¿Yaan wa baʼax oʼolal u tuklik David jeʼel u kʼaʼajsaʼal tumen Dioseʼ? ¿Kux túun teech? ¿Ku kʼaʼajsikech wa Dios? Yaʼab máakoʼobeʼ maʼ tu creertikoʼob wa le Dios jach yaan u páajtaliloʼ ku tuukul tu yoʼolaloʼob. ¿Baʼaxten?

Tumen wíinik bineʼ jach mix baʼal tu tséel Dios. Dioseʼ jach táaj yaan u páajtalil yéetel tiaʼan teʼ kaʼanoʼ. Utiaʼal letiʼeʼ tuláakal «le múuchʼ kaajoʼoboʼ chéen beyoʼob junchʼáaj jaʼeʼ, bey junpʼúuy luʼum tu yóokʼol [junpʼéel balanzaeʼ]» (Isaías 40:15). Juntúul ateoeʼ kʼuch tak u yaʼaleʼ «jach ku píitmáan le máax ku creertik yaan juntúul dios jeʼel u tuukul tu yoʼolaleʼ».

Uláakʼ máakoʼob xaneʼ yoʼolal bix u kuxtaloʼobeʼ ku tuklikoʼob maʼ tu náajmatikoʼob mix baʼal tiʼ Dios. Jeʼex Jaime, * juntúul máak yaan kex 40 wa 50 jaʼab tiʼeʼ, tu yaʼalaj: «Tin sen kʼáat óoltaj tiʼ Dios ka u yáanten in controlartinba, tumen séeb in pʼuʼujul. Baʼaleʼ ka tin wilaj láayliʼ bey u yúuchultenoʼ tin tukleʼ tsʼoʼok u píitmáan in kʼasaʼanil, le oʼolal maʼ tu yáantken».

¿Jach wa náach yanil Dios tiʼ wíinik le oʼolal maʼ tu páajtal u yilkoʼon? ¿Baʼax ku yuʼubik yoʼolal le j-kʼeban wíinikoʼoboʼ? Chéen yéetel u yáantaj Dios jeʼel k-ojéeltik le baʼaloʼobaʼ. Le Bibliaoʼ ku yaʼalikeʼ Dioseʼ «maʼ náach yanil tiʼ cada juntúul tiʼ toʼoneʼexiʼ» (Baʼaxoʼob 17:27). Teʼ kanpʼéel xook ku segueroʼ yaan k-ilik baʼax ku tuklik Dios yoʼolal wíinik yéetel bix tsʼoʼok u yeʼesik u yutsil tiʼ máakoʼob jeʼex techoʼ.