Dioseʼ tʼaanajaʼan yéetel wíinikoʼob. ¿Bix tu beetil? Yéetel u kiliʼich muukʼ wa espíritu santoeʼ tu péeksaj jujuntúul máakoʼob u tsʼíibtoʼob teʼ Biblia baʼax ku tuklikoʼ (2 Pedro 1:20, 21). Wa k-xokik túun le Bibliaoʼ jeʼel k-ojéeltik u jaajil yoʼolal Dioseʼ. (Xok Juan 17:17; 2 Timoteo 3:16.)

Teʼ Bibliaoʼ Dioseʼ yaʼab baʼaxoʼob ku yaʼaliktoʼon tu yoʼolal letiʼ. Ku tsolik xan baʼaxten tu beetoʼon, baʼax ken u beet t-oʼolal yéetel bix u kʼáat ka kuxlakoʼon (Baʼaxoʼob [Hechos] 17:24-27). Jéeobaeʼ u kʼáat ka k-ojéelt u jaajil tu yoʼolal. (Xok 1 Timoteo 2:3, 4.)

Jéeobaeʼ u Diosil le jaajoʼ, le oʼolal tu túuxtaj Jesucristo u Hijo utiaʼal u kaʼansiktoʼon. Bey túunoʼ le máaxoʼob u kʼáat u kanoʼob u jaajiloʼ ku kʼamkoʼob le baʼaxoʼob tu kaʼansaj Jesusoʼ (Juan 18:37). Letiʼe máaxoʼob u kʼáat Dios ka u adorartoʼ. (Xok Juan 4:23, 24.)

Satanaseʼ yaʼab tuusoʼob tsʼoʼok u yaʼalik tu yoʼolal Dios utiaʼal maʼ u yojéeltaʼal u jaajil tumen yaʼabkach máakoʼob (2 Corintoiloʼob 4:3, 4). Le máaxoʼob maʼ taak u yojéeltikoʼob u jaajiloʼ kiʼimak u yóoloʼob kex ka kaʼansaʼaktiʼob baʼaloʼob maʼ jaajtakiʼ (Romailoʼob 1:25). Bejlaʼeʼ u millonesil máakoʼob ku xokikoʼob le Bibliaoʼ tumen u kʼáat u kanoʼob u jaajil. (Xok Baʼaxoʼob 17:11.)