Síijen tu kaajil Székesfehérvár (Hungría), junpʼéel kaaj tsʼoʼok maas tiʼ mil jaʼaboʼob anchajak. Ku yaatal in wóol in waʼalik, baʼaleʼ láayliʼ pʼaatal tin tuukul le baʼaloʼob kʼaastak beetaʼab teʼ Kaʼapʼéel Nojoch Baʼateltáambaloʼ.

Líiʼsaʼaben tumen in abueloʼob, le oʼolal jach tin yaabiltoʼob. Maases kʼajaʼanten in abuela Elisabeth, máax tu kaʼansen in creert Dios. Desde ka tin cumplirtaj óoxpʼéel jaʼabeʼ, sáamsamal le nikaʼaj weenloʼ tu suukbesajten in waʼal le Padrenuestrooʼ. Baʼaleʼ tak ka tin cumplirtaj treinta jaʼab tin naʼataj baʼax u kʼáat u yaʼale.

Tin chichnileʼ in abueloʼob kanáanten, tumen in taata yéetel in maamaeʼ kʼiin yéetel áakʼab táan u meyajoʼob utiaʼal u manikoʼob junpʼéel maʼalob naj. Baʼaleʼ cada quince días utiaʼal sabadoeʼ tuláakal in familia ku muchʼkuba janal. Jach kin kʼaʼajsik le kʼiinoʼob jeʼeloʼ.

Tu jaʼabil 1958, in taata yéetel in maamaeʼ béeychaj u manikoʼob le naj úuch joʼopʼok u tsʼíiboltkoʼoboʼ. ¡Hasta ka páajchaj in múul kajtal tu yéeteloʼob! Baʼaleʼ maʼ xáanchaj ka saʼat le kiʼimak óolaloʼ, tumen ka máan seis meseseʼ kíim in taata. Letiʼe cáncer kíimsoʼ.

Jach yaachaj tin wóol. Kʼajaʼanten yaʼab u téenel tin waʼalaj: «Jajal Dios, tin kʼáat óoltaj tech ka a salvart in papá. Jach taak in wilik. ¿Baʼaxten maʼ ta wuʼuyeniʼ?». Kin tuklik xan: «¿Bin wa in papá teʼ kaʼanoʼ, wa chéen pʼáat minaʼan?». Yoʼolal túun leloʼ yaan horaeʼ in pʼeek kaʼach in wilik le mejen paalal yaan u taataʼoboʼ.

Ichil yaʼab jaʼaboʼobeʼ sáamsamal in bin kaʼach teʼ cementeriooʼ. Kin xoltal aktáan tiʼ u muknal in taata yéetel kin waʼalik: «Áanteniʼ, Dios, kʼaʼabéet in wojéeltik tuʼux yaan in papá». Kin kʼáatik xan tiʼ Dios ka u yáanten in wojéelt baʼaxten tu beetoʼon.

Ka tin cumplirtaj 13 jaʼabeʼ tin chʼaʼtuklaj in kanik alemán, tumen tiʼ le bukaʼaj libroʼob tsʼíibtaʼan ich alemanoʼ tin tuklaj jeʼel in kanik le baʼaxoʼob úuch taakak in wojéeltikoʼ.  Tu jaʼabil 1967, ooken xook tu noj kaajil Jena; teʼ kʼiinoʼob jeʼeloʼ le kaajoʼ tiaʼan kaʼach tu lakʼinil Alemaniaeʼ. Tin babalxoktaj u tsʼíib le filósofo alemanoʼoboʼ, maases le ku tsolkoʼob baʼax oʼolal kuxaʼan wíinik. Kex yaan baʼaloʼob jatsʼutstak tin wileʼ maʼ pʼáat kiʼimak in wóoliʼ. Seguernaj in kʼáatik tiʼ Dios ka u yáanten in kaxt u jaajil tiʼ le baʼaxoʼob taak in wojéeltikoʼ.

Tu jaʼabil 1970, suunajen Hungría. Teʼ tin kʼaj óoltaj Rose, le máax yéetel tsʼoʼok in beeloʼ. Maʼ úuch tsʼoʼokok k-beeleʼ anchaj k-púutsʼul Austria, tumen Hungríaeʼ tiaʼan kaʼach yáanal le comunismooʼ. K-tuukul kaʼacheʼ k-bin Sydney (Australia), tuʼux kajaʼan in tío.

Baʼaleʼ maʼ xáanchaj ka tin kaxtaj meyaj Austriaiʼ. Junpʼéel kʼiineʼ juntúul in wéet meyajeʼ tu yaʼalajten jeʼel u yáantken in kaxt u núukil in kʼáatchiʼob teʼ Bibliaoʼ, ka tu tsʼáajten kaʼapʼéel libroʼob. Chéen ichil junpʼéel kʼiin tin láaj xokoʼob, ka taakchaj in wojéeltik u maasil. Le oʼolal tin túuxtaj junpʼéel carta tiʼ u j-jaajkunajoʼob Jéeoba, le máaxoʼob beetmil le libroʼoboʼ, ka tin kʼáatajtiʼob uláakʼ libroʼob.

Jach u kʼiinil k-cumplirtik junpʼéel jaʼab tsʼoʼokok k-beeleʼ, xíimbaltaʼaboʼon tumen juntúul táankelem j-Jaajkunaj. Tu taasajten le libroʼob tin kʼáatoʼ ka tu yaʼalajten jeʼel u tsʼáaikten xook yéetel le Bibliaoʼ. Tu séebaʼanil tin kʼamaj le xookoʼ. Tumen jach taak in kaanbaleʼ joʼopʼ in xook kaʼatéen cada semana. ¡Tsʼoʼoleʼ kanpʼéel hora ku xáantal cada xook!

Kiʼimakchaj in wóol yoʼolal le jatsʼuts baʼaloʼob tin kanaj yéetel le j-Jaajkunajoʼoboʼ. Ka tu yeʼesoʼobten u kʼaabaʼ Jéeoba tin Biblia ich hungarooʼ hasta maʼ tin creertik. Ichil le 27 jaʼaboʼob táan in bin misaeʼ mix juntéen tin wuʼuyaj u kʼaabaʼ Diosiʼ. Séeb tin wilil jaaj baʼax ku yaʼalik le Bibliaoʼ. Junpʼéel tiʼ le baʼaxoʼob tin kanoʼ, eske le kimenoʼoboʼ minaʼan u tuukuloʼob, bey jach tʼuubul u weenloʼobeʼ (Eclesiastés 9:5, 10; Juan 11:11-15). Kʼuch xan in wojéelteʼ Dioseʼ yaan u tsʼáaiktoʼon junpʼéel túumben luʼum tuʼux «maʼ tun yantal kíimil» (Apocalipsis 21:3, 4). In wojel taʼaytak in wilik in taata, tumen maʼ tun xáantaleʼ yaan «u kaʼa kuxkíintaʼal le kimenoʼob[oʼ]» (Hechos 24:15).

Roseʼ káaj u xokik xan le Biblia tin wéeteloʼ. Úuchik k-tsʼáaik k-óoleʼ chéen ich kaʼapʼéel mes t-tsʼoʼoksaj le libro ikil u tsʼaʼabaltoʼon xookoʼ. K-bin kaʼach tiʼ tuláakal le muchʼtáambaloʼob ku beetik u j-jaajkunajoʼob Jéeobaoʼ. Jatsʼutschaj k-ilik bix u yeʼeskoʼob yaabilaj tu baatsiloʼob yéetel bix u múul biskubaʼob (Juan 13:34, 35).

Tu jaʼabil 1976, le autoridadoʼoboʼ tu chaʼajoʼob k-okol Australia, ka t-jáan kaxtaj u j-jaajkunajoʼob Jéeoba teʼeloʼ. Letiʼobeʼ jach jatsʼuts úuchik u kʼamkoʼonoʼob. Tu jaʼabil 1978, okjaʼanajoʼon bey u j-jaajkunajoʼob Jéeobaeʼ.

Tin kaxtaj u núukil le kʼáatchiʼob taak in wojéeltik desde tin paaliloʼ. Tin kaxtaj xan le maas maʼalob taatatsil yanoʼ: Jéeoba (Santiago 4:8). Tsʼoʼoleʼ tin kanaj yaan in wilik in taata ken kaʼa kuxlak teʼ Paraíso u yaʼalmaj Diosoʼ (Juan 5:28, 29).

Tu jaʼabil 1989, t-chʼaʼtuklaj k-suut Hungría utiaʼal k-tsikbaltik tiʼ k-láakʼtsiloʼob, k-amigoʼob yéetel tiʼ uláakʼ máakoʼob le baʼaxoʼob tsʼoʼok k-kanikoʼ. Tsʼoʼok k-áantik yaʼab máakoʼob kaanbal tiʼ le Bibliaoʼ. Maas tiʼ setenta u túulal tsʼoʼok u yokjaʼob. Ichiloʼobeʼ tiaʼan in maamaiʼ.

Máan 17 jaʼaboʼob táan in kʼáatik tiʼ Dios ka u yáanten in kaxt u núukil in kʼáatchiʼob. Beoraaʼ tsʼoʼok u máan 39 jaʼaboʼob in kaxt u núukiloʼob. Láayliʼ kin orar tiʼ Dioseʼ, baʼaleʼ bejlaʼeʼ kin waʼaliktiʼ: «Diosboʼotik, k-Yuum yanech teʼ kaʼanoʼ, tumen ta núukaj le oracionoʼob tin beetaj tin paaliloʼ».