MAʼ SEN úucheʼ junpʼéel periódico coreanoeʼ tu yaʼalaj: «Shim Cheong, le x-chʼúupal jach uts maʼ tu kʼaj óoltaj Jesusoʼ, ¿bin wa infierno?».

Lelaʼ tu beetaj u tʼaan yaʼab máakoʼob, tumen teʼ Coreaoʼ jach kʼaj óolaʼan u tsikbalil Shim Cheong, juntúul x-chʼúupal tu tsʼáaj u kuxtal utiaʼal u yáantik u taata minaʼan u sáasil. Tu yáamil le jaʼaboʼoboʼ yaʼab baʼaxoʼob jatsʼutstak tsʼoʼok u yaʼalaʼal tu yoʼolal le x-chʼúupalaʼ. Tu luʼumil Coreaeʼ hasta ku tuklaʼaleʼ tuláakal hijatsil unaj u beetik jeʼex letiʼeʼ.

Yaʼab máakeʼ maʼ tu naʼatik bix u táabal aʼalbil wa yaan u bin infierno juntúul máak beyoʼ, chéen tumen maʼ okjaʼanaj ichil le cristianoʼoboʼ. Tsʼoʼoleʼ u jaajileʼ le baʼax ku tsikbaltaʼaloʼ úuch yaʼab kʼiinoʼob táanil tiʼ u yantal cristianoʼob tu kaajal le x-chʼúupaloʼ.

Le xook jóoʼsaʼab teʼ periodicooʼ ku yaʼalik xan kʼáataʼab tiʼ juntúul sacerdote wa yaan u bin infierno tuláakal le máaxoʼob maʼ páajchaj u yojéeltikoʼob mix baʼal yoʼolal Jesusoʼ. Le sacerdoteoʼ tu núukaj: «Maʼ k-ojliʼ. Maʼ xaaneʼ yaan baʼax ken u beet Dios [tu yoʼolal le máakoʼobaʼ]».

Le Catecismo de la Iglesia Católicaoʼ ku yaʼalik: «Tak Yuumtsil aʼaleʼ utiaʼal u salvarkuba máakeʼ kʼaʼabéet u Yokjaʼ» (cf Jn 3,5). Le teksto ku yaʼalaʼaloʼ, teʼ Biblia El Nuevo Testamento de Nuestro Señor Jesucristo ich Mayaoʼ, ku yaʼalik: «Le máax maʼ tu síijil tiʼ jaʼ yéetel tiʼ Kiliʼich Pixaneʼ maʼ tu páajtal u yokol tu ajawil [wa tu Reino] Jajal Dios». Tu yoʼolal lelaʼ yaan máaxoʼob aʼalikeʼ wa yaan máax ku kíimil maʼ okjaʼanakeʼ ku bin muʼyaj infierno wa uláakʼ tuʼux.

Baʼaleʼ yaan máax jeʼel u tuklikeʼ jach ku píitmáan le máaxoʼob tuklik leloʼ. U jaajileʼ u millonesil máakoʼob tsʼoʼok u kíimloʼob maʼ tu kanoʼob baʼax ku yaʼalik le Bibliaoʼ. ¿Jach wa túun tu jaajil ku náajmatik u castigartaʼaloʼob teʼ infiernooʼ? ¿Baʼax ku yaʼalik le Bibliaoʼ?

Le Bibliaoʼ juntaatsʼ u yeʼesikeʼ Dioseʼ maʼ u pʼekmaj le máaxoʼob maʼ páajchaj u kankoʼob baʼax uts tu tʼaaniʼ. Baʼaxoʼob 17:30, ku yaʼalik: «Dioseʼ maʼ tu chʼaʼaj en cuenta le kʼiinoʼob maʼ u yojel kaʼach máak baʼax ku beetkoʼ». ¿Baʼax túun kun úuchul tiʼ le máaxoʼob kíimoʼob yéetel maʼ béeychaj u kʼaj óoltikoʼob Diosoʼ?

Le baʼax tu núukaj Jesús tiʼ juntúul kʼasaʼan maak kíim tu tséeleʼ ku yáantkoʼon k-ojéelte. Le máakoʼ tu yaʼalaj tiʼ Jesús: «Jesús, kʼaʼajsen ken ookkech ta Reino». Jesuseʼ tu núukajtiʼ: «Tu jaajil kin waʼaliktech bejlaʼeʼ: Yaan a wantal tin wéetel teʼ Paraísooʼ» (Luc. 23:39-43).

¿Tu yaʼalaj wa Jesús yaan u bin kaʼan le máakoʼ? Maʼ. Tumen le máakoʼ maʼ ‹síijik tu kaʼatéen› tiʼ jaʼ mix tiʼ kiliʼich muukʼiʼ; lelaʼ kʼaʼabéet utiaʼal u yokol máak tu Reino Dios (Juan 3:3-6). Jesuseʼ tu yaʼalajtiʼ yaan u yokol teʼ Paraísooʼ. Maʼ xaaneʼ le máakoʼ tumen judíoeʼ u yuʼubmaj u yúuchul tʼaan tiʼ u jardinil Edén, le Paraíso anchaj way Luʼumoʼ, le ku tsikbaltaʼal tu yáax libroil le Bibliaoʼ (Génesis 2:8). Baʼaleʼ Jesuseʼ táan kaʼach u yaʼaliktiʼeʼ yaan u kaʼa kuxkíintaʼal utiaʼal u kajtal teʼ túumben Paraíso kun tsʼaabil way Luʼumoʼ.

Le Bibliaoʼ ku yaʼalikeʼ yaan «u kaʼa kuxkíintaʼal [...], le utsoʼoboʼ bey xan le kʼasaʼanoʼoboʼ» (Baʼaxoʼob 24:15). «Le kʼasaʼanoʼoboʼ» letiʼe máaxoʼob maʼ tu beetoʼob le baʼax u kʼáat Diosoʼ tumen maʼ tu yojéeltoʼobiʼ. Jesuseʼ yaan u kaʼa kuxkíintik le kʼasaʼan máak tʼaanaj yéeteloʼ bey xan u millonesil máakoʼob kíimoʼob táanil tiʼ u kaanbaloʼob tiʼ Diosoʼ. Teʼ Paraíso kun antal way Luʼumoʼ yaan u kaʼansaʼaltiʼob baʼax u kʼáat Dios yéetel yaan u páajtal u yeʼeskoʼob u yaabiltmoʼob Dios wa ku yuʼubikoʼob u tʼaan.

Ken kaʼa kuxkíintaʼak le kʼasaʼanoʼoboʼ, ¿yaan wa u juzgartaʼaloʼob yoʼolal baʼax u beetmoʼob táanil tiʼ u kíimloʼob? Maʼatech. Romailoʼob 6:7, ku yaʼalik: «Le máax tsʼoʼok u kíimiloʼ tsʼoʼok xan u jáalkʼabtaʼal tiʼ u kʼeban». Jeʼex k-ilkoʼ le kʼasaʼanoʼob tsʼoʼok u kíimloʼoboʼ tsʼoʼok u boʼotik u kʼebanoʼob, le oʼolaleʼ maʼ tu páajtal u juzgartaʼaloʼob yoʼolal baʼax tu beetoʼob táanil tiʼ u kíimloʼobiʼ, baʼaxeʼ yoʼolal baʼax ken u beetoʼob ken kaʼa kuxkíintaʼakoʼob. ¿Baʼax utsil ku taasiktiʼob leloʼ?

Ken kaʼa kuxkíintaʼakoʼobeʼ yaan u páajtal u kankoʼob baʼax ku yaʼalik le «túumben rolloʼoboʼ», wa le túumben leyoʼob ken u tsʼáa Diosoʼ. Letiʼ túun ken juzgartaʼakoʼob «yoʼolal le baʼax tu beetoʼoboʼ», wa tu tsʼoʼokbesoʼob le túumben leyoʼoboʼ wa maʼ (Apocalipsis 20:12, 13). Utiaʼal yaʼab kʼasaʼanoʼobeʼ leloʼ letiʼe yáax ken anaktiʼob u páajtalil u kaanbaloʼob yéetel u tsʼoʼokbeskoʼob u tʼaan Dios utiaʼal ka anaktiʼob kuxtal minaʼan u xuuloʼ.

Le Bibliaoʼ tsʼoʼok u yáantik yaʼab máakoʼob utiaʼal u kaʼa tsʼáa u fejoʼob tiʼ Dios. Juntúul tiʼ letiʼobeʼ Yeong Sug, juntúul koʼolel líikʼ bey catolicaeʼ. Jujuntúul tiʼ u láakʼtsiloʼobeʼ sacerdoteʼob kaʼachi. Letiʼeʼ ook ichil junpʼéel convento tumen u kʼáat u beet u monjail. Ka máan kʼiineʼ jóokʼi tumen lúub u yóol yoʼolal le baʼaxoʼob tu yiloʼ. Tsʼoʼoleʼ ku yuʼubik maʼ tu páajtal u creertik u kaʼansajil le infiernooʼ. Ku tuklik kaʼacheʼ juntúul dios yaan u yaabilajeʼ maʼ tu tóokik máak chéen utiaʼal u beetik u muʼyaj.

Junpʼéel kʼiineʼ juntúul u j-jaajkunaj Jéeobaeʼ tu yeʼesaj tiʼ Yeong Sug le tekstoaʼ: «Máaxoʼob kuxaʼanoʼobeʼ u yojloʼob bíin kíimkoʼob, baʼaleʼ kimenoʼobeʼ maʼ u yojloʼob mix baʼaliʼ maʼ xan tu náajaltikoʼob mix baʼal, tumen ku tuʼubsaʼaloʼob» (Eclesiastés 9:5). Le j-Jaajkunajoʼ tu yeʼesajtiʼ maʼ táan u muʼyaj u láakʼtsiloʼob teʼ infiernooʼ, baʼaxeʼ chéen táan u weenloʼob yéetel táan u páaʼtik u kaʼa kuxkíintaʼaloʼob.

Yeong Sug, u yojel yaʼab máakoʼob maʼ tu kanoʼob u jaajil yaan teʼ Bibliaoʼ, le oʼolaleʼ jach kʼuch tu puksiʼikʼal le baʼax tu yaʼalaj Jesús teʼ Mateo 24:14: «U maʼalob péektsilil le Reinoaʼ yaan u kʼaʼaytaʼal tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob, ken tsʼoʼokkeʼ letiʼ túun ken taalak u xuul». Bejlaʼeʼ letiʼeʼ táan u tsikbaltik tiʼ uláakʼ máakoʼob le jatsʼuts baʼaxoʼob tu kanaj teʼ Bibliaoʼ.

«Dioseʼ mix máak jelaʼan u paktik —ku yaʼalik le Bibliaoʼ—, baʼaxeʼ tiʼ tuláakal kaajeʼ ku kʼamik jeʼel máax u chʼaʼamaj saajkil tiʼ yéetel ku beetik baʼax utseʼ.» (Baʼaxoʼob 10:34, 35). Lelaʼ jach tu jaajil ku yeʼesik u justicia Dios, le máax «u yaakuntmaj baʼax tubeel, bey xan baʼax toj» (Salmo 33:5).