Le Bibliaoʼ ku tʼaan yoʼolal jujuntúul máakoʼob pechʼ óoltaʼaboʼob tumen máaxoʼob yaan páajtalil tiʼob. Juntúuleʼ ku kʼaabaʼtik Nabot. * Teʼ siglo 10 táanil tiʼ Cristooʼ, Acab u reyil Israeleʼ, tumen u kʼáat kaʼach u tiaʼalint u pakʼal uva Naboteʼ, tu chaʼaj u kíimsaʼal paʼteʼ yéetel u paalal tumen le reina Jezabeloʼ (1 Reyes 21:1-16; 2 Reyes 9:26). ¿Baʼaxten ku chaʼik Dios u beetaʼal le baʼaloʼob kʼaastakaʼ?

Yáaxeʼ tumen Dioseʼ maʼ tu páajtal u tuus (Tito 1:2). Letiʼeʼ tu yaʼalaj tiʼ le yáax wíinikoʼoboʼ wa ku sutkubaʼob tu contraeʼ yaan u kíimloʼob, yéetel bey úuchikoʼ. Desde le ka tu sutuba le yáax wíinikoʼob tu contra Dios teʼ Edén tak bejlaʼoʼ, mix máak páajchajak u púutsʼul tiʼ le kíimiloʼ. Caíneʼ tu beetaj u kʼasaʼanil tiʼ Abel u yíitsʼineʼ ka tu kíimsaj (Génesis 2:16, 17; 4:8).

Le Bibliaoʼ ku yaʼalikeʼ desde leloʼ, «le páajtalil yaan tiʼ wíinik[oʼ]» tsʼoʼok u meyaj chéen «utiaʼal u beet[ik] loob tiʼ u yéet xiibil» (Eclesiastés 8:9). ¿Jach wa tu jaajil bey úuchikoʼ? Jéeobaeʼ tu yaʼalaj tiʼ u kaajil Israeleʼ yaan u pechʼ óoltaʼaloʼob tumen u reyoʼob, yéetel yaan u kʼáatkoʼob ka áantaʼakoʼob tumen letiʼ (1 Samuel 8:11-18). Tak rey Salomón pechʼ óolt le kaajoʼ (1 Reyes 11:43; 12:3, 4). Baʼaleʼ anchaj uláakʼ reyoʼob maas tu pechʼ óoltoʼob, jeʼex tu beetil le kʼasaʼan rey Acaboʼ. Máans ta tuukul: wa Dios ka u beet wa baʼax tu yoʼolal le kaajoʼ, ¿máasaʼ jeʼel u pʼáatal chéen tuus le baʼax tu yaʼalaj kun úuchul kaʼachoʼ?

Tsʼoʼoleʼ Satanaseʼ ku yaʼalikeʼ máakeʼ chéen ku meyajtik Dios yoʼolal le utsiloʼob jeʼel u kʼamiktiʼoʼ (Job 1:9, 10; 2:4). Wa Dios ka u kanáant máaxoʼob meyajtik utiaʼal maʼ u beetaʼal jach mix junpʼéel kʼaas tiʼobeʼ, ¿máasaʼ jeʼel u tsʼáaik naʼatbil jaaj baʼax ku yaʼalik le Kʼaasilbaʼaloʼ? Wa xan ka u kanáant tuláakal máak tiʼ tuláakal baʼax kʼaaseʼ, ¿máasaʼ jeʼel u beetik u creertaʼal wíinikeʼ ku bin utsil tiʼ ken u gobernartuba tu juunaleʼ? Baʼaleʼ leloʼ jach junpuliʼ maʼ jaajiʼ. Jeʼex u yaʼalik le Bibliaoʼ wíinikeʼ maʼ tu páajtal u gobernarkuba tu juunal (Jeremías 10:23). Le oʼolal k-kʼáat ka taalak u Reino Dios; chéen jaʼaliʼ bey jeʼel u xuʼulul le kʼasaʼaniloʼ.

¿U kʼáat wa túun u yaʼaleʼ Dioseʼ chéen waʼalakbal u méekʼ u kʼab bejlaʼeʼ? Maʼ, yaan kaʼapʼéel baʼaxoʼob táan u beetik. Yáaxeʼ, ku yeʼesik máax beetik u kʼasaʼanil. Lelaʼ bey tu beetil yéetel Jezabel le ka beetaʼab kʼaas tiʼ Nabotoʼ. Le Bibliaoʼ ku yeʼesik xan máax beetik u yantal kʼasaʼanil bejlaʼeʼ: juntúul kʼasaʼan gobernante u taʼakmuba utiaʼal maʼ u yojéeltaʼal máaxiʼ (Juan 14:30; 2 Corintoiloʼob 11:14). ¿Máax túuniʼ? Satanás le Kʼaasilbaʼaloʼ. Dioseʼ ku yeʼesiktoʼon máax beetik u yantal kʼasaʼanil yéetel pechʼ óolal; leloʼ ku yáantkoʼon utiaʼal maʼ k-táabsaʼal, yéetel beyoʼ ka xiʼiktoʼon utsil utiaʼal mantatsʼ.

U kaʼapʼéeleʼ, Dioseʼ ku líiʼsik k-óol tumen ku yaʼaliktoʼon yaan u kʼuchul u kʼiinil u xuʼulul le pechʼ óolaloʼ. Le bix úuchik u chíikbesik baʼax kʼaasil u beetmaj Acab yéetel Jezabel —bey xan yaʼab uláakʼ máakoʼob jeʼex letiʼobeʼ—, yéetel le bix úuchik u castigartikoʼoboʼ, ku beetik k-creertikeʼ yaan u kʼuchul u kʼiinil u castigartik tuláakal le kʼasaʼanoʼoboʼ (Salmo 52:1-5). Dioseʼ ku yaʼalik tiʼ tuláakal le máaxoʼob yaabiltmiloʼ maʼ tun xáantal ken u xuʼuls le kʼasaʼanil yéetel le muʼyajil tsʼoʼok u yantaloʼ. * Nabot yéetel u paalal túuneʼ yaan u kuxtaloʼob utiaʼal mantatsʼ tiʼ junpʼéel paraíso way Luʼum tuʼux minaʼan kʼasaʼanileʼ (Salmo 37:34).