Le Bibliaoʼ ku yaʼalik baʼax ken u beet Jéeoba yéetel Jesucristo: «Lelaʼ letiʼe baʼax oʼolal chíikbesaʼab Jesús u Paal Diosaʼ: utiaʼal u kʼaskúuntik u meyaj le Kʼaasilbaʼaloʼ» (1 Juan 3:8). Le kʼaakʼas tsʼíibolaloʼob, pʼektajil, yéetel kʼasaʼanil yaan bejlaʼaʼ yaan u xuʼulsaʼal. ¿Baʼax kun úuchul tiʼ Satanás «u gobernanteil le yóokʼol kaabaʼ»? Jesuseʼ ku yaʼalikeʼ «yaan u xáakchʼintaʼal», wa u tojolchʼintaʼal (Juan 12:31). Ken luʼsaʼak u páajtalil le Kʼaasilbaʼaloʼ, Dioseʼ yaan u tsʼáaik junpʼéel túumben yóokʼol kaab tuʼux tuláakal máak kun kuxtal ich kiʼimak óolal yéetel jeetsʼelil (2 Pedro 3:13).

Baʼaleʼ ¿baʼax kun úuchul yéetel le máaxoʼob maʼ u kʼáat u pʼat u beetkoʼob baʼax kʼaasoʼ? Le Bibliaoʼ juntaatsʼ u yaʼalik: «Tumen le máaxoʼob noʼojaʼan u kuxtaloʼob yéetel x-maʼ siʼipileʼ bíin kuxlakoʼob junpuliʼ teʼ luʼumaʼ; baʼaleʼ le loolob máakoʼob yéetel le kaʼapʼéel ichoʼoboʼ bíin jóoʼsaʼakoʼob, bíin tojolchʼintaʼakoʼob xan tiʼ» (Proverbios 2:21, 22). Ken pʼáatak minaʼan mix juntúul kʼasaʼaneʼ, jujunpʼíitil kun luʼsbil u kʼeban le máaxoʼob uʼuyik u tʼaan Diosoʼ (Romailoʼob 6:17, 18; 8:21).

Utiaʼal ka u luʼs Dios le baʼaloʼob kʼaastakoʼ, ¿yaan wa u pʼatkoʼon bey robot utiaʼal maʼ k-chʼaʼtuklik t-juunal baʼax ken k-beete? Maʼ, baʼaxeʼ yaan u kaʼansiktoʼon k-beet baʼax maʼalob yéetel yaan u yáantkoʼon k-pʼat le baʼaxoʼob kʼaastakoʼ.

¿Kux túun le yaayaj baʼaloʼob chéen ku jáan úuchloʼoboʼ? Maʼ kun xáantaleʼ u Reino Dioseʼ yaan u controlartik tuláakal baʼal way Luʼumeʼ. Dioseʼ tsʼoʼok u yéeyik Jesucristo utiaʼal u beetik u reyil; le reyaʼ yaan páajtalil tiʼ utiaʼal u tsʼakik le kʼojaʼanoʼoboʼ (Mateo 14:14). Jesucristoeʼ ku páajtal xan u controlartik le iikʼoʼ, le jaʼoʼ yéetel le uláakʼ baʼaloʼob yaan way Luʼumaʼ (Marcos 4:35-41). Mix bikʼin kun «jáan úuchul wa baʼax» ka u beet u muʼyaj máak (Eclesiastés 9:11). Yáanal u gobierno Cristoeʼ mix junpʼéel yaayaj baʼal kun kaʼa úuchultoʼon (Proverbios 1:33).

¿Kux túun le u millonesil máakoʼob kíimoʼob tiʼ accidenteʼoboʼ? Jach le nukaʼaj u kaʼa kuxkíint Lázaroeʼ, Jesuseʼ tu yaʼalaj: «Teen le kuxtaloʼ, bey xan le kaʼa kuxtaloʼ» (Juan 11:25). Jeʼex k-ilkoʼ tiʼ Jesuseʼ yaan u páajtalil u kaʼa kuxkíintik le kimenoʼoboʼ.

Wa ka tsʼíiboltik a kuxtal tiʼ junpʼéel Luʼum tuʼux maʼ kun muʼyaj le máaxoʼob utsoʼoboʼ, xok le Bibliaoʼ. Wa ka beetkeʼ yaan a kanik yaʼab baʼaloʼob tu yoʼolal Jajal Dios bey xan yoʼolal baʼaxoʼob ken u beete. U j-jaajkunajoʼob Jéeoba yanoʼob ta kaajaleʼ yéetel kiʼimak óolal jeʼel u yáantkechoʼobeʼ. K-invitartikech ka tʼaanakech tu yéeteloʼob, wa maʼeʼ túuxt junpʼéel carta tiʼ le máaxoʼob jóoʼsik le revistaaʼ.