Jeʼex tsʼoʼok a wilik teʼ yáax xookoʼoboʼ, utiaʼal u j-jaajkunajoʼob Jéeobaeʼ jach kʼaʼanaʼan u Reino Dios. Maʼ xaaneʼ jatsʼuts ta wilil jujunpʼéel tiʼ le baʼaloʼob ken u beet le Reinooʼ, baʼaleʼ ka tuklikeʼ bey maʼ tu páajtal u yúuchul baʼaloʼob beyoʼ.

Maʼalob maʼ u jáan creertik máak tuláakal le baʼaxoʼob ku yaʼalaʼaltiʼoʼ (Proverbios 14:15). Le yáax cristianoʼob kajaʼanoʼob kaʼach tu kaajil Bereaoʼ * maʼ xan tu jáan creertoʼob u maʼalob péektsilil le Reino ka yáax tsikbaltaʼabtiʼoboʼ, baʼaxeʼ tu xakʼaltoʼob le Kiliʼich Tsʼíiboʼob «utiaʼal u yilkoʼob wa jaaj» (Baʼaxoʼob 17:11). Le baʼax kaʼansaʼabtiʼoboʼ tu ketoʼob yéetel baʼax ku yaʼalik le Bibliaoʼ.

U j-jaajkunajoʼob Jéeobaeʼ ku invitartikechoʼob utiaʼal a beetik jeʼex le yáax cristianoʼob kajlajoʼob Bereaoʼ. Wa ka xokik le Biblia t-éeteloʼ yaan u páajtal a wilik wa teʼ Biblia k-chʼaʼik le baʼaxoʼob k-kaʼansik yoʼolal le Reinooʼ.

Wa ka xooknakech t-éeteleʼ maʼ chéen yaan a kaanbal yoʼolal le Reinooʼ, baʼaxeʼ yaan a kaxtik xan u núukil kʼáatchiʼob kʼaʼanaʼantak jeʼex leloʼobaʼ:

•   ¿Bix anchajik wíinik?

• ¿Baʼax oʼolal kuxaʼanoʼon?

• ¿Baʼaxten ku chaʼik Dios k-muʼyaj?

• ¿Baʼax ku yúuchul tiʼ máak ken kíimik?

• ¿Yaan wa u xuʼulsaʼal le Luʼumaʼ?

• ¿Bix jeʼel u yantal kiʼimak óolal ichil le familiaoʼ?

Baʼaleʼ u maas kʼaʼanaʼanileʼ, wa ka xokik le Bibliaoʼ yaan a ‹natsʼkaba tiʼ Dios› (Santiago 4:8). Wa maas ka natsʼkaba tiʼ Dioseʼ maas yaan a wilik baʼax ku beetik u Reino Dios ta woʼolal, maʼ chéen bejlaʼeʼ, baʼaxeʼ tak teʼ kʼiinoʼob ku taaloʼ. Jesuseʼ tu yaʼalaj tiʼ u Taata: «Lelaʼ letiʼe baʼax ku tsʼáaik kuxtal minaʼan u xuuloʼ: ka kʼuchuk u kʼaj óoltechoʼob, teech le u juntúuliliʼ jaajil Diosoʼ, bey xan ka u kʼaj óoltoʼob Jesucristo, le máax ta túuxtoʼ» (Juan 17:3).