¿Máasaʼ maʼ tu páajtal a waʼalik a amigo juntúul máak maʼ a wojel bix u kʼaabaʼiʼ? Bey u yúuchul xan yéetel Diosoʼ. Jeʼex tu yaʼalil Irina, juntúul koʼolel tu luʼumil Bulgariaeʼ, «maʼ tu páajtal a beetkaba u amigo Dios wa maʼ a wojel bix u kʼaabaʼiʼ». Dioseʼ u kʼáat ka a natsʼaba tiʼ letiʼ. Le oʼolal teʼ Bibliaoʼ ku yaʼalik bix u kʼaabaʼ: «Teen Jehová; lelaʼ in kʼaabaʼ» (Isaías 42:8, Reina-Valera [RV]).

¿Jach wa tu jaajil u kʼáat Jéeoba (wa Jehová) ka k-ojéelt bix u kʼaabaʼ yéetel ka k-chʼaʼchiʼite? Tukle: teʼ úuchben Tsʼíiboʼob ich Hebreo, wa Antiguo Testamentooʼ, u kʼaabaʼ Dioseʼ tsʼíibtaʼan óoliʼ 7,000 u téenel yéetel le kanpʼéel letraʼob kʼaj óolaʼan Tetragramatonoʼ. Lelaʼ ku yeʼesikeʼ Jéeobaeʼ u kʼáat ka k-ojéelt bix u kʼaabaʼ yéetel ka k-chʼaʼchiʼite. *

Yaʼab máax tuklikeʼ wa k-chʼaʼchiʼitik u kʼaabaʼ Dioseʼ maʼ táan k-eʼesik tsiikil tiʼiʼ, tumen Dioseʼ santo yéetel jach yaan u páajtalil. ¿Máasaʼ maʼ tu meyajtoʼon u kʼaabaʼ juntúul k-amigo utiaʼal k-tʼaan kʼaas tu yoʼolal? Bey túun xanoʼ maʼ unaj u meyajtoʼon u kʼaabaʼ Dios chéen utiaʼal k-tʼaan kʼaas tu yoʼolaliʼ. Baʼaxeʼ unaj k-chʼaʼchiʼitik u kʼaabaʼ yéetel tsiikil, tumen letiʼeʼ u kʼáat ka k-tsʼáa ojéeltbil u kʼaabaʼ (Salmo 69:30, 31; 96:2, 8). Jesuseʼ tu kaʼansaj tiʼ u disipuloʼob ka orarnakoʼob beyaʼ: «K-Taata yanech teʼ kaʼanoʼ, kiliʼichkúuntaʼak a kʼaabaʼ». Ken k-tsʼáa ojéeltbil u kʼaabaʼ Dioseʼ táan k-kiliʼichkúuntik, beyoʼ k-maas natsʼikba tu yiknal (Mateo 6:9).

Dioseʼ maases ku chʼenxikintik le «máaxoʼob tsikik» u kʼaabaʼoʼ (Malaquías 3:16). Yoʼolal le máax beetik beyoʼ Jéeobaeʼ ku yaʼalik: «Bíin in tsʼáa tuʼux maʼ u yúuchul loob tiʼ [...], tumen letiʼeʼ u [...] kʼaj óolen. Le ken u tʼaneneʼ, yaan in núukiktiʼ: ¡teneʼ bíin yanaken tu yéetel! Yaan in tokik tiʼ yaayaj óolal» (Salmo 91:14, 15). Bey túunoʼ utiaʼal u yilkoʼon Jéeoba bey u amigoʼoneʼ kʼaʼabéet k-kʼaj óoltik yéetel k-tʼanik tu kʼaabaʼ.