Utiaʼal u biskuba maʼalob kaʼatúul máakoʼobeʼ kʼaʼabéet u tsikbaloʼob. Dioseʼ ku yaʼalik ka tsikbalnakoʼon tu yéetel, tumen u kʼáat u bisuba t-éetel. Ku yaʼalik: «Teʼex túuneʼ bíin a chʼaʼchiʼiteneʼex, bíin payalchiʼinakeʼex tiʼ teen, teen xaneʼ bíin in wuʼuy a kʼáat óolaleʼex» (Jeremías 29:12). Wa ka tʼanik Dioseʼ, letiʼeʼ «bíin u natsʼuba tiʼ [teech]» (Santiago 4:8). Le Bibliaoʼ ku yaʼalik: «[Dioseʼ] naatsʼ yanil tiʼ máaxoʼob tʼanik» (Salmo 145:18). Mientras maas k-orareʼ, maas jatsʼuts ken k-bisba tu yéetel.

Jesuseʼ tu yaʼalaj: «¿Máax ichileʼex jeʼel u tsʼáaik junpʼéel tuunich tiʼ u paal ken u kʼáat waajeʼ? Wa xan ku kʼáatik juntúul kayeʼ, ¿máasaʼ maʼ tu tsʼáaik juntúul kaan tiʼ? Le oʼolaleʼ, wa teʼex [...] a wojel a tsʼáaʼex maʼalob baʼaloʼob tiʼ a paalaleʼexeʼ, ¿kux túun a Taataʼex yaan teʼ kaʼanoʼ?, ¿maʼ wa maas jeʼel u tsʼáaik maʼalob baʼaloʼob tiʼ le máaxoʼob kʼáatiktiʼoʼ?» (Mateo 7:9-11). Jach beyoʼ, Dioseʼ u kʼáat ka orarnakoʼon tumen «jach u tsʼaamaj u yóol u yáant[oʼon]» (1 Pedro 5:7). U kʼáat xan ka náatsʼkoʼon tu yiknal wa yaantoʼon problemaʼob. Bey u yaʼalik le Bibliaoʼ: «Maʼ a sen chiʼichnaktaleʼex tu yoʼolal mix baʼal, baʼaxeʼ tiʼ tuláakal baʼaleʼ, ich oración bey xan ich kʼáat óolal junmúuchʼ yéetel a tsʼáaikeʼex graciaseʼ, aʼaleʼex tiʼ Dios baʼax a kʼáateʼex» (Filiposiloʼob 4:6).

Tsʼoʼok u yilaʼaleʼ u millonesil máakoʼob ku yuʼubikoʼob kʼaʼabéet u oraroʼob, tak ateoʼob yéetel máakoʼob maʼ tu jach creertikoʼob Dios. * Lelaʼ ku yeʼesikeʼ Dioseʼ tu beetoʼon yéetel u tsʼíibolal k-natsʼikba tiʼ letiʼ. Tak Jesús tu yaʼalaj: «Kiʼimak u yóol le máaxoʼob wiʼijoʼob tiʼ tuláakal le baʼaxoʼob ku tsʼáaik Diosoʼ» (Mateo 5:3). Jeʼel u páajtal u yaʼalaʼaleʼ k-naʼajtal ken orarnakoʼon tiʼ Dios.

¿Baʼax utsil jeʼel k-kʼamik wa k-orar tiʼ Dios jeʼex u yaʼaliktoʼonoʼ?