Julio: Ernesto, jach kiʼimak in wóol in kaʼa xíimbaltikech utiaʼal k-kaanbal tiʼ le Bibliaoʼ. * U tsʼookbalak ka xooknajoʼoneʼ ta kʼáatajten baʼaxten u j-jaajkunajoʼob Jéeobaeʼ ku creertikoʼob 1914 ka káaj u gobernar u Reino Dios. ¿Kʼajaʼan wa tech?

Ernesto: Jaaj, bey tin wilil teʼ revista ka tʼoxkeʼexoʼ: u Reino Dioseʼ 1914 bin ka káaj u gobernar. Ka tin waʼaleʼ: «¿Bix túun? ¿Maʼ ka waʼalikeʼexeʼ teʼ Biblia ka chʼaʼikeʼex le baʼax ka kaʼanskeʼexoʼ?».

Julio: Jaaj, beyoʼ.

Ernesto: Jeʼeloʼ. Teneʼ in láaj xokmaj le Bibliaoʼ baʼaleʼ maʼ kʼajaʼanten in wilik le jaʼab 1914 ka waʼalikeʼexoʼ. Tsʼoʼoleʼ ooken tiʼ junpʼéel Biblia ich Interneteʼ ka tin tsʼíibtaj «1914» utiaʼal in kaxtik, baʼaleʼ mix baʼal chíikpajiʼ.

Julio: Kin felicitarkech, Ernesto, tumen yaan kaʼapʼéel baʼal jach maʼalob ta beetaj. Yáaxeʼ tsʼoʼok a láaj xokik le Bibliaoʼ. Chíikaʼan jach uts ta tʼaan.

Ernesto: Jaaj, minaʼan uláakʼ libro jeʼex le Bibliaoʼ.

Julio: Bey xan in waʼalikoʼ. Uláakʼ baʼax maʼalob ta beeteʼ ta kaxtaj teʼ Biblia le baʼax taak a wojéeltikoʼ. Ta beetaj jeʼex u yaʼalik le Bibliaoʼ: ‹Sen kʼáat ka yanaktech naʼat›. * Yaaske ta beetaj beyoʼ. Kin felicitarkech.

Ernesto: Diosboʼotik, Julio. Teneʼ uts tin tʼaan in kaanbal. U jaajileʼ tsʼoʼok tak in xakʼaltik le libro ta tsʼáajtenoʼ, yéetel kin wilkeʼ ku tʼaan xan yoʼolal le jaʼab 1914. Ku tsolik baʼax tu wayakʼtaj juntúul rey: junkúul cheʼ jach táaj nojoch bin, kúulxotʼtaʼabi baʼaleʼ joʼopʼ u kʼuʼukʼankil.

Julio: Áan jaaj. Letiʼe profecía yaan teʼ capítulo 4 tiʼ u libroil Danieloʼ. Le profecíaaʼ ku tʼaan tiʼ le wayakʼ anchaj tiʼ Nabucodonosor, u reyil Babiloniaoʼ.

Ernesto: Jaaj, letiʼe jeʼeloʼ. Yaʼab u téenel tsʼoʼok in xokik teʼ Bibliaoʼ, baʼaleʼ maʼ tin naʼatik baʼax yaan yil yéetel u Reino Dios mix yéetel u jaʼabil 1914.

Julio: Maʼ a tuklik. Mix profeta Daniel kʼuch u naʼat jach tubeel.

Ernesto: ¿Jach jaaj?

Julio: Jaaj. Ilawil baʼax tu tsʼíibtaj teʼ Daniel 12:8. Ku yaʼalik: «Teen túuneʼ tin wuʼuyaj le baʼaloʼobaʼ, chéen baʼaleʼ maʼ páajchaj in naʼatikiʼ».

 Ernesto: Jeʼeloʼ, maʼ chéen teen maʼ tin naʼatikiʼ. Tsʼoʼok a líiʼsik in wóol.

Julio: Danieleʼ maʼ tu jach naʼatiʼ tumen jeʼex tu yaʼalil Dioseʼ maʼ kʼuchuk u kʼiinil u naʼataʼaliʼ. Baʼaleʼ bejlaʼeʼ jeʼel u páajtal k-naʼatik le profecíaʼob tu tsʼíibtoʼ.

Ernesto: ¿Tu jaajil?

Julio: Jaaj, bey u yaʼalik Daniel 12:9: «Le tʼaanoʼobaʼ yaan u taʼakaʼaloʼob yéetel yaan u pʼáatloʼob selladoil tak teʼ tu tsʼook kʼiinoʼoboʼ». Le baʼaxoʼob ku yúuchul bejlaʼoʼ ku yeʼesik táan k-kuxtal tu tsʼook kʼiinoʼob. Baʼaleʼ leloʼ yaan k-ilik maas táanil. *

Ernesto: ¿Kux túun u profecía Daniel? ¿Jeʼel wa a tsolikteneʼ?

Julio: Jeʼeleʼ. Koʼox ilik wa maʼ tin xaʼakʼpajal.

Julio: Táanileʼ koʼox ilik jach baʼax tu wayakʼtaj le rey Nabucodonosoroʼ, tsʼoʼoleʼ k-ilik baʼax u kʼáat u yaʼale.

Ernesto: Maʼalob.

Julio: Ichil u wayakʼ Nabucodonosoreʼ tu yilaj junkúul sen kaʼanal cheʼ ku kʼuchul tak teʼ kaʼanoʼ. Tsʼoʼoleʼ tu yuʼubaj u yaʼalaʼal tumen Dios ka chʼaʼakak. Chéen u chuun yéetel u moots pʼáati. Ka máan siete jaʼaboʼobeʼ le junkúul cheʼoʼ kaʼa nojochchaji. * Le profecíaoʼ yáax béeychaj tu kuxtal Nabucodonosor. Letiʼeʼ juntúul rey jach yaan u páajtalil kaʼachi, jeʼex le kaʼanal cheʼ ku kʼuchul tak teʼ kaʼanoʼ. Baʼaleʼ luʼsaʼab tu trono, yéetel «siete años [wa jaʼaboʼob]» maʼ tu beetaj u reyiliʼ. ¿Kʼajaʼan wa tech baʼax úuchtiʼ?

Ernesto: Maʼ kʼajaʼanteniʼ.

Julio: Le Bibliaoʼ ku yaʼalikeʼ chokochaj u pool, yéetel bey pʼáatik «siete añosoʼ». Baʼaleʼ ka máan le siete jaʼaboʼoboʼ utschajeʼ ka tu kaʼa beetaj u reyil. *

Ernesto: Tak teʼelaʼ tsʼoʼok in naʼatik. Baʼaleʼ ¿baʼax yaan yil yéetel u Reino Dios bey xan yéetel u jaʼabil 1914?

Julio: Paʼatik in jáan tsoliktech. Le profecíaaʼ kaʼapʼéel bix tsʼoʼok u béeychajal. Le yáaxoʼ letiʼe ka xuʼul u beetik u reyil Nabucodonosoroʼ. U kaʼapʼéeleʼ letiʼe ka xuʼul u gobernar Dios way Luʼumoʼ. Le beetik yaan baʼax u yil yéetel u Reino Dios.

Ernesto: ¿Bix túun a wojéeltikeʼex kaʼapʼéel bix béeychajik le profecíaaʼ?

Julio: Yáaxeʼ tumen letiʼe profecía eʼesik beyoʼ. Daniel 4:17, ku yaʼalikeʼ le profecíaoʼ tsʼaʼab «ka ojéeltaʼak tumen tuláakal máak de ke le Maas Nojoch Diosoʼ letiʼ u Gobernanteil le wíinikoʼoboʼ. Letiʼeʼ ku tsʼáaik reinar le máax u kʼáat letiʼoʼ». ¿Ta wilaj wa le xóotʼ tuʼux ku yaʼalik ‹u Gobernanteil le wíinikoʼoboʼ›?

Ernesto: Jaaj, ku yaʼalikeʼ «le Maas Nojoch Diosoʼ letiʼ u Gobernanteil le wíinikoʼoboʼ».

Julio: Beyoʼ. Le tekstooʼ ku yeʼesikeʼ maʼ chéen tiʼ Nabucodonosor ku tʼaan le profecíaoʼ. Ku tʼaan xan tiʼ le páajtalil yaan tiʼ Dios ‹tu yóokʼol u gobiernoiloʼob wíinik›. Wa k-ilik le uláakʼ baʼax ku yaʼalik le profecíaoʼ yaan k-tsʼáaik cuenta.

Ernesto: ¿Bey máakalmáakiʼ?

Julio: Yaan junpʼéel baʼal yaʼab u téenel ku yaʼalaʼal tu libroil Daniel. Ku yaʼalaʼaleʼ yaan u tsʼaʼabal u Reino Dios yáanal u kʼab Jesucristo, u Paal Dios. Utiaʼal a wilkeʼ koʼox suut tiʼ Daniel 2:44. Beet uts a xokik.

Ernesto: Maʼalob. Ku yaʼalik: «Teʼ kʼiinoʼob táan u gobernar le reyoʼoboʼ u Diosil le kaʼanoʼ yaan u tsʼáaik junpʼéel reino mix bikʼin  kun xuʼulsbiltiʼ. Le reinoaʼ mix bikʼin kun máan tu kʼab uláakʼ kaaj. Baʼaxeʼ yaan u xiixkúuntik yéetel yaan u xuʼulsik tiʼ tuláakal le reinoʼobaʼ, chéen letiʼ kun pʼáatal utiaʼal mantatsʼ».

Julio: Diosboʼotik. A tuklikeʼ le tekstoaʼ ¿táan wa u tʼaan tiʼ u Reino Dios?

Ernesto: Mmm... Kensa bixi.

Julio: Wa ta wileʼ ku yaʼalikeʼ le Reino ken u tsʼáa Diosoʼ «chéen letiʼ kun pʼáatal utiaʼal mantatsʼ». ¿Máasaʼ mix juntúul wíinik jeʼel u beetik u reyil utiaʼal minaʼan u xuuleʼ?

Ernesto: Maʼ, mix juntúul.

Julio: Yaan uláakʼ profecía tu libroil Daniel ku beetik k-tuukul tiʼ u Reino Dios. Tiaʼan teʼ Daniel 7:13, 14. Ku yaʼalik:«Tiʼ letiʼeʼ tsʼaʼab páajtalil utiaʼal u gobernar, beetaʼab u respetartaʼal yéetel tsʼaʼab junpʼéel reino tiʼ, utiaʼal beyoʼ ka meyajtaʼak tumen u kajnáaliloʼob tuláakal kaajoʼob, luʼumoʼob bey xan tumen le máaxoʼob ku tʼankoʼob jejeláas idiomaʼoboʼ. U gobiernoeʼ junpʼéel gobierno mix bikʼin kun máan, yéetel u reinoeʼ mix bikʼin kun xuʼulsbiltiʼ?».

Ernesto: Jaaj, ku yúuchul tʼaan tiʼ junpʼéel reino.

Julio: Jach beyoʼ. Baʼaleʼ maʼ jeʼel baʼaxak reinoileʼ. Jeʼex ta wiloʼ, ku yaʼalik yaan u meyajtaʼal tumen «u kajnáaliloʼob tuláakal kaajoʼob».

Ernesto: Maʼ in tukult kaʼach leloʼ, baʼaleʼ jaaj a tʼaan. Bey u yaʼalikoʼ.

Julio: Tsʼoʼoleʼ ku yaʼalik xaneʼ «junpʼéel gobierno mix bikʼin kun máan, yéetel u reinoeʼ mix bikʼin kun xuʼulsbiltiʼ». ¿Máasaʼ le profecíaaʼ jach chíikaʼan tiʼ le t-xokaj teʼ Daniel 2:44?

Ernesto: Jaaj, beyoʼ.

Julio: Jeʼeloʼ, Ernesto, tak beoraaʼ tsʼoʼok k-ilkeʼ u profecíail Daniel capítulo 4, tsʼaʼab utiaʼal ka ojéeltaʼakeʼ «le Maas Nojoch Diosoʼ letiʼ u Gobernanteil le wíinikoʼoboʼ». Chéen yéetel lelaʼ t-tsʼáaj cuentaeʼ maʼ chéen ku tʼaan tiʼ u reino Nabucodonosoriʼ. Tsʼoʼoleʼ t-ilaj xaneʼ tu libroil Danieleʼ yaʼab u téenel ku tʼaan tiʼ u Reino Dios kun tsʼaabil tu kʼab Jesucristo. ¿Ta wilaj wa túun baʼaxten k-aʼalikeʼ u profecíail Daniel capítulo 4, táan u tʼaan xan tiʼ u Reino Dios?

Ernesto: Jaaj, tin wilaj. Baʼaleʼ láayliʼ maʼ tin naʼatik baʼax yaan yil yéetel 1914.

Julio: Koʼox kaʼa tʼaan tiʼ rey Nabucodonosor. T-aʼaleʼ kaʼapʼéel bix béeychajik le baʼax tu yilaj tu wayakʼoʼ. Le junkúul cheʼ tu wayakʼtaj le reyaʼ yáaxeʼ tu chíikbesaj baʼax kun úuchul kaʼach tiʼ u reino. Jeʼex chʼaʼakik le cheʼoʼ bey luʼsaʼabik xan Nabucodonosor tu tronooʼ. Le siete jaʼaboʼob xáanchaj chéen bey anik le cheʼ chʼakaʼanoʼ, tu chíikbesaj xan le siete jaʼaboʼob kun máan le rey bey juntúul baʼalcheʼoʼ. Baʼaleʼ ka suunaj tu yóoleʼ kaʼa kulaj tu trono. Le uláakʼ bix béeychajik le wayakʼoʼ letiʼe ka xuʼul u gobernar Dios way Luʼumoʼ, baʼaleʼ maʼ tumen wa yaan baʼax kʼaas tu beetiʼ.

Ernesto: ¿Bixi? Maʼ tin naʼatik.

Julio: Tu kʼiinil le úuchben israelitaʼoboʼ, u reyiloʼob Jerusaleneʼ ku kutaloʼob «tu trono Jéeoba». * Leloʼ u kʼáat u yaʼaleʼ tu kʼaabaʼ Dios ku gobernaroʼob kaʼachi. Baʼaleʼ ka máan kʼiineʼ u maas yaʼabil le reyoʼoboʼ tu traicionartoʼob Dios; bey tu beetil xan óoliʼ tuláakal le  israelitaʼoboʼ. Le oʼolal Dioseʼ tu chaʼaj u xuʼulsaʼaloʼob tumen le babilonioʼob tu jaʼabil 607 táanil tiʼ Cristooʼ. Desde teʼ kʼiin túunoʼ teʼ Jerusalenoʼ maʼ anchaj uláakʼ rey ku gobernar tu kʼaabaʼ Jéeobaiʼ. Jeʼel u páajtal k-aʼalikeʼ xuʼul u gobernar Dios. Tak teʼelaʼ ¿tsʼoʼok wa a naʼatik?

Ernesto: Jaaj, tsʼoʼoki.

Julio: Jeʼeloʼ, tu jaʼabil 607 táanil tiʼ Cristo káaj u xoʼokol le «siete años» maʼ táan u gobernar Diosoʼ. Ka tsʼoʼok le «siete añosoʼ» Dioseʼ tu yéeyaj juntúul rey utiaʼal u gobernar tu kʼaabaʼ, baʼaleʼ teʼ kaʼanoʼ. Tiʼ xan béeychaj le uláakʼ profecíaʼob k-xokik tu libroil Danieloʼ. Baʼaleʼ ¿jach baʼax kʼiin ka tsʼoʼok le «siete añosoʼ»? Wa ka k-ojéelteʼ jeʼel k-ilik baʼax kʼiin ka káaj u gobernar u Reino Dioseʼ.

Ernesto: Aan, letiʼe túun ka waʼalikeʼex tsʼoʼok 1914.

Julio: Ándale, jach beyoʼ.

Ernesto: Baʼaleʼ ¿bix túun a wojéeltikeʼex?

Julio: Eske le ka taal Jesús way Luʼumeʼ tu yaʼaleʼ maʼ tsʼoʼokok le siete jaʼaboʼoboʼ. * Le siete jaʼaboʼoboʼ u jaajileʼ ku chíikbesik u cientosil jaʼaboʼob. Tumen le ka taal Jesús way Luʼumeʼ tsʼokaʼaniliʼ u máan yaʼab jaʼaboʼobeʼ yéetel bey úuchik xan ka suunaj teʼ kaʼanoʼ. Tsʼoʼoleʼ kʼaʼajaktecheʼ u profecíaʼob Danieleʼ yaan u kʼuchul u naʼataʼal tu «tsʼook kʼiinoʼob». * Tu tsʼoʼokbal le siglo 19, junmúuchʼ máakoʼob ku xokikoʼob le Bibliaoʼ taakchaj u naʼatkoʼob le profecíaʼobaʼ ka tu xakʼaltoʼob. Jujunpʼíitileʼ tu naʼatoʼobeʼ le «siete añosoʼ» yaan u tsʼoʼokol kaʼach 1914. Le baʼaxoʼob tsʼoʼok u yúuchul desde teʼ jaʼaboʼ ku yeʼesikeʼ 1914 ka káaj u gobernar u Reino Dios teʼ kaʼanoʼ. Bey káajik xan le ku yaʼalaʼal u «tsʼook kʼiinoʼoboʼ». ¿Máasaʼ jach yaʼab baʼax tsʼoʼok k-kanik bejlaʼeʼ, Ernesto?

Ernesto: Jaaj. Míin yaan u kʼaʼabéettal in kaʼa xokik utiaʼal in naʼatik tubeel.

Julio: Maʼ a tuklik. Si tak teneʼ maʼ séeb úuchik in jáan naʼatik tuláakal lelaʼ. Baʼaleʼ kexiʼ wa ta tsʼáaj cuenta teʼ Biblia k-chʼaʼik tuláakal le baʼax k-kaʼansik yoʼolal le Reinooʼ.

Ernesto: In wojel. Teʼexeʼ mantatsʼ ka kʼubik a wóoleʼex tiʼ baʼax ku yaʼalik le Bibliaoʼ.

Julio: In wojel techeʼ ka creertik xan le Bibliaoʼ, Ernesto. Baʼaleʼ jeʼex in waʼaliktechoʼ, yaʼab baʼax tsʼoʼok k-tsikbaltik. Le oʼolal maʼ xaaneʼ láayliʼ yaan baʼaxoʼob taak a wojéeltikeʼ. Maʼ xaaneʼ taak a wojéeltik bix úuchik k-naʼatik tu jaʼabil 1914 ka tsʼoʼok le «siete añosoʼ». *

Ernesto: Jaaj, letiʼe taak in wojéeltikoʼ.

Julio: Le Bibliaoʼ jeʼel u yáantkoʼon k-naʼat jach bukaʼaj ku xáantal le «siete añosoʼ». ¿Uts wa ta tʼaan ka tsikbalnakoʼon tu yoʼolal ken kaʼa suunaken? *

Ernesto: Maʼalob. ¿Báanten maʼ?