Omar: Chéen in kʼáat in waʼaltecheʼ maʼ uts tin tʼaan in tsikbal yoʼolal religioniʼ.

Bruno: Maʼalob, mix baʼal tiʼ. In kʼaabaʼeʼ Bruno. ¿Kux túun teech?

Omar: Omar.

Bruno: Kiʼimak in wóol in jáan tsikbal ta wéetel, Omar.

Omar: Bey teen.

Bruno: ¿Desde wa ta paalil maʼ uts ta tʼaan le religionoʼ?

Omar: Maʼ. Tin paalileʼ kin bisaʼal iglesia. Baʼaleʼ ka ooken xook universidadeʼ xuʼul in biniʼ.

Bruno: Aan. ¿Baʼax túun ta xokaj teʼ universidadoʼ?

Omar: Historia yéetel Ciencias sociales. Desde úuch jatsʼuts in wilik le historiaoʼ. Uts tin tʼaan in wojéeltik baʼax u sen beetmaj wíinik way yóokʼol kaabeʼ.

Bruno: Omar, ¿a wojel wa le Bibliaoʼ ku tʼaan xan tiʼ historia?

Omar: U jaajileʼ maʼ. In wojel junpʼéel maʼalob libro, baʼaleʼ maʼ in wojel kaʼach wa ku tʼaan tiʼ historiaiʼ. Mix juntéen in xakʼalte.

Bruno: Bey uts ta tʼaan a xakʼalxookoʼ, wa a kʼáateʼ jeʼel in jáan eʼesiktech jujunpʼéel baʼaloʼob eʼesik jaaj baʼax ku yaʼalik le Biblia ken tʼaanak tiʼ historiaoʼ.

Omar: Maʼalob, pero beoraaʼ minaʼanten Biblia.

Bruno: Mix baʼal tiʼ. Yaanten junpʼéeliʼ. Yáaxeʼ koʼox xokik 1 Crónicas capítulo 29, versículo 26 yéetel 27. Ku yaʼalik: «David u paal Isaíeʼ, tu [gobernar]taj tuláakal Israel. [Reinar]naj cuarenta jaʼaboʼob, siete jaʼaboʼob [reinar]naj Hebrón yéetel trein[titrés] jaʼaboʼob Jerusalén».

Omar: Leloʼ ¿baʼax túun yaan yil yéetel historia?

Bruno: Bueno, eske úuchjeakileʼ le máaxoʼob maʼ tu creertikoʼob le Bibliaoʼ joʼopʼ u yaʼalikoʼobeʼ maʼ anchaj le rey Davidoʼ.

Omar: ¿Jach jaaj? ¿Baʼaxten túun?

Bruno: Tumen óoliʼ mix baʼal eʼesik kaʼach wa anchaj David, maases chéen le Biblia aʼalikoʼ. Baʼaleʼ tu jaʼabil 1993, le arqueologoʼoboʼ tu kaxtoʼob junpʼéel jaajay tuunich tuʼux tsʼíibtaʼan junpʼéel tʼaan u kʼáat u yaʼal «u yotoch David».

Omar: Aan... Maʼ in wojel kaʼachi.

Bruno: Uláakʼ máak maʼ tu creertaʼal kaʼach wa anchajeʼ Poncio Pilato, juntúul gobernador kuxlaj tu kʼiiniloʼob Jesús. Teʼ Lucas capítulo 3, versículo 1, ku chíikpajal u kʼaabaʼ jejeláas gobernadoroʼob; tiʼ ku chíikpajal xan u kʼaabaʼ Poncio Pilatoiʼ.

Omar: Jaaj, ku yaʼalikeʼ «le táan u gobernar Poncio Pilato tu luʼumil Judea[oʼ]», «Herodes ku gobernar tu múuchʼ kaajiloʼob Galilea».

Bruno: Beyoʼ. Baʼaleʼ jujuntúul máakoʼob kaʼanchajaʼan u xookoʼobeʼ maʼ tu creertikoʼob kaʼach wa  anchaj Poncio Pilato. Chéen baʼaleʼ walajki kex 50 jaʼaboʼobaʼ teʼ luʼumoʼob yaan Lakʼinoʼ kaxtaʼab junpʼéel tuunich tuʼux tsʼíibtaʼan u kʼaabaʼ.

Omar: Lelaʼ mix juntéen in wuʼuy kaʼachi.

Bruno: ¿Ka wilik? Tsʼoʼok a kanik túumben baʼaloʼob.

Omar: U jaajileʼ teneʼ kin tuklikeʼ le Bibliaoʼ junpʼéel maʼalob libro, baʼaleʼ maʼ tin wilik wa yaan baʼax tiʼ jeʼel u yáantkoʼon bejlaʼeʼ. Jaaj, ku tʼaan tiʼ historia, pero chéen leloʼ.

Bruno: Yaʼab máax ku tuukul jeʼex techoʼ. Baʼaleʼ teneʼ maʼ bey in tuukuliʼ. Tumen ilawile: ¿máasaʼ le baʼaxoʼob kʼaʼabéet tiʼ máak desde úuchoʼ láayliʼ kʼaʼabéet bejlaʼeʼ? Kʼaʼabéet k-oʼoch, k-nookʼ yéetel tuʼux k-kajtal. Kʼaʼabéet xan k-tsikbal yéetel k-láakʼtsiloʼob bey xan ka yanak kiʼimak óolal ichil k-otoch. ¿Maʼ wa beyiʼ?

Omar: Jaaj, jach beyoʼ.

Bruno: Jeʼeloʼ, le Bibliaoʼ jeʼel u yáantkoʼon utiaʼal ka yanaktoʼon le baʼaloʼob beyoʼ. Kex úuchbeneʼ tak bejlaʼa jeʼel u yáantkoʼoneʼ.

Omar: ¡¿Bix a waʼik?!

Bruno: Jach jaaj. Le Bibliaoʼ tu yáantaj le máakoʼob kuxlajoʼob úuchjeakiloʼ, baʼaleʼ láayliʼ jeʼel u yáantkoʼon bejlaʼeʼ.

Omar: ¿Bix túuniʼ?

Bruno: Bueno, teʼ Bibliaoʼ yaan tsolnuʼukoʼob jeʼel u yáantkoʼon utiaʼal k-chʼaʼtuklik baʼax yaan yil yéetel taakʼin, k-familia bey xan yéetel k-amigoʼob. Le Bibliaoʼ bey junpʼéel mapa ku yeʼesiktoʼon le bej maas maʼaloboʼ. Jeʼex wa ka tʼaanakoʼon tiʼ familiaeʼ, ¿máasaʼ bejlaʼeʼ maʼ chéen chʼaʼabil le meyaj ku beetik juntúul taatatsil wa íichamtsiloʼ?

Omar: Jaaj a tʼaan. Teneʼ tsʼoʼok junpʼéel jaʼab tsʼoʼokok in beel, baʼaleʼ maʼ chéen chʼaʼabil in tsʼáaikinba de acuerdo yéetel in wataniʼ.

Bruno: Jin creerkeʼ. Baʼaleʼ le Bibliaoʼ jeʼel u yáantkecheʼ. Ilawil baʼax ku yaʼalik Efesoiloʼob capítulo 5, versículo 22, 23 yéetel 28. ¿Jeʼel wa a xokikeʼ?

Omar: Jeʼeleʼ. Ku yaʼalik: «Le atantsiloʼoboʼ ka u tsʼáaubaʼob yáanal u páajtalil u yíichamoʼob jeʼex u tsʼáaikubaʼob yáanal u páajtalil Yuumtsileʼ, tumen le íichamtsiloʼ letiʼ u poolil u yatan, jeʼex Cristo u poolil le múuchʼuliloʼ; lelaʼ u wíinklil yéetel letiʼ salvartik». Le versículo 28, ku yaʼalik: «Le íichamtsiloʼoboʼ unaj u yaabiltikoʼob u yatanoʼob jeʼex u yaabiltikoʼob u wíinkliloʼobeʼ. Máax u yaabiltmaj u yataneʼ u yaabiltmuba xan».

Bruno: Diosboʼotik. ¿Máasaʼ wa ka u beet atantsil yéetel íichamtsil le baʼax ku yaʼalik le tekstoaʼ jeʼel u biskubaʼob maʼalobeʼ?

Omar: Jaaj a tʼaan. Baʼaleʼ maʼ chéen chʼaʼabil u beetaʼaliʼ.

Bruno: Leloʼ jaaj, tumen mix máak perfecto. Baʼaleʼ junpʼíit maas táanileʼ, le Bibliaoʼ ku yaʼalik unaj u yantaltoʼon junpʼéel utsil puksiʼikʼal mantatsʼ. * Leloʼ u kʼáat u yaʼaleʼ maʼ unaj k-pechikba chéen tiʼ baʼax k-tuklik, baʼaxeʼ unaj k-chʼaʼik en cuenta baʼax ku yaʼalik k-núup, kex yaan hora maʼ jach de acuerdoʼon yéeteliʼ. Tiʼ teen yéetel in wataneʼ jach maʼalob u bintoʼon ikil k-beetik beyoʼ.

Omar: Leloʼ jaaj xan.

Bruno: U j-jaajkunajoʼon Jéeobaeʼ yaantoʼon junpʼéel kúuchil ich Internet tuʼux ku páajtal u kaxtaʼal tsolnuʼukoʼob utiaʼal le máaxoʼob tsʼokaʼan u beeloʼoboʼ. Wa a kʼáateʼ chéen ichil kaʼapʼéel minutoeʼ jeʼel in jáan eʼesiktecheʼ.

Omar: Maʼalob. Wa maʼ tu xáantaleʼ minaʼan problema.

Bruno: Jeʼeloʼ, koʼox jáan ilik. U direccionil le kúuchiloʼ letiʼ lelaʼ: www.pr418.com/yua. Lelaʼ u káajbal. Ken ookkecheʼ letiʼe yáax ken a wilaʼ.

Omar: Jach jatsʼuts le fotosoʼ.

Bruno: Letiʼe bix k-kʼaʼaytik u tʼaan Dios jejeláas tuʼuxoʼob yóokʼol kaaboʼ. Le jaatsaʼ ku kʼaabaʼtik «Jóoʼsaʼaniloʼob». Ichileʼ yaan túumben revistaʼob, folletoʼob, libroʼob yéetel uláakʼ jóoʼsaʼaniloʼob tuʼux ku  tsoʼolol jejeláas baʼaloʼob. Jeʼex le folletoaʼ, ku kʼaabaʼtik U maʼalob péektsiloʼob Dios. Junpʼéel u xookileʼ ku kʼaabaʼtik «¿Bix jeʼel u yantal kiʼimak óolal ichil le familiaʼoboʼ?».

Omar: Leloʼ jach maʼalob. In waʼalikeʼ yaʼab máax u kʼáat u yojéelte.

Bruno: Le xookaʼ ku tsolik baʼaloʼob jeʼel u yáantkech utiaʼal u yantal kiʼimak óolal ichil a familiaeʼ. Ilawil baʼax ku yaʼalik yáanal le u kaʼapʼéel kʼáatchiʼoʼ. ¿Jeʼel wa a xokik le chan xóotʼaʼ?

Omar: Ku yaʼalik beyaʼ: «Cada juntúul tiʼ le tsʼokaʼan u beeloʼoboʼ unaj u yeʼesik yaabilaj yéetel tsiikil ichiloʼob. Tumen tu kaʼatúulal kʼebanoʼobeʼ, jach kʼaʼabéet u kankoʼob perdonar utiaʼal ka yanak kiʼimak óolal ichiloʼob». Jaaj, jach jaaj.

Bruno: Diosboʼotik úuchik a xokik. Wa ka wilkeʼ yaan jejeláas tekstoʼob teʼelaʼ. Tsʼáankʼabt lelaʼ.

Omar: Aan, chíikpaj Efesoiloʼob 5:33. Ku yaʼalik: «Baʼaleʼ cada juntúul tiʼ teʼexeʼ u yaabilt u yatan jeʼex u yaabiltmilubaeʼ; le atantsil xanoʼ unaj u yeʼesik nojoch tsiikil tiʼ u yíicham».

Bruno: ¿Ta wilaj? Ku yaʼalikeʼ cada juntúuleʼ unaj u beetik le baʼax ku páaʼtik le uláakʼ juntúuloʼ.

Omar: Mmm... maʼ tin jach naʼatik.

Bruno: Ilawile. ¿Máasaʼ tuláakal íichamtsil u kʼáat ka eʼesaʼak tsiikil tiʼ tumen u yatan? Tsʼoʼoleʼ ¿máasaʼ tuláakal atantsil u kʼáat xan ka yaabiltaʼak tumen u yíicham?

Omar: Jaaj, beyoʼ.

Bruno: Jeʼeloʼ. Wa le íichamtsil mantatsʼ ka u kaxt bix jeʼel u yeʼesik u yaabilaj tiʼ u yataneʼ maas chéen chʼaʼabil kun eʼesbil tsiikil tiʼ tumen u yatan.

Omar: Leloʼ jaaj.

Bruno: ¿Ka wilik? Kex tsʼoʼok óoliʼ 2,000 jaʼaboʼob tsʼíibtaʼak le tekstoaʼ láayliʼ jeʼel u meyajtoʼon bejlaʼeʼ. Wa le máaxoʼob tsʼokaʼan u beeloʼob ka u chʼaʼob en cuenta le tsolnuʼukoʼobaʼ jach jeʼel u bin utsil tiʼobeʼ.

Omar: U jaajileʼ maʼ tin tuklaj wa le Bibliaoʼ ku tʼaan tak tiʼ le baʼaloʼob beyaʼ.

Bruno: Yaaske ta tsʼáaj cuenta, Omar. ¿Bix a wilik wa tuláakʼ kʼiineʼ k-tsikbal yoʼolal le kʼáatchiʼ ku segueraʼ? «¿Unaj wa a pʼatik a núup tumen minaʼanteʼex kiʼimak óolal?» *

Omar: Maʼalob. Yaan in waʼalik tiʼ in watan ka k-múul xoke.