Techeʼ ¿tsʼoʼok wa a tuklik le baʼaloʼobaʼ? Tiʼ tuláakal yóokʼol kaabeʼ yaʼab máax taak u yojéeltik u núukil le kʼáatchiʼobaʼ. Baʼaleʼ ¿jeʼel wa u páajtal u yojéeltaʼaleʼ?

U millonesil máakoʼobeʼ ku tuklikoʼob jeʼel u páajtaleʼ. ¿Baʼaxten? Tumen tsʼoʼok u kankoʼob teʼ Biblia le baʼaxoʼob taak u yojéeltikoʼoboʼ. ¿A kʼáat wa a wojéelt baʼax ku yaʼalik le Bibliaoʼ? Wa beyoʼ, u j-jaajkunajoʼob Jéeobaeʼ jeʼel u kaʼanskoʼobtecheʼ. *

Yaan máakeʼ ken aʼalaʼaktiʼ ka u xok le Bibliaoʼ, ku yaʼalik: «Minaʼanten tiempo», «Chich in pool» wa «Maʼ in kʼáat compromisoiʼ». Baʼaleʼ uláakʼoʼobeʼ kiʼimak u yóoloʼob ikil u xokikoʼob le Bibliaoʼ. Koʼox ilik baʼax ku yaʼalik jujuntúuliʼ:

• «Teneʼ binen Iglesia Católica, yiknal le protestanteʼoboʼ, tiʼ templo sij, tiʼ monasterio budista, yéetel tin xokaj Teología teʼ universidadoʼ. Kex beyoʼ mix tuʼux tin kaxtaj u núukil in kʼáatchiʼob. Junpʼéel kʼiineʼ kʼuch juntúul u j-jaajkunaj Jéeoba tu jool in wotoch. Ka tin wilaj tu núukaj yéetel le Biblia tuláakal le kʼáatchiʼob tin beetajtiʼoʼ, káaj in xook tu yéetel.» (Gill, Inglaterra.)

• «Yaʼab baʼax taak in wojéeltik yoʼolal le kuxtaloʼ. Le bix tu tsolajten in pastoroʼ maʼ tu convencerteniʼ. Baʼaleʼ juntúul u j-jaajkunaj Jéeobaeʼ chéen yéetel le Bibliaoʼ tu tsolajten le baʼax taak in wojéeltikoʼ. Ka tu kʼáatajten wa jeʼel in xook tu yéeteleʼ, tin waʼalajtiʼ jeʼeleʼ.» (Koffi, Benín.)

• «In kʼáat in wojéelt kaʼach baʼax ku yúuchul tiʼ le kimenoʼoboʼ. Kin tuklik kaʼacheʼ jeʼel u beetkoʼob loobeʼ, ka túun taakchaj in wojéeltik baʼax ku yaʼalik le Bibliaoʼ. Le oʼolal káaj in xook yéetel juntúul in amigo j-Jaajkunaj.» (José, Brasil.)

• «Káaj in xokik le Bibliaoʼ, baʼaleʼ maʼ tin naʼatik kaʼach mix baʼaliʼ. Juntéenjeakeʼ taal le j-Jaajkunajoʼob tin wotochoʼ ka tu tsoloʼobten jejeláas profecíaʼob. Bey úuchik in tsʼíiboltik in kanik u maasiloʼ.» (Dennize, México.)

• «Taak in wojéeltik kaʼach wa u yaabiltmen Dios. Ka tin chʼaʼtuklaj in orar tiʼ u Diosil le Bibliaoʼ. Ka sáaschajeʼ kʼuch le j-Jaajkunajoʼob tin wotochoʼ. Bey úuchik u káajal in xokik le Bibliaoʼ.» (Anju, Nepal.)

Le baʼax tu yaʼalaj le máakoʼobaʼ ku yeʼesik jaaj baʼax tu yaʼalaj Jesús: «Kiʼimak u yóol le máaxoʼob wiʼijoʼob tiʼ tuláakal le baʼaxoʼob ku tsʼáaik Diosoʼ» (Mateo 5:3). Tuláakal máak kʼaʼabéet u natsʼkuba yiknal Dios. Letiʼeʼ ku yáantkoʼon yéetel le Bibliaoʼ.

Baʼaleʼ ¿bix k-kaʼansik máak yéetel le Bibliaoʼ? ¿Bix jeʼel u yáantkech wa ka a xokeʼ? Koʼox ilik.