Jairoeʼ síij yéetel junpʼéel parálisis cerebral ku kʼaabaʼtik cuadriplejía espástica. * Le oʼolal maʼ tu páajtal u controlartik u wíinklil. Ku loʼolotʼpajal u yookoʼob yéetel u kʼaboʼob, tumen u cerebroeʼ maʼ tu meyaj maʼalob. Yaan horaeʼ ku téek péek u wíinklil, yéetel ku loobiltkuba. Jeʼel tak u loobiltik le máaxoʼob yanoʼob tu tséeloʼ. ¡Óotsil! Yaan kʼiineʼ kʼaʼabéet u kʼaʼaxal u yookoʼob yéetel u kʼaboʼob teʼ silla de ruedasoʼ.

Jach yaj líikʼik Jairo. Desde tres meses síijikeʼ ku tsʼáaik ataque tiʼ. Leloʼ ku beetik u pʼáatal bey kimeneʼ. Yaʼab u téeneleʼ in maamaeʼ tu séebaʼanil ku bisik hospital, tumen ku tuklik tsʼoʼok u kíimil.

Yoʼolal le ataque ku tsʼáaiktiʼoʼ, u baakel Jairoeʼ káaj u loʼolochpajal. Le ka tu cumplirtaj 16 añoseʼ operartaʼab u cadera yéetel u baakel u pierna, tumen pitkʼaji. Jach kʼajaʼanten bix u yawat de áakʼab yoʼolal u yajil.

Tumen maʼ tu páajtal u beetik mix baʼaleʼ, in sukuʼuneʼ kʼaʼabéet u tséentaʼal, u yáantaʼal u jeluba yéetel u chikúuntaʼal wenel. Maases in papá yéetel in maama atendertik. Ku yaʼalikoʼobtiʼeʼ utiaʼal ka kuxlakeʼ maʼ chéen kʼaʼabéet u yáantaʼal tumen uláakʼ máakoʼobiʼ, kʼaʼabéet xan u yáantaʼal tumen Dios.

In taataʼobeʼ u j-jaajkunajoʼob Jéeoba yéetel desde tu chichnil Jairo suuk u xokikoʼob u yuʼub le tsikbaloʼob yaan teʼ Bibliaoʼ. U yojloʼobeʼ maas kiʼimak u yóol máak wa ku yilik Dios bey u amigoeʼ. U yojloʼob xaneʼ yaan u kʼuchul u kʼiinil u yutstal kex yaj le kʼojaʼanil yaantiʼoʼ. Baʼaleʼ maʼ u yojloʼob kaʼach wa ku naʼatik Jairo baʼax ku kaʼansik le Bibliaoʼ.

Tu chan paalil Jairoeʼ, in papaeʼ tu yaʼalajtiʼ: «Jairo, wa jach tu jaajil a yaabiltmeneʼ aʼalten wa baʼax». Teʼ súutukoʼ káaj u yokʼol Jairo tumen taakchaj u yaʼalik baʼax ku yuʼubik. Baʼaleʼ kex taak u tʼaaneʼ maʼ tu naʼataʼal baʼax ku yaʼalik. In papaeʼ jach yaachaj u yóol úuchik u beetik u yokʼol. Le baʼax úuchaʼ tu yeʼeseʼ Jairoeʼ ku naʼatik baʼax ku yaʼalaʼaltiʼ.

 Ka máan kʼiineʼ in taataʼobeʼ tu tsʼáajoʼob cuentaeʼ Jairoeʼ séeb u péeksik u yichoʼob. Bey taak «u yaʼalik» yéetel u yichoʼob baʼax ku tuklik yéetel baʼax ku yuʼubikeʼ. Wa maʼ tu naʼataʼal baʼax ku yaʼalikeʼ ku chiʼichnaktal. Pero ken naʼataʼak baʼax ku yaʼalik yéetel ken tsʼaʼabaktiʼ baʼax u kʼáateʼ, ku cheʼej. Bey u tsʼáaik u diosboʼotikiloʼ.

Juntúul koʼolel ku tsʼáaik terapiaeʼ, tu yaʼalajtoʼoneʼ utiaʼal k-naʼatikba yéetel Jairoeʼ maʼalob ka k-aʼaltiʼ ka u pakt k-kʼab, beyoʼ le ken k-kʼáat wa baʼax tiʼeʼ, wa u kʼáateʼ ku paktik kx-noʼoj kʼab, wa maʼ u kʼáateʼ ku paktik kx-tsʼíik kʼab.

U j-jaajkunajoʼob Jéeobaeʼ óoxpʼéel asamblea ku beetkoʼob cada jaʼab, yéetel yaʼab máak ku biniʼ. Jairoeʼ jach ku kiʼimaktal u yóol ken máansaʼak u tsoltʼaanil le okjaʼoʼ. Junpʼéel kʼiin le tsʼoʼok u cumplirtik 16 añoseʼ, in papaeʼ tu kʼáatajtiʼ: «Jairo, ¿a kʼáat xan okjaʼ?». Letiʼeʼ tu jáan paktaj u x-noʼoj kʼab in papá. Ka túun kʼáataʼabtiʼ: «¿Tsʼoʼok wa a waʼalik tiʼ Dios taak a kʼubik a kuxtal utiaʼal a meyajte?». Tu kaʼatéen tu jáan paktaj u x-noʼoj kʼab in papá. Leloʼ tu yeʼeseʼ tsʼokaʼaniliʼ u yaʼalik tiʼ Dios taak u meyajtikeʼ.

Yaʼab u téenel tsikbaltaʼab tiʼ Jairo le baʼaxoʼob ku yaʼalik le Bibliaoʼ, le oʼolal béeychaj u yilaʼaleʼ ku naʼatik baʼaxten kʼaʼabéet u yokjaʼ máak. Tiʼ junpʼéel asamblea tu jaʼabil 2004, beetaʼabtiʼ le kʼáatchiʼaʼ: «¿Tsʼoʼok wa a waʼalik tiʼ Dios ich oración a kʼáat a kʼub a kuxtal tiʼ letiʼ?». Utiaʼal u yaʼalik tsʼoʼokeʼ paakatnak kaʼan, tumen bey aʼalaʼabiktiʼ ka u beetoʼ. Diecisiete jaʼab yaan tiʼ in sukuʼun ka okjaʼanaji, bey tu beetuba u j-jaajkunaj Jéeobaoʼ.

Tu jaʼabil 2011, tiʼ Jairoeʼ káaj u meyaj junpʼéel máquina utiaʼal u yaʼalik baʼax u kʼáat: junpʼéel computadora ku controlartik yéetel u yich. Utiaʼal u yaʼalik baʼax u kʼáateʼ ku paktik junpʼéel tiʼ le dibujoʼob yaan teʼ pantallaoʼ. Ken u chʼik u paakat tiʼ le dibujoʼoboʼ bey ka u péeks u chʼoʼil le computadoraoʼ (mouse). Tsʼaʼab yaʼab dibujoʼob tu computadora utiaʼal u yaʼalik baʼax u kʼáat. Ken u mutsʼ u yich tu tojil junpʼéel tiʼ le dibujoʼoboʼ, le computadoraoʼ ku xokik kʼaʼam le baʼax tsʼíibtaʼan tu archivoil le dibujooʼ.

Jairoeʼ joʼopʼ u maas naʼatik le Bibliaoʼ, yéetel taakchaj u tsikbaltik tiʼ uláakʼ máakoʼob baʼax  ku kanik. Ken muchʼlakoʼon k-xok le Biblia ichil le semanaoʼ, Jairoeʼ maʼ tu xuʼulul u paktiken yéetel maʼ tu xuʼulul u paktik u computadora. Beyoʼ táan u yaʼalikten ka in tsʼíibt baʼax ken u yaʼal ken xiʼikoʼon muchʼtáambal. ¿Bix u beetik?

Le tiaʼan teʼ muchʼtáambaloʼ Jairoeʼ ku yéeyik junpʼéel tiʼ le dibujoʼob tuʼux yaan le baʼax u kʼáat u tsoloʼ. Tsʼoʼoleʼ le computadoraoʼ ku xokik kʼaʼam le baʼax tsʼíibtaʼanoʼ. Ken tsʼoʼokok k-uʼuyikeʼ Jairoeʼ ku cheʼej jach kiʼimak u yóol tumen u yojel tsʼoʼok u líiʼsik k-óol. Alex, juntúul u amigo Jairoeʼ, ku yaʼalik: «Jach ku péek in wóol ken in wuʼuy u tsolik baʼax ku naʼatik tiʼ le Bibliaoʼ».

Jairoeʼ yéetel u yichoʼobeʼ ku yaʼalik xan tiʼ uláakʼ máakoʼob baʼax ku kanik teʼ Bibliaoʼ. Utiaʼal u beetkeʼ, ku mutsʼik u yich tu tojil junpʼéel u dibujoil le Paraísooʼ yéetel ku yuʼubaʼal junpʼéel tʼaan ku yaʼalik «Le Bibliaoʼ ku yaʼalikeʼ yaan u kʼuchul u kʼiinil u suʼutul Paraísoil le Luʼumaʼ. Maʼ tun yantal kʼojaʼanil mix kíimil» (Apocalipsis 21:4). Wa le máax yéetel ku tsikbal u kʼáat u yojéelt u maasiloʼ ku kaʼa mutsʼik u yicheʼ yéetel ku yuʼubaʼal junpʼéel tʼaan ku yaʼalik: «¿A kʼáat wa kaanbal tiʼ le Biblia tin wéeteloʼ? Kiʼimakchaj k-óol ka t-ojéelteʼ k-abueloeʼ káaj u xokik le Bibliaoʼ. Yéetel u yáantaj uláakʼ sukuʼuneʼ, ¡Jairo tsolik tiʼ k-abuelo le baʼax ku yaʼalik le Bibliaoʼ! Tu mesil agosto tiʼ 2014 tiʼ junpʼéel asamblea beetaʼab Madrideʼ, okjaʼanaj k-abuelo. ¡Lelaʼ tu beetaj u jach kiʼimaktal k-óol!

Le fe yaan tiʼ Jairooʼ ku yilaʼal xan tumen u maestroʼob. Rosario, juntúul tiʼ le máaxoʼob tsʼáaik terapia tiʼoʼ, tu yaʼalaj: «Wa ku kʼuchul u kʼiinil u yantal in religioneʼ, yaan in beetkinba j-jaajkunaj tiʼ Jéeoba. Yoʼolal u fejeʼ Jairoeʼ taak u kuxtal kex yaj le kʼojaʼanil yaantiʼoʼ».

Tu yichoʼob Jairoeʼ ku yilaʼal bukaʼaj kiʼimakil u yóol ken u yuʼub in xokik le tekstoaʼ: «Le móochoʼoboʼ bíin síitʼnakoʼob bey kéejoʼobeʼ[;] le tootoʼob xanoʼ, bíin awatnakoʼob» (Isaías 35:6). Kex yaan kʼiin ku chan lúubul u yóoleʼ maases kiʼimak u yóol, tumen u kʼubmuba u meyajt Dios yéetel jach yaabiltaʼan tumen u amigoʼob. U fe yéetel u chúukaʼan óolaleʼ ku yeʼesikeʼ kex jeʼel baʼalak ka úuchuktoʼoneʼ wa táan k-meyajtik Jéeobaeʼ jeʼel u yantal u biilal k-kuxtaleʼ.