Linda: Lucía, jach kiʼimakchaj in wóol ka tin wilech teʼ Kʼaʼajsajil úuchik u kíimil Cristo teʼ semana máanikoʼ. * ¿Bix ta wilil?

Lucía: Ay, jatsʼuts tin wilil, pero yaan baʼaxoʼob maʼ tin naʼatiʼ. In wojel ku kʼaʼajsaʼal u síijil Jesús tiʼ Navidad yéetel u kaʼa kuxtal teʼ Semana Santaoʼ, baʼaleʼ mix juntéen in wuʼuy u kʼaʼajsaʼal le úuchik u kíimiloʼ.

Linda: Jaaj, le kʼiinbesajoʼob ta yáax aʼaloʼ letiʼe maas kʼaj óolaʼanoʼoboʼ. Baʼaleʼ u j-jaajkunajoʼon Jéeobaeʼ jach kʼaʼanaʼan k-ilik k-kʼaʼajsik cada año le úuchik u kíimil Jesusoʼ. ¿Jeʼel wa u páajtal in jáan tsoliktech baʼaxteneʼ?

Lucía: Jeʼeleʼ.

Linda: Bueno, toʼon u j-jaajkunajoʼon Jéeobaeʼ k-kʼaʼajsik ka kíim Jesús, maases tumen letiʼ aʼal ka k-beete. Koʼox ilik baʼax úuch le áakʼab antes u kíimiloʼ. ¿Kʼajaʼan wa tech múul jaan yéetel u disipuloʼob?

Lucía: Áan, jaaj. Letiʼe Última Cenaoʼ.

Linda: Jaaj. Kʼaj óolaʼan xan bey u Ookʼin Janal Yuumtsileʼ. Mientras táan u cenaroʼobeʼ Jesuseʼ yaan baʼax tu yaʼalaj tiʼ u disipuloʼob ka u beetoʼob. Tiʼ ku yaʼalik teʼ Lucas 22:19. ¿Jeʼel wa a jáan xokikeʼ?

Lucía: Maʼalob, ku yaʼalik: «Tu chʼaʼaj xan junpʼéel waajeʼ, tu tsʼáaj gracias tiʼ Dioseʼ ka tu xetʼaj, ka tu tsʼáajtiʼob táan u yaʼalik: ‹Lelaʼ u kʼáat u yaʼal in wíinklil kun kʼubbil ta woʼolaleʼex. Maʼ u xuʼulul a beetkeʼex lelaʼ utiaʼal a kʼaʼajsikeneʼex›».

Linda: Diosboʼotik. Ilawil baʼax tu yaʼalaj Jesús tu tsʼoʼokbaloʼ: «Maʼ u xuʼulul a beetkeʼex lelaʼ utiaʼal a kʼaʼajsikeneʼex». Pero antes u yaʼalik lelaʼ, tu yaʼalaj jach baʼax unaj u kʼaʼajsikoʼob. Tu yaʼalajtiʼobeʼ yaan u kʼubik u kuxtal tu yoʼolal u disipuloʼob. Teʼ Mateo 20:28, óoliʼ bey tu yaʼalil xanoʼ. Ilawile: «[Cristoeʼ] maʼ taal utiaʼal ka meyajtaʼakiʼ, baʼaxeʼ utiaʼal ka u meyajt u maasil bey xan utiaʼal u tsʼáaik u kuxtal bey junpʼéel boʼol utiaʼal u salvartaʼal yaʼab máakoʼobeʼ». U j-jaajkunajoʼon Jéeobaeʼ k-muchʼikba cada año utiaʼal k-kʼaʼajsik le ka tu kʼubaj u kuxtal Jesús t-oʼolaloʼ. Tumen úuchik u kíimileʼ wa k-uʼuyik tʼaaneʼ jeʼel k-salvartikbaeʼ.

Lucía: Teneʼ in wuʼuymaj u yaʼalaʼal kíim Jesús utiaʼal u salvartikoʼon, baʼaleʼ maʼ tin naʼatik bix u salvartikoʼon tiʼ le kíimiloʼ.

Linda: Jaaj, Lucía, u jaajileʼ maʼ fácil u naʼataʼal leloʼ. Baʼaleʼ le boʼol tu tsʼáaj Jesús utiaʼal u salvartikoʼonoʼ  junpʼéel tiʼ le kaʼansajoʼob maas jatsʼutstak yaan teʼ Bibliaoʼ. ¿Yaan wa tech tiempo utiaʼal u seguer k-tsikbal?

Lucía: Jaaj, yaan.

Linda: Jeʼeloʼ, jach táaj maʼalob. Maʼ úucheʼ tin kaʼa xokaj le tema jeʼelaʼ; yaan in wilik in tsolik le bix jeʼel a séeb naʼatikoʼ.

Lucía: Ajá.

Linda: Yáaxeʼ koʼox naʼatik baʼax úuch tu jardinil Edén le ka kʼebanchaj Adán yéetel Evaoʼ. Koʼox kaxtik Romailoʼob 6:23. ¿Jeʼel wa a much xokikeʼ?

Lucía: Jeʼeleʼ. Ku yaʼalik: «Le boʼol ku tsʼáaik le kʼebanoʼ letiʼe kíimiloʼ, baʼaleʼ le siibal ku tsʼáaik Diosoʼ, kuxtal minaʼan u xuul tu yoʼolal k-Yuumtsil Cristo Jesús».

Linda: Diosboʼotik. Wa ta wileʼ tu káajbal le tekstoaʼ ku yaʼalikeʼ «le boʼol ku tsʼáaik le kʼebanoʼ letiʼe kíimiloʼ». Leloʼ junpʼéel ley tu tsʼáaj Dios desde ka anchaj wíinik way yóokʼol kaabeʼ: u boʼolil wa u castigoil le kʼebanoʼ letiʼe kíimiloʼ. Tu káajbaleʼ mix máak kʼebanchajaʼan. Dioseʼ tu beetaj Adán yéetel Eva x-maʼ kʼebanil, perfectoʼob. U paalal xaneʼ yaan kaʼach u síijloʼob x-maʼ kʼebanil. Mix máak kun kíimil kaʼachi. Adán, Eva yéetel u paalaloʼobeʼ jeʼel kaʼach u kuxtaloʼob minaʼan u xuul ich kiʼimak óolaleʼ. Baʼaleʼ jeʼex a wojliloʼ maʼ bey úuchikoʼ. ¿Kʼaʼajaʼantech wa baʼaxten?

Lucía: Jaaj. Adán yéetel Evaeʼ tu jaantoʼob u yich le cheʼ aʼalaʼabtiʼob maʼ u jaantkoʼoboʼ.

Linda: Jach beyoʼ. Bey úuchik u kʼebantaloʼoboʼ; Adán yéetel Evaeʼ maʼ tu yóotaj u yuʼuboʼob tʼaaniʼ. Úuchik u kʼebantaloʼobeʼ pʼáatoʼob imperfectoʼob. Le baʼax tu beetoʼobaʼ jach yaʼab kʼaas tu taasaj tak tiʼ u paalaloʼob.

Lucía: ¿Baʼaxten tak tiʼ toʼon? ¡Si toʼoneʼ mix baʼal yaan k-iliʼ!

Linda: Koʼox comparartik beyaʼ. ¿Tsʼoʼok wa a horneartik waaj tiʼ junpʼéel molde?

Lucía: Jaaj, tsʼoʼoki. Yaanten junpʼéeliʼ.

Linda: Jeʼeloʼ. Koʼox aʼalikeʼ ka manik junpʼéel túumben molde, baʼaleʼ ku lúubultecheʼ ku yúuchʼul. ¿Bix ta tʼaan kun jóokʼol le waaj ken a beet yéeteloʼ? ¿Máasaʼ yuuchʼul xan kun jóokʼol?

Lucía: Jaaj, bey kun jóokʼoloʼ.

Linda: Jeʼeloʼ, le ka kʼebanchaj Adán yéetel Evaoʼ pʼáatoʼob imperfectoʼob, bey jeʼex le molde yuʼuyuchʼpajoʼ. Le ka anchaj túun u paalaloʼ jeʼel u páajtal u yaʼalaʼal xaneʼ «yuʼuyuchʼpajaʼanoʼob», tumen láaj kʼebanoʼob yéetel imperfectoʼob. Ken aʼalaʼak «kʼeban» teʼ Bibliaoʼ maʼ chéen u kʼáat u yaʼal u beetaʼal baʼal kʼaasiʼ; u kʼáat u yaʼal xaneʼ yaan baʼax túulchʼintkoʼon k-kʼebantal jeʼex le yáax wíinikoʼ. Le oʼolaleʼ kex maʼ anchaj k-culpa tiʼ baʼax tu beetaj Adán yéetel Evaeʼ desde ken síijkoʼoneʼ yaan baʼax túulchʼintkoʼon k-kʼebantal. Tsʼoʼoleʼ jeʼex u yaʼalik Romailoʼob 6:23, «le boʼol ku tsʼáaik le kʼebanoʼ letiʼe kíimiloʼ».

Lucía: Leloʼ maʼ justoiʼ. ¿Baʼaxten tak toʼon k-muʼyaj yoʼolal le baʼax tu beetoʼoboʼ?

Linda: Jaaj a tʼaan, pero koʼox tuukul tiʼ tuláakal baʼax táakaʼaniʼ. Según u justicia Dioseʼ, Adán yéetel Evaeʼ unaj u kíimloʼob yoʼolal baʼax tu beetoʼob. Baʼaleʼ Dioseʼ tuukulnaj tiʼ u paalal Adán. Tu jáan tuklaj bix jeʼel u yáantkoʼobeʼ. Le oʼolal anchaj u kʼubik u kuxtal Cristo. Ilawil tu kaʼatéen Romailoʼob 6:23. Ken tsʼoʼokok u yaʼalik u boʼolil «le kʼeban letiʼe kíimiloʼ», ku yaʼalik xan: «Le siibal ku tsʼáaik Diosoʼ, kuxtal minaʼan u xuul tu yoʼolal k-Yuumtsil Cristo Jesús». Jeʼex a wilkoʼ le úuchik u kíimil Jesusoʼ ku tsʼáaik tuʼux k-salvartaʼal tiʼ le kʼeban yéetel tiʼ le kíimiloʼ. *

Linda: Yaan uláakʼ baʼax in kʼáat in tsoltech yoʼolal le tekstoaʼ.

Lucía: ¿Baʼax túuniʼ?

Linda: Ilawil bix u yaʼalik: «Le siibal ku tsʼáaik Diosoʼ, kuxtal minaʼan u xuul tu yoʼolal k-Yuumtsil Cristo Jesús». Wa Jesús muʼyajnaj yéetel kíim t-oʼolaloʼ, ¿baʼaxten maʼ tu yaʼalik «le siibal ku tsʼáaik Jesusoʼ»? *

Lucía: Mmm... Mix in wojliʼ.

Linda: Eske le ka pʼáat maʼ tu yuʼuboʼob u tʼaan Dioseʼ, Adán yéetel Evaeʼ kʼebanchajoʼob; tu tsʼáajubaʼob tu contra. Leloʼ tu beetaj u yaatal u yóol Jéeoba. Baʼaleʼ Jéeobaeʼ tu séebaʼanil tu yilaj bix jeʼel u salvartik le wíinikoʼoboʼ: tu chʼaʼtuklaj u túuxtik juntúul ángel way Luʼum utiaʼal u kuxtal yéetel u kíimil bey juntúul wíinik perfectoeʼ. * Jeʼex a wilkoʼ, le boʼol tsʼaʼab t-oʼolaloʼ junpʼéel u siibal Jéeoba. Yaan uláakʼ baʼax oʼolal k-aʼalikeʼ le boʼol tsʼaʼaboʼ u siibal Dios. ¿Tsʼoʼok wa a máansik ta tuukul bix tu yuʼubiluba Dios le ka kíimsaʼab Jesús, u Hijooʼ?

Lucía: U jaajileʼ mix juntéen.

Linda: Kin wilkeʼ yaan báaxaloʼob wayeʼ. ¿Yaan wa a paalal?

Lucía: Yaan. Kaʼatúul: juntúul chan xiʼipal yéetel juntúul chan x-chʼúupal.

Linda: Bey maamatsilechoʼ, jach in waʼakeʼ jeʼel a naʼatik bix tu yuʼubiluba Jéeoba le ka tu yilaj u kíimsaʼal u Hijo way Luʼumeʼ. Máans ta tuukul le ka bisaʼab Jesús tumen le soldadoʼoboʼ, le ka burlartaʼab yéetel le ka loʼoloxaʼaboʼ. Chéen tukult bix yaachajik u yóol Dios le ka tu yilaj u sen muʼyaj u Hijo le chʼuykíintaʼan teʼ cheʼ tuʼux kíimsaʼaboʼ.

Lucía: ¡Ay ombe, jach yaachaj u yóol waleʼ! Maʼ in tukult kaʼach leloʼ.

Linda: Maʼ k-ojel jach bix tu yuʼubiluba Diosiʼ. Baʼaleʼ le Bibliaoʼ ku yaʼalik baʼaxten tu chaʼaj u muʼyaj u Hijo. Teʼ Juan 3:16, jach jatsʼuts bix u tsolik. ¿A kʼáat a xoke?

Lucía: Jaaj. Ku yaʼalik: «Dioseʼ tumen jach u yaabiltmaj yóokʼol kaabeʼ tu tsʼáaj u juntúuliliʼ Paal, utiaʼal beyoʼ maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul».

Linda: Diosboʼotik. Ilawil bix u yaʼalik: «Dioseʼ tumen jach u yaabiltmaj yóokʼol kaabeʼ». ¿Ta wilaj? Ku yaʼalikeʼ u yaabiltmaj yóokʼol kaab. Letiʼe yaabilaj péeks Dios u túuxt u Hijo kíimil t-oʼolaloʼ. Lelaʼ letiʼe baʼax maas nojoch u beetmaj Dios yoʼolal u yaabilajoʼ. Le oʼolal túun u j-jaajkunajoʼon Jéeobaeʼ cada año táan k-kʼaʼajsik le úuchik u kíimil Jesucristooʼ. ¿Bix ta wilil le baʼax tsʼoʼok k-tsikbaltikoʼ?

Lucía: Jach maʼalob. Diosboʼotik úuchik a tsolikten.