Desde úucheʼ wíinikeʼ ku tsʼíiboltik maʼ u kʼojaʼantal, maʼ u chʼíijil mix u kíimil. Baʼaleʼ kex maʼ k-kʼáateʼ tuláakloʼon k-kíimil. Le tʼaanoʼob ku chíikpajal tu káajbal le xookaʼ tsʼoʼok tres mil años aʼalaʼak tumen Job. Le baʼax tu yaʼaloʼ jach jaaj.

Tuláakal máak jach ku tsʼíiboltik u kuxtal minaʼan u xuul. Le Bibliaoʼ ku yaʼalikeʼ Dios tsʼáa ichil k-puksiʼikʼal u tsʼíibolal k-kuxtal utiaʼal mantatsʼ bey xan u tsʼíibolal k-naʼatik le kuxtal minaʼan u xuuloʼ (Eclesiastés 3:11). Wa Dios u yaabiltmoʼoneʼ, ¿jeʼel wa u beetik k-tsʼíiboltik junpʼéel baʼal wa u yojel maʼ tu páajtal u yantaltoʼoneʼ? Maʼ. Le Bibliaoʼ ku yaʼalikeʼ le kíimiloʼ juntúul «enemigo kun xuʼulsbil» utiaʼal ka kuxlakoʼon minaʼan u xuul (1 Corintoiloʼob 15:26).

Le kíimiloʼ jach tu jaajil k-enemigo. Chéen wa maʼ tu yóol yanil máak jeʼel u tsʼíiboltikeʼ. Wa k-ilik yaan baʼax jeʼel u kíimskoʼoneʼ k-púutsʼul wa k-séeb taʼakikba. Ken kʼojaʼanchajkoʼoneʼ áalkabil k-bin yiknal doctor. K-beetik tuláakal le ku páajtal utiaʼal maʼ k-kíimil.

¿Jeʼel wa u kʼuchul u kʼiinil u xuʼulsaʼal le kíimiloʼ? Jeʼeleʼ. Jéeoba Dioseʼ maʼ tu beetoʼon utiaʼal ka kuxlakoʼon chéen junpʼíit jaʼaboʼobiʼ. Dioseʼ maʼ u tukultmaj kaʼach ka kíimkoʼoniʼ. U kʼáat kaʼach ka kuxlakoʼon mantatsʼ way Luʼumeʼ; tsʼoʼoleʼ tuláakal baʼax ku chʼaʼtuklikeʼ ku beetik (Isaías 55:11).

¿Bix túun kun xuʼulsbil le kíimiloʼ? Wíinikeʼ desde úuchjeakil táan u yilik u xuʼulsik, baʼaleʼ tak bejlaʼa maʼ páajchajkeʼ. Teʼ kʼiinoʼobaʼ le cientificoʼoboʼ láayliʼ táan u kaxtikoʼob tsʼaakoʼob yéetel vacunaʼob tsʼoʼok u yáantaj utiaʼal maʼ u sen yaʼabtal le kʼojaʼaniloʼoboʼ. Letiʼobeʼ táan u xakʼaltikoʼob u genes le baʼaloʼob kuxaʼanoʼoboʼ. Jeʼel u páajtal k-aʼalikeʼ maas yaʼab u kuxtal máak bejlaʼeʼ ke walajki cien añosaʼ. Kex beyoʼ jeʼex u yaʼalik le Bibliaoʼ «tuláakloʼob bíin suunakoʼob luʼum»; leloʼ maʼ kʼexpajkiʼ (Eclesiastés 3:20).

U maʼalobileʼ maʼ táan k-páaʼtik ka xuʼulsaʼak le kíimil tumen wíinikoʼ. Yéetel u yáantaj Jesucristoeʼ, Jéeobaeʼ yaan baʼax tsʼoʼok u beetik utiaʼal u salvartikoʼon.