Julio: Ernesto, kiʼimak in wóol in kaʼa xíimbaltikech. Jach uts tin tʼaan in xokik le Biblia ta wéetel cada semanaoʼ. * ¿Bix u bintech?

Ernesto: Chan maʼalob.

Julio: ¡Yaaske! Le u tsʼook ka taalenoʼ, t-ilaj baʼaxten u j-jaajkunajoʼob Jéeobaeʼ k-aʼalik 1914 ka káaj u gobernar u Reino Dios. * Le capítulo 4 tiʼ Danieloʼ tu yáantoʼon k-il baʼaxten. ¿Kʼajaʼan wa tech baʼax ku yaʼalik?

Ernesto: Jaaj, kʼajaʼanten. Ku tʼaan tiʼ u wayakʼ le rey Nabucodonosoroʼ.

Julio: Jach beyoʼ. Ichil u wayakʼeʼ le reyoʼ tu yilaj junkúul sen kaʼanal cheʼ ku kʼuchul tak teʼ kaʼanoʼ, ka tu yuʼubaj u yaʼalaʼal tumen juntúul ángel ka kúulchʼaktaʼak le cheʼoʼ. Chéen u chuun yéetel u moots pʼáati, baʼaleʼ ka máan «siete añoseʼ» kaʼa nojochchaji. * T-ilaj xaneʼ kaʼapʼéel bix tsʼoʼok u béeychajal le profecíaoʼ. ¿Kʼajaʼan wa tech bix yáax béeychajik?

Ernesto: Letiʼe ka chokochaj u pool Nabucodonosoroʼ, ¿máasaʼ? Siete jaʼaboʼob bin pʼáat beyoʼ.

Julio: Jaaj, beyoʼ. Chokochaj u pooleʼ ka xuʼul u beetik u reyil. U kaʼapʼéel bix béeychajik le profecíaoʼ letiʼe ka xuʼul u gobernar Dios way Luʼum tu yáam siete jaʼaboʼoboʼ. Leloʼ káaj tu jaʼabil 607 táanil tiʼ Cristo, le ka xuʼulsaʼab u kaajil Jerusalenoʼ. Desde teʼ kʼiin jeʼeloʼ xuʼul u yantal reyoʼob ku gobernaroʼob tu kʼaabaʼ Jéeoba way Luʼumeʼ. Ken tsʼoʼokok kaʼach le siete jaʼaboʼoboʼ Dioseʼ yaan u yéeyik juntúul rey utiaʼal ka gobernarnak teʼ kaʼanoʼ. Letiʼ túun ken kaʼa káajak u gobernar u Reino Dios. Tak beoraaʼ tsʼoʼok k-ilik baʼax kʼiin ka káaj le siete jaʼaboʼoboʼ. Beoraaʼ chéen unaj k-ilik jach bukaʼaj xáanchaji, beyoʼ jeʼel k-ojéeltik jach baʼax jaʼabil ka káaj u gobernar u Reino Dioseʼ. ¿Táan wa u bin a naʼatik?

Ernesto: Táan. Tsʼoʼok u kʼaʼajalten le baʼax ta yáax tsikbaltajtenoʼ.

Julio: Jeʼeloʼ, koʼox ilik túun bukaʼaj xáanchaj le siete jaʼaboʼoboʼ. U jaajileʼ tak teen anchaj in kaʼa xakʼaltik tubeel. Koʼox ilik wa jeʼel in kanik in tsoltecheʼ.

Ernesto: Maʼalob.

Julio: Le ka yáax béeychaj le profecía tu kuxtal Nabucodonosoroʼ, siete jaʼaboʼob xáanchaji. Baʼaleʼ le u kaʼapʼéel bix béeychajikoʼ, le yaan yil yéetel  u Reino Diosoʼ, maas yaʼab jaʼaboʼob xáanchaji.

Ernesto: ¿Bix túun a wojéeltik?

Julio: Yáax táanileʼ, tumen le siete jaʼaboʼoboʼ káaj u xoʼokol le ka xuʼulsaʼab Jerusalén tu jaʼabil 607 táanil tiʼ Cristooʼ. Wa k-xokik siete jaʼaboʼob desde teʼeloʼ, k-kʼuchul tu jaʼabil 600 táanil tiʼ Cristo. Baʼaleʼ teʼ jaʼaboʼ maʼ úuch mix baʼal yaan yil yéetel u Reino Diosiʼ. Tsʼoʼoleʼ ka máan u cientosil jaʼaboʼobeʼ, Jesuseʼ taal way Luʼumeʼ ka tu yaʼalaj láayliʼ maʼ tsʼoʼokok le siete jaʼaboʼoboʼ.

Ernesto: Jaaj a tʼaan. Tsʼoʼok k-tsikbaltik leloʼ.

Julio: Jeʼex túun a wilkoʼ, le siete jaʼaboʼoboʼ ku chíikbesik u cientosil jaʼaboʼob.

Ernesto: ¿U cientosil? ¿Jach bukaʼaj túun?

Julio: Koʼox ilik. Tu libroil Apocalipsiseʼ yaan junpʼéel profecía jach chíikaʼan tiʼ u profecíail Daniel. Lelaʼ yaan u yáantkoʼon k-ojéelt jach bukaʼaj xáanchaj le siete jaʼaboʼoboʼ. Apocalipsiseʼ ku yaʼalikeʼ óoxpʼéel jaʼab yéetel táanchumukeʼ 1,260 kʼiinoʼob. * Siete jaʼaboʼobeʼ u dobleil leloʼ. Wa k-sumartikeʼ ku taal u tsʼáa 2,520 kʼiinoʼob. ¿Ta naʼataj?

Ernesto: Jaaj, baʼaleʼ láayliʼ maʼ tin naʼatik baʼaxten ka waʼalikeʼex 1914 ka káaj u gobernar u Reino Dioseʼ.

Julio: Maʼalob, beora ken k-ilaʼ. Tiʼ jujunpʼéel profecíaʼob yaan teʼ Bibliaoʼ junpʼéel kʼiineʼ u kʼáat u yaʼal junpʼéel jaʼab. * Le 2,520 kʼiinoʼob túunoʼ u jaajileʼ 2,520 jaʼaboʼob. Wa ku káajal k-xokik 2,520 jaʼaboʼob desde tu jaʼabil 607 táanil tiʼ Cristo —le kʼiin ka káaj le siete jaʼaboʼoboʼ—, yaan k-kʼuchul tu jaʼabil 1914. * Le oʼolal k-aʼalikeʼ 1914 ka tsʼoʼok le siete jaʼaboʼoboʼ yéetel tiʼ káaj u gobernar Jesús bey Rey tiʼ u Reino Dioseʼ. Tsʼoʼoleʼ 1914 xan ka káaj u yilaʼal le baʼax ku yaʼalik le Biblia kun úuchul tu tsʼook kʼiinoʼoboʼ.

Ernesto: ¿Baʼax kun úuchul?

Julio: Teʼ Mateo 24:7, Jesuseʼ tu yaʼalaj baʼax kun úuchul ken káajak u gobernar teʼ kaʼanoʼ: «Junpʼéel kaajeʼ yaan u baʼateʼel tu contra uláakʼ kaaj, junpʼéel reinoeʼ yaan u baʼateʼel tu contra uláakʼ reino, yaan u pʼáatal minaʼan baʼal jaantbil yéetel jejeláas tuʼux ken u tíituba le luʼumoʼ». Jeʼex a wilkoʼ, Jesuseʼ tu yaʼalaj yaan u yantal wiʼijil yéetel yaan u tíitkuba le luʼumoʼ. ¿Maʼ wa letiʼe baʼax ku yúuchul way Luʼum desde 1914?

Ernesto: Jaaj, jach beyoʼ.

Julio: Jesuseʼ tu yaʼaleʼ yaan xan u líikʼil baʼateʼel le máakoʼoboʼ. U libroil Apocalipsis xaneʼ ku tʼaan tiʼ nukuch baʼateltáambaloʼob ken u taas nojoch muʼyajil tiʼ tuláakal yóokʼol kaab. * ¿Kʼajaʼan wa tech baʼax kʼiin ka úuch le Yáax Nojoch Baʼateltáambaloʼ?

Ernesto: Tu jaʼabil 1914. Jach letiʼe jaʼab ka waʼalikeʼex káaj u gobernar Jesusoʼ. ¡Bix ken in tsʼáa cuenta kaʼachi!

Julio: Ken tuukulnakoʼon tiʼ u profecíail le siete jaʼaboʼob yéetel tiʼ le profecíaʼob ku tʼaanoʼob yoʼolal u tsʼook kʼiinoʼoboʼ, k-tsʼáaik cuentaeʼ jach bey úuchikoʼ. Toʼon u j-jaajkunajoʼob Jéeobaeʼ k-creertik jach tu jaajil 1914 ka káaj u gobernar  Jesús teʼ kaʼanoʼ, yéetel letiʼ ka káaj le u tsʼook kʼiinoʼoboʼ. *

Ernesto: Istikyaj u naʼatik máak tuláakal lelaʼ.

Julio: Maʼ a chéen tuklik. Tak teen talamchaj in naʼatik le yáax ka tsoʼoltenoʼ. Baʼaleʼ kexiʼ ka u yáantech le tsikbal t-beetoʼ utiaʼal a wilik baʼaxten k-aʼalik 1914 ka káaj u gobernar Jesús, kex maʼ tsʼíibtaʼan le jaʼab 1914 teʼ Bibliaoʼ. Kexiʼ wa ta tsʼáaj cuenta xaneʼ teʼ Biblia k-chʼaʼik tuláakal le baʼax k-creertikoʼ.

Ernesto: Jaaj, letiʼe baʼax uts tin tʼaanoʼ. Techeʼ teʼ Biblia ka weʼesikten le baʼax ka tsoliktenoʼ. Mix juntéen ka waʼalik «In tuklikeʼ», «In waʼalikeʼ». Mantatsʼ ku meyajtech le Bibliaoʼ. Chéen maʼ in wojel baʼaxten istikyaj u naʼataʼal le Bibliaoʼ. ¿Baʼaxten maʼ juntaatsʼ tu yaʼalaj Dios wa 1914 kun káajal u gobernar Jesusiʼ?

Julio: Jach maʼalob le baʼax ka tuklikoʼ, Ernesto. Yaʼab baʼaloʼob maʼ tu yaʼalaʼal juntaatsʼ teʼ Bibliaoʼ. ¿Baʼaxten ta tʼaan? ¿Baʼaxten unaj k-tsʼáaik k-óol utiaʼal k-naʼatik? ¿Uts wa ta tʼaan ka suunaken tuláakʼ semana utiaʼal ka k-tsikbalt leloʼ?

Ernesto: Maʼalob. Jeʼel in páaʼtikecheʼ.