Le ka pʼáat embarazadail a maamaeʼ káaj a kuxtal. Chéen baʼaleʼ, chéen beyech junpʼéel chan célula jach chichan casi maʼ tu páajtal u yilaʼaleʼ, ku kʼaabaʼtik cigoto. Pero jeʼex máanik le mesoʼoboʼ le chan célulaoʼ yaʼabchaji ka tu formartaj maas tiʼ 200 célulaʼob jejeláas u nojchiloʼob, u formaʼob yéetel jejeláas meyaj ku beetkoʼob xan, hasta ka tu formartoʼob a wíinklil bey juntúul chaambaleʼ.

 Tuukulnen tiʼ lelaʼ: Le cigotooʼ ku beetik uláakʼ junpʼéel célula jach igual yéetel le mismo ADN yaantiʼoʼ. Cada kéen yanak junpʼéel túumben célulaeʼ bey xan u beetkoʼ, bey u bin u yaʼabtal le célulaʼoboʼ. Kex igual u yilaʼal tuláakal le célulaʼoboʼ pero ichil u ADNeʼ u yojel baʼax meyajil ken u beete.

 Kéen máanak junpʼéel semana tiʼ le célulaoʼ ku káajal u yeʼesik baʼax meyajil ken u beete yéetel ku dividirkubaʼob ich kaʼapʼéel clase. Junpʼéel parteeʼ ku formarkoʼob le embriónoʼ yéetel le uláakʼ jaatsoʼ ku formarkoʼob le placentaoʼ yéetel uláakʼ xiichʼoʼob kun áantik nojochtal le embriónoʼ.

 Kéen máanak tres semanas tiʼ u célulail le embriónoʼ ku formarkoʼob óoxpʼéel capas. Le célulaʼob yaan tiʼ le yáax capaoʼ u meyajoʼobeʼ u formarkoʼob le células kun meyaj tu nervios máakoʼ, tu cerebro, tu chiʼ, tu yootʼel wa u kʼéewelil u wíinklil máak yéetel uláakʼ baʼaloʼob. Le célulaʼob yaan tiʼ u kaʼapʼéel capaoʼ yaan u suutoʼob de kʼiʼikʼil, baakoʼob, riñónoʼob yéetel uláakʼ xiichʼoʼob. Le célulaʼob yaan tiʼ u yóoxpʼéel capaoʼ yaan u formarkoʼob le pulmónoʼoboʼ, u vejiga máak yéetel u choochel.

 Jeʼex u máan le mesoʼoboʼ jujunpʼéel célulaʼob wa u múuchʼ célulaʼobe’ ku binoʼob tiʼ uláakʼ parte tiʼ le embriónoʼ. Uláak’ célula’obe’ ku much’kuba’ob yéetel ku formarkoʼob mejen capas wa pliegue’ob, tsʼoʼoleʼ junmúuchʼ u meyajoʼob. Por ejemploeʼ le jejeláas célulaʼob yaan ichil le embrión de forma capaoʼ ku kots’kuba’ob yéetel ku formarkoʼob mejen tubos. Le mejen tubos túunoʼ ku káajal u chowaktaloʼob yéetel u xaʼaypajloʼob hasta kéen formarnak le vena’obo’.

 Le kéen síijik juntúul chaambaleʼ toj u yóol tumen le u millonesil célulaʼoboʼ tsʼoʼok u beetkoʼob le meyaj kʼaʼabéet utiaʼal u formar le chaambaloʼ. Tuláakal múul meyajnajoʼob teʼ tuʼux kʼaʼabéetoʼ yéetel teʼ súutukil kʼaʼabéetoʼ.

 Techeʼ, ¿bix a wilik? Tuláakal le meyaj ku beetik le célulaʼob utiaʼal u formar juntúul chaambaloʼ, ¿chéen wa bey anchajikoʼ wa yaan máax beeteʼ?