Utiaʼal u beetaʼal waaj úuchjeakileʼ suuk u meyaj kaʼ utiaʼal u juʼuchʼul wa u muʼuxul le neekʼoʼoboʼ. Le koʼoleloʼob wa le j-kʼoosoʼoboʼ sáamsamal táan u juuchʼoʼob yéetel kaʼ tu yotochoʼob. Teʼ kʼiinoʼoboʼ tiʼ tuláakal kaaj suuk u yuʼubaʼal u juum le kaʼoboʼ (Éxodo 11:5; Jeremías 25:10).

Tu luʼumil Egiptoeʼ tsʼoʼok u kaxtaʼal dibujoʼob wa mejen muñecoʼob ku yeʼesik bix le úuchben kaʼoboʼ yéetel bix u juuchʼ kaʼach le máakoʼoboʼ. Le kaʼoʼ de kaʼapʼéel tuunich. Junpʼéeleʼ nojoch yéetel kʼóom taam; tiʼ ku tsʼaʼabal le neekʼoʼoboʼ. Le uláakʼ junpʼéeloʼ —u kʼab le kaʼoʼ— chichan, tumen letiʼe ku machik máak utiaʼal u juchʼik le neekʼoʼoboʼ. Le máax kun juuchʼoʼ ku xoltal tu yiknal le tuunich nojochoʼ, yéetel tu kaʼapʼéelal u kʼabeʼ ku machik le uláakʼ junpʼéel tuunichoʼ, tsʼoʼoleʼ ku tsʼáaik u muukʼ utiaʼal u máansik yóokʼol le neekʼoʼoboʼ. Junpʼéel revistaeʼ ku yaʼalikeʼ u aalil u kʼab le kaʼoʼ kaʼapʼéel wa tak kanpʼéel kilos. Jeʼel tak u kíimsik máak wa ka lúubuk tu pooleʼ (Jueces 9:50-54).

Le kaʼoʼ jach kʼaʼanaʼan utiaʼal u kuxtal máak kaʼachi. Le oʼolal le Bibliaoʼ ku yaʼalik: «Maʼ a kʼáatkeʼex tiʼ mix máak, u kʼab u kaʼ, mix u kaʼil u juuchʼ, tu yoʼolal u pʼaxmajeʼex, tumen leloʼ láayliʼ bey táan a kʼáatkeʼex u kuxtaleʼ» (Deuteronomio 24:6).

Le Biblia El Nuevo Testamento de Nuestro Señor Jesucristo ich Mayaoʼ ku yaʼalikeʼ Jesuseʼ «tiaʼan naatsʼ tu puksiʼikʼal le Taataoʼ» (Juan 1:18). Lelaʼ u kʼáat u yaʼaleʼ jach maʼalob u biskuba yéetel u Taata. Le tʼaanaʼ suukchaj u yaʼalaʼal yoʼolal bix u yantal le judíoʼob ken jaankoʼoboʼ.

Tu kʼiiniloʼob Jesuseʼ le mesa tuʼux ku janal le judíoʼoboʼ kabal u yook, tsʼoʼoleʼ tu baʼpacheʼ ku tsʼaʼabal baʼaloʼob bey camaʼob utiaʼal u yantal máak ken jaankeʼ. Tu lugar u kutal máakeʼ tséel chital ku beetik; u yookoʼobeʼ paachil ku pʼáatal. Yóokʼol junpʼéel kʼáanjoʼoleʼ ku jetsʼik u muukʼ tiʼ u x-tsʼíik kúuk. Beyoʼ jeʼel u páajtal u meyaj u x-noʼoj kʼabeʼ. Junpʼéel diccionarioeʼ ku yaʼalikeʼ «ken tséel chilak máak beyaʼ u pooleʼ naatsʼ u pʼáatal tu tseem le máax tséel chilikbal paachil tiʼoʼ». Le oʼolal ku yaʼalaʼaleʼ ‹naatsʼ yanil tu puksiʼikʼal› le uláakʼ juntúuloʼ.

Maʼ jeʼel máaxak jeʼel u chaʼabal u tséel chital táanil tiʼ u yuumil naj wa tiʼ le máax beetik junpʼéel fiestaoʼ. Le oʼolal teʼ Última Cenaoʼ apóstol Juan tséel chilaj táanil tiʼ Jesús, tumen «jach yaabiltaʼan». Le Bibliaoʼ ku yaʼalikeʼ Juaneʼ «tu maas takʼuba tiʼ Jesús», wa «tu jach natsʼuba tu yiknal», utiaʼal u beetiktiʼ junpʼéel kʼáatchiʼ (Juan 13:23-25; 21:20).