Jéeoba Dioseʼ «u sayabil le kuxtaloʼ» (Salmo 36:9). Le oʼolaleʼ jeʼel u páajtal u kaʼa kuxkíintik le kimenoʼoboʼ. Le Bibliaoʼ ku yaʼalikeʼ le ken u beet Dios ichil junpʼíit kʼiin. (Xok Baʼaxoʼob [Hechos] 24:15.) Baʼaleʼ ¿baʼax tiaʼal ken u ka kuxkíint le kimenoʼoboʼ?

Desde tu káajbaleʼ Dioseʼ u kʼáat ka yanak kuxtal minaʼan u xuul tiʼ wíinik (Génesis 1:31; 2:15-17). Bejlaʼeʼ láayliʼ letiʼe baʼax u kʼáatoʼ. Ku yaatal u yóol u yilik bix kuxlikoʼon: yaʼab problema yaantoʼon yéetel séeb u máan le kuxtaloʼ. (Xok Job 14:1, 14, 15.)

Dioseʼ ¿tu beetaj wa wíinik utiaʼal u kajtal teʼ kaʼanoʼ? Maʼ. Letiʼeʼ tu beetaj angeloʼob utiaʼal u kajtaloʼob teʼ kaʼanoʼ yéetel tu beetaj wíinikoʼob utiaʼal u kajtaloʼob way Luʼumeʼ (Génesis 1:28; Job 38:4, 7). Tuukulnen tiʼ le máaxoʼob kaʼa kuxkíintaʼaboʼob tumen Jesucristooʼ. ¿Máasaʼ way Luʼum kajlajoʼob tu kaʼatéeneʼ? Bey kun úuchul xan yéetel le máakoʼob kun kaʼa kuxkíintbiloʼob way Luʼumoʼ. (Xok Juan 5:28, 29; 11:44.)

Dioseʼ tsʼoʼok xan u yéeyik u chan múuchʼ máakoʼob utiaʼal u kajtaloʼob teʼ kaʼanoʼ; ken kaʼa kuxkíintaʼakoʼobeʼ yaan u tsʼaʼabaltiʼob junpʼéel wíinklil espiritual, maʼ de bakʼ yéetel kʼiʼikʼiʼ (Lucas 12:32; 1 Corintoiloʼob 15:49, 50). Letiʼobeʼ yaan u múul gobernartikoʼob le Luʼum yéetel Jesucristooʼ. (Xok Apocalipsis 5:9, 10.)