 1 Timoteo 2:4). Leloʼ yaan u yáantaj utiaʼal ka yanaktech fe. ¿Kux túun ka a kʼáat tiʼ u j-jaajkunajoʼob Jéeoba ka u yeʼesoʼobtech baʼax ku kaʼansik le Biblia yoʼolal leloʼ? Letiʼobeʼ yéetel kiʼimak óolal ken u tsoloʼobtech bix kun kaʼa kuxkíintbil le kimenoʼoboʼ.