Wa u yaabiltmuba taatatsil yéetel maamatsileʼ, u paalaloʼobeʼ maʼalob kun líikʼloʼob (Colosasiloʼob 3:14, 19). Le paalaloʼoboʼ kʼaʼabéet u yojéeltikoʼob yaabiltaʼanoʼob tumen u taataʼob, yéetel u yaʼalaʼaltiʼob ku beetkoʼob baʼaloʼob maʼalobtak. Jéeobaeʼ tu tsʼáaj u ejemploil: tu yaʼalaj tiʼ Jesús u yaabiltmaj yéetel kiʼimak u yóol tu yoʼolal. (Xok Mateo 3:17.)

Jéeoba, k-Taata yaan teʼ kaʼanoʼ, ku yuʼubik baʼax k-aʼaliktiʼ yéetel ku chʼaʼik en cuenta bix k-uʼuyikba. Le taatatsiloʼoboʼ bey unaj u beetkoʼoboʼ: unaj u yuʼubikoʼob baʼax ku yaʼalik u paalaloʼob (Santiago 1:19). Unaj u chʼaʼikoʼob en cuenta bix u yuʼubikubaʼob yéetel maʼ unaj u kʼeʼekʼeykoʼob ken u yaʼaloʼob baʼax maʼ unajiʼ. (Xok Números 11:11, 15.)

Ichil junpʼéel najeʼ letiʼe taatatsil aʼalik baʼax unaj u beetaʼaloʼ (Efesoiloʼob 6:1). Jeʼex u beetik Dioseʼ, le taatatsiloʼob u yaabiltmaj u paalaloʼoboʼ ku yaʼalik baʼax jeʼel u yúuchultiʼob wa ku beetkoʼob baʼax kʼaaseʼ (Génesis 3:3). Tsʼoʼoleʼ maʼ unaj u obligartik u paalal u yuʼuboʼob tʼaaniʼ; maas maʼalob ka u yaʼaloʼobtiʼob baʼax utsil jeʼel u kʼamkoʼob wa ku beetkoʼob baʼax maʼalobeʼ. (Xok Isaías 48:18, 19.)

Áant a paalal u yaabiltoʼob Dios. Beyoʼ a paalaleʼ yaan u chʼaʼtuklik u beetkoʼob baʼax maʼalob, kex minaʼanech tu yiknaloʼob. Dioseʼ ku kaʼanskoʼon yéetel baʼax ku beetik; beet xan beyoʼ. (Xok Deuteronomio 6:5-7; Efesoiloʼob 4:32; 5:1.)