BAʼAXTEN MAʼ TU CREERTAʼAL: Bejlaʼeʼ ku tuklaʼaleʼ teʼ galaxia tuʼux yanoʼonoʼ yaan maas tiʼ cien mil millones planetaʼob jeʼex le Luʼumaʼ. Yaʼab máakoʼobeʼ ken u yiloʼob bukaʼaj nojchil le baʼax u beetmaj Diosoʼ, ku tuklikoʼob: «Wa utiaʼal Dios jach chichan le Luʼum tuʼux kajaʼanoʼonaʼ, ¿jeʼel wa u yilik baʼaxoʼob k-beetkeʼ?».

BAʼAX KU KAʼANSIK LE BIBLIAOʼ: Jéeoba * Dioseʼ ku kanáantkoʼon. Junpʼéel bix u yeʼesikeʼ letiʼe úuchik u tsʼáaiktoʼon le Bibliaoʼ. Teʼeloʼ ku yaʼaliktoʼon: «In wichoʼobeʼ táan u paktikechoʼob. Bíin in tsʼáatech kaʼanbesajiloʼob» (Salmo 32:8).

Koʼox ilik baʼax úuch tiʼ Agar, juntúul koʼolel kajlaj Egipto óoliʼ 1900 jaʼaboʼob táanil tiʼ Cristo. Tumen xuʼul u yeʼesik tsiikil tiʼ Sarai, u xunáaneʼ, Saraieʼ joʼopʼ u jach suʼlakkúuntik, ka anchaj u púutsʼul teʼ desiertooʼ. ¿Tuʼubsaʼab wa tumen Dios yoʼolal leloʼ? Le Bibliaoʼ ku yaʼalikeʼ «naktáantaʼab tumen juntúul u ángel [Jéeoba]», ka aʼalaʼabtiʼ: «[Dioseʼ] tu yuʼubaj a wokʼom óolal»; Agar túuneʼ tu núukaj: «[Dioseʼ] tu yilajen» (Génesis 16:4-13).

Dioseʼ tak teech ku kanáantkech. ¿Baʼaxten k-aʼalik leloʼ? Koʼox ketik beyaʼ: juntúul maamatsileʼ ku kanáantik tuláakal u paalal, baʼaleʼ maas ku tsʼaatáantik le mejentakoʼ tumen u yojel maʼ tu páajtal u kanáantkubaʼob tu juunaloʼob. Dios xaneʼ bey u beetkoʼ; maas ku kanáantkoʼon ken u yil lubaʼan k-óol wa yaan baʼax k-muʼyajtik. Jéeobaeʼ ku yaʼalik: «Teneʼ tiʼ [kajakbalen] tiʼ junpʼéel kiliʼich kaʼanal kúuchileʼ, baʼaleʼ tiʼ xan yanen tu yiknal óotsil ku muʼyajeʼ, utiaʼal ka in tsʼáa u yóol yéetel ka in beet u chʼaʼik u yiikʼ» (Isaías 57:15).

Kex beyoʼ yaan máax jeʼel u tuklikeʼ: «¿Bix u yilken Dios? ¿Ku yilik wa chéen bix in wíinklil, wa ku yilik baʼax yaan tin puksiʼikʼal? ¿U kʼaj óolen wa?».