«[Jéeoba Dioseʼ] tu tsʼáaj le máak tu kúuchil paakʼal ku kʼaabaʼintik Edén utiaʼal u meyajt yéetel utiaʼal u kanáante. Tu yaʼalajtiʼ beyaʼ: Ku páajtal a jaantik u yich tuláakal u cheʼiloʼob le kúuchilaʼ, chéen maʼ a jaantik u yich u cheʼil u kʼaj óolalil uts yéetel kʼaas. Tumen u kʼiinil bíin a jaanteʼ [yaan] a kíimil.» (Génesis 2:15-17.)

Dioseʼ tu tsʼáaj Adán, le yáax wíinikoʼ, tu jardinil Edén, tuʼux yaan yaʼabkach baʼalcheʼob yéetel jatsʼuts paakʼaloʼob. Adaneʼ jeʼel u páajtal u jaantik jeʼel máakalmáak u yich le cheʼoboʼ. Chéen baʼaleʼ Jéeobaeʼ tu yaʼalajtiʼ yaan junkúul cheʼ maʼ unaj u jaantik u yichiʼ, tumen wa ku jaantikeʼ yaan u kíimil.

¿Tu naʼataj wa Adán le baʼax aʼalaʼabtiʼoʼ? Letiʼeʼ u yojel baʼax le kíimiloʼ tumen u yilmaj u kíimil le baʼalcheʼoboʼ. Wa ka beetaʼak kaʼach Adán utiaʼal u kíimil jeʼex le baʼalcheʼoboʼ bejlaʼa minaʼan u biilal le baʼax aʼalaʼabtiʼoʼ. Baʼaleʼ Adaneʼ u yojleʼ wa ku yuʼubik u tʼaan Dios yéetel maʼ tu jaantik u yich le paakʼaloʼ mix bikʼin kun kíimil kaʼachi.

Yaan máax aʼalikeʼ u yich le cheʼ aʼalaʼab tiʼ Adán maʼ u jaantikoʼ letiʼe u yantal baʼax u yil yéetel u yatanoʼ, baʼaleʼ maʼ beyiʼ. Jéeobaeʼ tsʼokaʼaniliʼ u yaʼalik tiʼ Adán yéetel Eva: «Yaʼabchajak a paalaleʼex; chupeʼex le yóokʼol kaaboʼ, méekʼtáanteʼex xan» (Génesis 1:28). Jéeobaeʼ jach tiʼ junkúul cheʼ táan u tʼaan kaʼachi. Chéen tu yaʼalaj «u yich u cheʼil u kʼaj óolalil uts yéetel kʼaas», tumen le cheʼoʼ ku chíikbesik kaʼach u derechoil u yaʼalik baʼax uts yéetel baʼax kʼaas tiʼ wíinik. Wa maʼ u jaantik kaʼach Adán u yich le cheʼoʼ maʼ chéen yaan u yeʼesik táan u yuʼubik u tʼaan Diosiʼ; yaan xan u yeʼesik táan u tsʼáaik u diosboʼotikil yoʼolal le jatsʼuts baʼaloʼob tsʼaʼabtiʼoʼ.

Dioseʼ tu yaʼalaj tiʼ Adán: «Ikil ta jaantilak u yich le cheʼ tin waʼalaj maʼ a jaantikoʼ [...] yaan a náajaltik a woʼoch waaj yéetel u kʼíilkabil a táan joʼol, tak ken suunakech luʼumil, tu yoʼolal luʼum beetaʼabikecheʼ, luʼum xan bíin suunakech» (Génesis 3:17, 19).

 Adaneʼ tu jaantaj u yich le cheʼ aʼalaʼabtiʼ maʼ u jaantikoʼ. Dioseʼ jach kʼaas tu yilaj baʼax tu beetaj Adán, tumen líikʼ tu contra tu lugar u tsʼáaik u diosboʼotikil tiʼ. Le ka tu jaantaj u yich le cheʼoʼ Adaneʼ tu pʼataj juntséelil Dios, tu chʼaʼtuklaj tu juunal baʼax ken u beete. Leloʼ yaʼab baʼax kʼaas tu taasaj.

Jeʼex tu yaʼalil Jéeobaeʼ Adaneʼ kíimi. Dioseʼ yéetel luʼum «tu pataj wíinik», le oʼolal ka kíim Adaneʼ suunaj luʼumil. Le yáax wíinikoʼ maʼ seguernaj u kuxtal bey pixaneʼ, mix bin yaanal tuʼuxiʼ. Jeʼex junlóochʼ luʼum maʼ kuxaʼaneʼ bey pʼáatik Adán le ka kíimoʼ (Génesis 2:7; Eclesiastés 9:5, 10).

«Tu yoʼolal chéen juntúul máak ook le kʼeban way yóokʼol kaab[oʼ], yéetel tu yoʼolal le kʼeban ook le kíimiloʼ, bey xan úuchik u máan le kíimil tiʼ tuláakal máakoʼ tumen [láaj kʼebanchajoʼob].» (Romailoʼob 5:12.)

Ikil maʼ tu yuʼubilak tʼaan Adaneʼ —úuchik u kʼebantaleʼ— yaʼab baʼax kʼaas tu taasaj. Yáaxeʼ le kuxtal tu peʼertoʼ maʼ de 70 wa 80 años jeʼex le k-tiaʼaloʼ, baʼaxeʼ junpʼéel kuxtal minaʼan u xuul. Tsʼoʼoleʼ pʼáat maʼ perfectoiʼ yéetel bey síijik xan u paalaloʼ: láaj imperfectoʼob.

Adaneʼ tu máansajtoʼon le imperfeccionoʼ. Leloʼ u kʼáat u yaʼaleʼ kex maʼ k-kʼáateʼ séeb k-kʼebantal; k-wíinklil xaneʼ ku bin u xuʼupul tak ken kíimkoʼon. Pabloeʼ bey tu tsolilak le baʼax uchaʼantoʼonaʼ: «Teneʼ chéen juntúul wíiniken konaʼanen tiʼ le kʼebanoʼ. ¡Jach óotsilen! ¿Máax kun jáalkʼabtiken tiʼ le wíinklil táan u bisken tiʼ le kíimiloʼ?». Ka tu yaʼalaj xan: «¡Gracias tiʼ Dioseʼ, yoʼolal k-Yuumtsil Jesucristoeʼ letiʼeʼ yaan u jáalkʼabtiken!» (Romailoʼob 7:14, 24, 25).

«Le Taataoʼ tsʼoʼok u túuxtik u Paal utiaʼal u salvartik le yóokʼol kaaboʼ.» (1 Juan 4:14.)

Jéeoba Dioseʼ yaan baʼax tu beetaj utiaʼal u salvartikoʼon tiʼ le kʼeban yéetel tiʼ le kíimiloʼ. Tu túuxtaj u Hijo utiaʼal u síijil way Luʼum bey juntúul máak perfecto jeʼex Adaneʼ. Baʼaleʼ Jesuseʼ «maʼ kʼebanchajiʼ» (1 Pedro 2:22). Le oʼolal maʼ tun kíimil kaʼachi. Jeʼel u páajtal kaʼach u seguer u kuxtal minaʼan u xuuleʼ.

Baʼaleʼ Jéeobaeʼ tu chaʼaj u kíimsaʼal Jesús tumen u enemigoʼob. Ka máan óoxpʼéel kʼiineʼ tu kaʼa kuxkíintaj bey juntúul espíritu utiaʼal ka suunak teʼ kaʼanoʼ. Ka suunaj teʼ kaʼanoʼ tu bisaj tu táan Dios u tojol le kuxtal anchajtiʼ way Luʼumoʼ. Bey úuchik u manik le baʼax tu peʼertaj Adán yéetel u paalaloʼ. Jéeobaeʼ tu kʼamaj le boʼoloʼ, le oʼolal jeʼel u páajtal u kuxtal minaʼan u xuul tuláakal le máaxoʼob ku tsʼáaik u fejoʼob tiʼ Jesusoʼ (Romailoʼob 3:23, 24; 1 Juan 2:2).

Jeʼex k-ilkoʼ Jesuseʼ tu manaj yéetel u kuxtal le baʼax tu peʼertaj Adanoʼ. Kíim utiaʼal ka béeyak k-kuxtal minaʼan u xuul. Le Bibliaoʼ ku yaʼalikeʼ «tu yoʼolal u nojoch utsil Dioseʼ, [Jesuseʼ] tu yojéeltaj baʼax le kíimiloʼ utiaʼal u yutsil tuláakal máak» (Hebreoʼob 2:9).

¿Ka wilik wa bix u modos Jéeoba? Yoʼolal bix u justicia Dioseʼ chéen kʼeban wíinikoʼobeʼ maʼ tu páajtal u salvarkubaʼob tu juunaloʼob. Baʼaleʼ Jéeobaeʼ tumen u yaabiltmoʼon yéetel tumen tu chʼaʼajtoʼon óotsilileʼ tu chʼaʼtuklaj u yáantkoʼon kex koʼoj jóokʼiktiʼ: tu túuxtaj u Hijo kíimil t-oʼolal (Romailoʼob 5:6-8).

«Cristoeʼ tsʼoʼok u líiʼsaʼal ichil le kimenoʼoboʼ; Cristoeʼ letiʼe yáax máak kaʼa kuxkíintaʼab[oʼ] [...]. Jeʼex le kíimil kʼuch antal tu yoʼolal juntúul máakoʼ, le u kaʼa kuxkíintaʼal le kimenoʼoboʼ ku béeytal xan tu yoʼolal juntúul máak. Tumen jeʼex tu yoʼolal Adán tuláakal máak táan u kíimileʼ, tu yoʼolal Cristo xaneʼ tiʼ tuláakal máak kun tsʼaabil kuxtal.» (1 Corintoiloʼob 15:20-22.)

Mix máak jeʼel u yaʼalik wa maʼ anchaj Jesusiʼ, baʼaleʼ ¿bix jeʼel k-ojéeltik wa jach tu jaajil kaʼa kuxlajeʼ? Yáaxeʼ tumen chíikpaj tiʼ yaʼab máakoʼob jejeláas tuʼuxoʼob yéetel jejeláas súutukiloʼob. Juntéenjeakeʼ tu chíikbesuba tiʼ maanal 500 máakoʼob. Apóstol Pabloeʼ tu yaʼalaj tiʼ le corintoiloʼoboʼ láayliʼ kuxaʼan jujuntúul máakoʼob il Jesús le kaʼa kuxkíintaʼanoʼ; yéetel lelaʼ tu tsʼáaj naʼatbileʼ jeʼel u páajtal u tsikbaltikoʼob le baʼaxoʼob tu yiloʼob yéetel tu yuʼuboʼoboʼ (1 Corintoiloʼob 15:3-8).

Pabloeʼ tu yaʼalaj xaneʼ Cristoeʼ «letiʼe yáax máak kaʼa kuxkíintaʼab[oʼ]». Leloʼ ku yeʼesikeʼ yaan uláakʼ máakoʼob kun kaʼa kuxkíintbiloʼob. Tsʼoʼoleʼ tak Jesús tu yaʼaleʼ «tuláakal le máaxoʼob yanoʼob ichil le muknaloʼoboʼ» yaan u kʼuchul u kʼiinil u kaʼa kuxkíintaʼaloʼob (Juan 5:28, 29).

«Dioseʼ tumen jach u yaabiltmaj yóokʼol kaabeʼ tu tsʼáaj u juntúuliliʼ Paal, utiaʼal beyoʼ maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul.» (Juan 3:16.)

 Desde tu káajbaleʼ le Bibliaoʼ ku yaʼalik bix chíikpajik le kíimiloʼ yéetel bix úuchik u saʼatal le Paraísooʼ. Tu tsʼoʼokbaleʼ ku yaʼalik bix kun xuʼulsbil le kíimil tumen Diosoʼ yéetel bix ken u sutil paraísoil le Luʼumaʼ. Teʼeloʼ yaan u páajtal u kuxtal máak minaʼan u xuul ich kiʼimak óolal. Apocalipsis 21:4, ku yaʼalikeʼ «maʼ tun yantal kíimil». Teʼ versículo 5, ku yaʼalik xan: «Le tʼaanoʼobaʼ jaajtak yéetel jach yaan u béeytaloʼob». Jéeobaeʼ ku páajtal u beetik tuláakal baʼax ku yaʼalik.

Techeʼ ¿ka creertik wa «le tʼaanoʼobaʼ jaajtak yéetel jach yaan u béeytaloʼob»? Wa beyoʼ kan u maasil yoʼolal Jesucristo, yéetel tsʼáa a fe tiʼ letiʼ. Beyoʼ yaan a lúubul utsil tiʼ Jéeoba. Tsʼoʼoleʼ Jéeobaeʼ maʼ chéen yaan u bendecirtikech bejlaʼeʼ, baʼaxeʼ yaan xan u tsʼáaiktech u páajtalil a kuxtal minaʼan u xuul tiʼ junpʼéel paraíso way Luʼumeʼ; teʼeloʼ «maʼ tun yantal kíimil, mix okʼol, mix yaj óolal, mix kʼiʼinamil».